ନବରଙ୍ଗପୁର: ଆଉ ଦିନ କେଇଟା ପରେ ଧରାପୃଷ୍ଠକୁ ହେବ ମା’ଙ୍କ ଆଗମନ । ମା’ଙ୍କ ଧରବତାରଣ ପୂର୍ବରୁ ବଧୁ ବେଶ ରେ ସଜେଇ ହେଉଛି ପୃଥିବୀ । କାଶତାଣ୍ଡି ଫୁଲର ଧବଳ ଚାଦର ସହିତ ପଦ୍ମ ଓ କଇଁ ଫୁଲର ଅପାର ସମ୍ଭାରରେ ମହି ଆଚ୍ଛାଦିତ ହୋଇ ମା’ଙ୍କୁ ସ୍ୱାଗତ ଜଣାଉଛି । ଅନ୍ୟପକ୍ଷରେ ନବରଙ୍ଗପୁର ଜିଲ୍ଲାର ପ୍ରସିଦ୍ଧ ପୂଜାସ୍ଥଳୀ ପାପଡାହାଣ୍ଡି ଠାରେ ମା’ଙ୍କ ସ୍ୱାଗତ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ । ଆକର୍ଷଣୀୟ ତୋରଣ ମାଳା ସହିତ ସୁସଜ୍ଜିତ ଆଲୋକମାଳାରେ ଝଲସିବ ପାପଡାହାଣ୍ଡି ସହର ।
ଦଶହରା ମେଢ ପାଇଁ ନବରଙ୍ଗପୁର ଜିଲ୍ଲା ସହ ଓ ଆଖପାଖ ଅଞ୍ଚଳରେ ପ୍ରସିଦ୍ଧି ଲାଭ କରିଥିବା ପାପଡାହାଣ୍ଡିରେ ପ୍ରତିବର୍ଷ ଦୁଇଟି ଦଳ ଦ୍ୱାରା ଦୁଇଟି ମେଢ କରାଯାଇଥାଏ । ପ୍ରତିବର୍ଷ ନୂଆନୂଆ ଥିମକୁ ନେଇ ତିଆରି ହୋଇଥିବା ଏହି ମେଢ ଗୁଡିକ ଲୋକଙ୍କ ଆକର୍ଷଣର କେନ୍ଦ୍ରବିନ୍ଦୁ ହୋଇଥାଏ । ମା’ଙ୍କ ସ୍ୱାଗତ ପାଇଁ ଏହି ଦୁଇଟି ପୂଜା ମଣ୍ଡପର ପ୍ରସ୍ତୁତି ଶେଷ ପର୍ଯ୍ୟାୟରେ । ମୂର୍ତ୍ତି କୁ ରଙ୍ଗର ଶେଷ ସ୍ପର୍ଶ ଦେବାରେ ବ୍ୟସ୍ତ କାରିଗର । ପାପଡାହାଣ୍ଡି ଜିଲ୍ଲାର କେନ୍ଦ୍ର ସ୍ଥଳୀ ହୋଇଥିବାରୁ ଏଠାରେ ଜିଲ୍ଲାର ଭକ୍ତଙ୍କ ସହିତ ପୋଡ଼ଶୀ ଜିଲ୍ଲା କୋରାପୁଟ , କଳାହାଣ୍ଡି ,ଛତିଶଗଡ଼ ଅଞ୍ଚଳର ଭକ୍ତ ମାନେମଧ୍ୟ ଯୋଗଦେଇଥାନ୍ତି । ଲକ୍ଷାଧିକ ଭକ୍ତଙ୍କ ସମାଗମକୁ ନଜରରେ ରଖି ପୂଜା କମିଟି ତରଫରୁ ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ହେଉଛି ପୂଜା ମଣ୍ଡପ ଓ ତୋରଣ ।
ପାପଡାହାଣ୍ଡି ସହରର ଦୁଇଟି ସ୍ଥାନରେ ମା’ଙ୍କର ମୃଣ୍ମୟୀ ମୂର୍ତ୍ତି ପୂଜା ହୁଏ ପ୍ରତ୍ୟେକ ବର୍ଷ ଭିନ୍ନ ଭିନ୍ନ ଥିମକୁ ନେଇ ଦୁଇଟି ପୂଜା ମଣ୍ଡପରେ ତୋରଣ ଓ ମେଢ଼ ନିର୍ମାଣ କରାଯାଉଥିବା ବେଳେ ଚଳିତ ବର୍ଷର ଆକର୍ଷଣ ରହିଛି ଥାଇଲାଣ୍ଡର ଡ୍ରାଗନ ମନ୍ଦିର । ଏଥିନିମନ୍ତେ ପୁରୀରୁ ଓ କଲିକତାରୁ କାରିଗର ଆସିଛନ୍ତି । ଅନ୍ୟପକ୍ଷରେ ଅଲୋକି କରଣ ପାଇଁ ବାହାର ଜିଲ୍ଲାରୁ ଆସିଛନ୍ତି କାରିଗର । ଏହାସହ ଅନ୍ୟ ଏକ ପୂଜା ମଣ୍ଡପରେ ରାଜସ୍ଥାନ ଜୈନ ମନ୍ଦିର ମେଢ଼ ସଜା ହୋଇଛି ,ଏଥିନିମନ୍ତେ ପଶ୍ଚିମବଙ୍ଗରୁ କାରିଗର ଆସିଛନ୍ତି । ଦୁଇଟି ପୂଜା ମଣ୍ଡପର ଅନ୍ୟ ଏକ ମୁଖ୍ୟ ଆକର୍ଷଣ ରାବଣ ପୋଡି ରହିଛି । ଏଥିନିମନ୍ତେ ବାହାର ରାଜ୍ୟରୁ କାରିଗର ଆସିବେ ।
Comments are closed.