ଶିମଲା: ହିମାଚଳ ପ୍ରଦେଶ ପୋଲିସ ତୁଷାରପାତ ପରେ ରୋହତଙ୍ଗର ଅଟଳ ଟନେଲ ନିକଟରେ ୩୦୦ ରୁ ଅଧିକ ପର୍ଯ୍ୟଟକଙ୍କୁ ଉଦ୍ଧାର କରିଛି। ସୂଚନା ଅନୁଯାୟୀ ଶନିବାର ପୂର୍ବାହ୍ନରେ କିଛି ପର୍ଯ୍ୟଟକ ଟନେଲ ପାର ହୋଇଯାଇଥିଲେ କିନ୍ତୁ ସନ୍ଧ୍ୟାରେ ତୁଷାରପାତ ହେତୁ ଲାହଲରେ କୌଣସି ବିଶ୍ରାମ ସ୍ଥାନ ପାଇପାରିନଥିଲେ ଏବଂ ମନାଲିକୁ ଫେରୁଥିବା ବେଳେ ମଧ୍ୟଭାଗରେ ଅଟକି ରହିଥିଲେ ବୋଲି କୁଲୁ ଏସପି ଗୌରବ ସିଂ କହିଛନ୍ତି।
ସେମାନଙ୍କ ଉଦ୍ଧାର ପାଇଁ ୪୮ ସିଟ୍ ବିଶିଷ୍ଟ ବସ୍, ୨୪ ସିଟ୍ ବିଶିଷ୍ଟ ପୋଲିସ୍ ବସ୍ ଏବଂ (QRT) ସମେତ ପ୍ରାୟ ୭୦ ଟି ଗାଡି ନିୟୋଜିତ କରାଯାଇଥିଲା। ଉଦ୍ଧାର କାର୍ଯ୍ୟରେ ଡିଏସପି ଏବଂ ମନାଲିର SHO ସମ୍ପୃକ୍ତ ଥିଲେ ଯାହା ପରେ ସୀମା ସଡ଼କ ସଂଗଠନ (BRO) ଯୋଗ ଦେଇଥିଲା ବୋଲି କୁଲୁ ଏସପି କହିଛନ୍ତି।
ଶନିବାର ସନ୍ଧ୍ୟାରେ ଉଦ୍ଧାର କାର୍ଯ୍ୟ ଆରମ୍ଭ ହୋଇ ମଧ୍ୟରାତ୍ରି ପର୍ଯ୍ୟନ୍ତ ଜାରି ରହିଥିଲା ବୋଲି ସେ କହିଛନ୍ତି। ସମସ୍ତ ପର୍ଯ୍ୟଟକଙ୍କୁ ସକାଳ ୧୨.୩୩ ପର୍ଯ୍ୟନ୍ତ ଡୁଣ୍ଡି ଏବଂ ଦକ୍ଷିଣ ପୋର୍ଟାଲରୁ ଉଦ୍ଧାର କରାଯାଇ ମନାଲିର ସୁରକ୍ଷିତ ସ୍ଥାନକୁ ନିଆଯାଇଥିଲା।
ପାଣିପାଗ ବିଭାଗ ଦ୍ୱାରା ପୂର୍ବାନୁମାନ ଅନୁଯାୟୀ, ଆଗାମୀ ଦିନରେ ଟନେଲର ଚତୁର୍ଦ୍ଦିଗରେ ତୁଷାରପାତ ହେବାର ଆଶଙ୍କା ରହିଛି। ମଙ୍ଗଳବାର ଦିନ ହିମାଚଳ ପ୍ରଦେଶରେ ପ୍ରବଳ ତୁଷାରପାତ ପାଇଁ ହଳଦିଆ ପାଣିପାଗ ସତର୍କ ସୂଚନା ଜାରି କରି ଜାନୁଆରୀ ୩ ରୁ ୫ ତାରିଖ ପର୍ଯ୍ୟନ୍ତ ଏବଂ ଜାନୁଆରୀ ୮ ରୁ ରାଜ୍ୟର ମଧ୍ୟଭାଗ ତଥା ଉଚ୍ଚ ପାହାଡରେ ବର୍ଷା ଓ ତୁଷାରପାତ ହେବାର ପୂର୍ବାନୁମାନ କରିଛି।