ବଜେଟ ୨୦୨୩-୨୪: ଶିକ୍ଷା କ୍ଷେତ୍ରରେ ନିଯୁକ୍ତି ସାଙ୍ଗକୁ ପ୍ରଶିକ୍ଷଣ ଉପରେ ମୋଦୀ ସରକାରର ଗୁରୁତ୍ୱ

ନୂଆଦିଲ୍ଲୀ: ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି ତାଙ୍କର ପଞ୍ଚମ ବଜେଟ୍ ଉପସ୍ଥାପନ କରିଛନ୍ତି। ଏହି ସମୟରେ ସେ ବିଭିନ୍ନ ବିଭାଗ ପାଇଁ ଗୁରୁତ୍ୱପୂର୍ଣ୍ଣ ଘୋଷଣା କରିଛନ୍ତି। ଶିକ୍ଷା ମନ୍ତ୍ରଣାଳୟକୁ ୧.୧୨ ଲକ୍ଷ କୋଟି ଚଙ୍କା ଆବଣ୍ଟନ କରାଯାଇଛି। ଯାହାକି ପୂର୍ବ ବଜେଟ ତୁଳନାରେ ସର୍ବାଧିକ।

ସୀତାରମଣ ଘୋଷଣା କରିଛନ୍ତି ଯେ ଆସନ୍ତା ତିନି ବର୍ଷ ମଧ୍ୟରେ ଏକଲବ୍ୟ ବିଦ୍ୟାଳୟରେ ଶିକ୍ଷକ ନିଯୁକ୍ତ ହେବେ। ଏହି ଅଧୀନରେ ୭୪୦ ଏକଲବ୍ୟ ବିଦ୍ୟାଳୟ ପାଇଁ ୩୮ ହଜାର ୮୦୦ ଶିକ୍ଷକ ଏବଂ ସହାୟକ କର୍ମଚାରୀ ନିଯୁକ୍ତ ହେବେ। ଏକ ଡିଜିଟାଲ ଲାଇବ୍ରେରୀ ପ୍ରତିଷ୍ଠା କରାଯିବ ବୋଲି ଅର୍ଥମନ୍ତ୍ରୀ ନିର୍ମଳା ମଧ୍ୟ କହିଛନ୍ତି। ଜାତୀୟ ଡିଜିଟାଲ ଲାଇବ୍ରେରୀ ପଞ୍ଚାୟତ ଏବଂ ୱାର୍ଡ ସ୍ତର ପର୍ଯ୍ୟନ୍ତ ଖୋଲାଯିବ। ଆଞ୍ଚଳିକ ଏବଂ ଇଂରାଜୀ ଭାଷାରେ ବହି ଦିଆଯିବ। ଏନଜିଓଗୁଡ଼ିକର ସହଯୋଗରେ ସାକ୍ଷରତା ଉପରେ କାର୍ଯ୍ୟ କରାଯିବ।

ଲୋକସଭାରେ ଦେଶର ସାଧାରଣ ବଜେଟ୍ ଉପସ୍ଥାପନ କରି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଶିକ୍ଷା ପାଇଁ ଘୋଷଣା କରିଛନ୍ତି ଯେ ଦେଶରେ ଶିକ୍ଷକ ପ୍ରଶିକ୍ଷଣ ପାଇଁ ନୂଆ କାର୍ଯ୍ୟକ୍ରମ ଆରମ୍ଭ ହେବ। ଏହା ବ୍ୟତୀତ ୧୫୭ଟି ନୂଆ ନର୍ସିଂ କଲେଜ ଘୋଷଣା କରାଯାଇଛି।

୨୦୨୨ ବଜେଟରେ ଶିକ୍ଷା କ୍ଷେତ୍ରକୁ ୧ ଲକ୍ଷ ୪ ହଜାର ୨୭୭ କୋଟି ଟଙ୍କା ବଜେଟ୍ ପ୍ରଦାନ କରାଯାଇଛି। ଏଥିମଧ୍ୟରୁ ୬୩,୪୪୯ କୋଟି ଟଙ୍କା ବିଦ୍ୟାଳୟ ଶିକ୍ଷା ପାଇଁ ଦିଆଯାଇଥିଲା। ଉଚ୍ଚଶିକ୍ଷା ପାଇଁ ୪୦,୮୨୮ କୋଟି ଟଙ୍କା ଆବଣ୍ଟନ କରାଯାଇଥିଲା। ସର୍ବଭାରତୀୟ ଶିକ୍ଷା ପାଇଁ ପ୍ରାୟ ୩୭,୩୮୩ କୋଟି ଟଙ୍କା ଆବଣ୍ଟନ କରାଯାଇଛି। ୨୦୨୧ ମସିହାରେ, ଏହି ଯୋଜନା ପାଇଁ ମୋଟ ୩୦ ହଜାର କୋଟି ବଜେଟ୍ ଆବଣ୍ଟନ କରାଯାଇଥିଲା।

୨୦୨୨ ବର୍ଷର ବଜେଟରେ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି) ପାଇଁ ଆବଣ୍ଟନ ୮୩୪୪.୮୪ କୋଟିରୁ ୮, ୪୯୫ କୋଟିରେ ବୃଦ୍ଧି କରାଯାଇଥିଲା। ବିଶ୍ୱବିଦ୍ୟାଳୟ ଅନୁଦାନ ଆୟୋଗ (ଯୁଜିସି) ଏବଂ ଏଆଇସିଟିଇ ପାଇଁ ୫୩୨୦.୯୧ କୋଟି ଟଙ୍କାର ବ୍ୟବସ୍ଥା କରାଯାଇଥିଲା। ୨୦୨୧ ବର୍ଷର ବଜେଟରେ, ଏଥିପାଇଁ ୫୧୩୯.୨ କୋଟି ଟଙ୍କା ପ୍ରଦାନ କରାଯାଇଥିଲା।