କଟକ: ଭଗବାନ ଯାହାକୁ ରଖିବେ ତାକୁ କିଏ ମାରିବ ? ଏହି କଥାର ସତ୍ୟତା ପୁଣି ଥରେ ପ୍ରମାଣିତ ହୋଇଛି କଟକ ଜିଲ୍ଲା ବାଙ୍କି ଅଞ୍ଚଳରେ ।
୩/୪ ଦିନ ତଳେ କିଣିଥିଲେ ନୂଆ କାର । କାରରେ ବସି ତିନି ଜଣ ବ୍ୟକ୍ତି କଟକରୁ ବାଙ୍କି ଆସିଥିଲେ । ହେଲେ ସେମାନେ କାହିଁକି ଜାଣିବେ, ବାଟରେ ଏମିତି ଅଘଟଣ ଅପେକ୍ଷା କରିଛି ବୋଲି ? ବାଟରେ ସେମାନଙ୍କର ଦହିବରା ଖାଇବାକୁ ଇଚ୍ଛା ହେଲା । ହେଲେ ଏହି ଦହି ବରା ଖାଇବାର ଇଚ୍ଛା ତାଙ୍କୁ ଏକ ବଡ ବିପତ୍ତିରୁ ବଞ୍ଚାଇ ଦେଲା ।
ଜାତମୁଣ୍ଡିଆ ଗୋଲେଇ ଛକଠାରେ କାର ରଖି ଚାଳକଙ୍କ ସମେତ ତିନିଜଣ ଦହିବରା ଖାଇବାକୁ ଯାଇଥିଲେ । ସେମାନେ ଦହିବରା ଖାଉଛନ୍ତି । ଏହି ସମୟରେ କାରଟି ଆପେ ଆପେ ଗଡିବାକୁ ଲାଗିଲା । ସେମାନେ କିଛି ଦୂରରୁ ଦେଖୁଛନ୍ତି । କାରଟି ଗଡି ଗଡି ଶେଷରେ ଏକ ୧୦ ଫୁଟର ଗାତରେ ଖସି ପଡିଥିଲା ।
ପ୍ରଥମେ ସେମାନେ କିଛି ବୁଝି ପାରି ନ ଥିଲେ । କାରଟି ଖସିପଡିବା ସମୟରେ କେହି ଭିତରେ ନ ଥିଲେ ତଥାପି ସେମାନେ ଭୟଭୀତ ହୋଇ ଯାଇଥିଲେ । ତେବେ କାରଟି ଗଡାଣିଆ ଜାଗାରେ ଥିବାରୁ ଏପରି ଅଘଟଣା ଘଟିଥିଲା । ଯାହା ବି ହେଉ, କାରର କିଛି କ୍ଷତି ହୋଇନାହିଁ । କ୍ରେନ ସାହାଯ୍ୟରେ କାରକୁ ଉଠାଇବାକୁ ଚେଷ୍ଟା କରାଯାଉଛି ।