ନୂଆଦିଲ୍ଲୀ: ଆଜି ନିଟ୍ ପେପର୍ ଲିକ୍ ମାମଲାରେ ସୁପ୍ରିମକୋର୍ଟରେ ଏକ ଗୁରୁତ୍ୱପୂର୍ଣ୍ଣ ଶୁଣାଣି ହେବାକୁ ଯାଉଛି। ଏହା ପୂର୍ବରୁ ସିବିଆଇକୁ ମିଳିଛି ବଡ଼ ସଫଳତା। ଏହି ଘଟଣାର ତଦନ୍ତ କରୁଥିବା ସିବିଆଇ ପେପର୍ ଲିକ୍ ଗ୍ୟାଙ୍ଗର ମୁଖ୍ୟ କନେକସନ ପାଖକୁ ପହଞ୍ଚିଛି। ଏହି ସମୟରେ ଅନୁସନ୍ଧାନକାରୀ ସଂସ୍ଥା ପାଟନା ଏମ୍ସର ତିନି ଡାକ୍ତରଙ୍କୁ ଅଟକ ରଖିଛି। ସିବିଆଇ ଏହି ତିନି ଡାକ୍ତରଙ୍କୁ ପଚରାଉଚରା କରିବା ପାଇଁ ନିଜ ହେପାଜତକୁ ନେଇଛି।
ପାଟନା ଏମ୍ସର ଏହି ତିନି ଡାକ୍ତର ହେଉଛନ୍ତି ୨୦୨୧ ବ୍ୟାଚ୍ର ଡାକ୍ତରୀ ଛାତ୍ର। ସିବିଆଇ ଏହି ତିନି ଡାକ୍ତରଙ୍କ କୋଠରୀକୁ ମଧ୍ୟ ସିଲ୍ କରିଛି। ସେମାନଙ୍କ ଲାପଟପ୍ ଏବଂ ମୋବାଇଲ୍ ଫୋନ୍ ମଧ୍ୟ ଜବତ କରାଯାଇଛି। ସିବିଆଇ ନିଟ୍ ପେପର ଲିକ୍ ଠାରୁ ଆରମ୍ଭ କରି ପରୀକ୍ଷାରେ ସେଟିଂ କରିବା ବ୍ୟକ୍ତିଙ୍କ ନିକଟକୁ ପହଞ୍ଚାଇବା ପର୍ଯ୍ୟନ୍ତ ସମଗ୍ର ନେଟୱାର୍କକୁ ସଂଯୋଗ କରିଛି। ପରୀକ୍ଷା ପେପର୍ ନେଉଥିବା ଟ୍ରକରୁ ପେପର୍କୁ ଗାଏବ କରିବା ବ୍ୟକ୍ତି ପଙ୍କଜଙ୍କୁ ସିବିଆଇ ଧରିଛି।
ପଙ୍କଜଙ୍କର ଓଏସିସ୍ ବିଦ୍ୟାଳୟର ପ୍ରଧାନଶିକ୍ଷକଙ୍କ ସହ ଏକ କନେକସନ୍ ମିଳିଛି। ଏହି କାଗଜ ହାଜରିବାଗର ଏହି ବିଦ୍ୟାଳୟରୁ ସଞ୍ଜୀବ ମୁଖିଆଙ୍କ ନିକଟରେ ପହଞ୍ଚିଥିଲା। ସଞ୍ଜୀବ ମୁଖିଆଙ୍କ ଠାରୁ ରକି ନିକଟରେ ଏହି ପେପର୍ ପହଞ୍ଚିଥିଲା। ରକି ଏହି ପ୍ରଶ୍ନ ପତ୍ରକୁ ସଲଭର ମାଧ୍ୟମରେ ସମାଧାନ କରିଥିଲା। ଏହି ସଂପର୍କରେ ସିବିଆଇ ପାଟନା ଏମ୍ସର ତିନିଜଣ ଡାକ୍ତରଙ୍କୁ ଅଟକ ରଖିଛି। ପେପର୍ ଲିକ୍ ମାମଲାରେ ଏପର୍ଯ୍ୟନ୍ତ ୧୫ଜଣଙ୍କୁ ଗିରଫ କରାଯାଇଛି।
ନିଟ୍-ୟୁଜି ପେପର୍ ଲିକ୍ ମାମଲାରେ ସୁପ୍ରିମକୋର୍ଟ ଆଜି ୪୦ରୁ ଅଧିକ ଆବେଦନ ଉପରେ ଶୁଣାଣି କରିବେ। ସୁପ୍ରିମକୋର୍ଟରେ ଦାଖଲ ହୋଇଥିବା ଏହି ପିଟିସନରେ ଅନିୟମିତତା ଘଟଣାର ତଦନ୍ତ, ପରୀକ୍ଷା ବାତିଲ ଏବଂ ପୁନଃ ପରୀକ୍ଷା ପାଇଁ ଆବେଦନ କରାଯାଇଛି।
ଗତ ଶୁଣାଣିରେ କେନ୍ଦ୍ର ସରକାର ତାଙ୍କ ଆଫିଡେଭିଟ୍ରେ କହିଛନ୍ତି ଯେ NEET-UG ମାମଲାରେ କୌଣସି ବଡ଼ ଧରଣର କେଳେଙ୍କାରୀ ହୋଇନାହିଁ। ଏଭଳି ପରିସ୍ଥିତିରେ ପୁନର୍ବାର ପରୀକ୍ଷା କରିବାର କୌଣସି ଆବଶ୍ୟକତା ନାହିଁ। ଯେତେବେଳେ କି ଏନଟିଆଇ ନିଜ ଆଫିଡେଭିଟ୍ରେ କହିଛି ଯେ ସମଗ୍ର ଦେଶରେ ପେପର୍ ଲିକ୍ ହୋଇନାହିଁ। NEET-UG ପରୀକ୍ଷା ମେ ୫ ତାରିଖରେ ଅନୁଷ୍ଠିତ ହୋଇଥିଲା। ଏହାର ଫଳାଫଳ ଜୁନ୍ ୪ରେ ଘୋଷଣା କରାଯାଇଥିଲା। ସେବେଠାରୁ ନିଟ୍-ୟୁଜି ବିରୋଧରେ ଅନିୟମିତତା ଅଭିଯୋଗ ଆରମ୍ଭ ହୋଇଥିଲା।
Comments are closed.