ଭୁବନେଶ୍ୱର: ଏଣିକି ଗାଡ଼ି ମାଲିକମାନଙ୍କୁ ଆଉ ଡ୍ରାଇଭିଂ ଲାଇସେନ୍ସ (ଡିଏଲ୍) ନବୀକରଣ କିମ୍ବା ଲର୍ଣ୍ଣିଂ ଲାଇସେନ୍ସ ନେବା ପାଇଁ ଆଞ୍ଚଳିକ ପରିବହନ ଅଧିକାରୀ (ଆରଟିଓ)ଙ୍କ ଅଫିସକୁ ଯିବାକୁ ପଡ଼ିବ ନାହିଁ। ତେବେ ଅନଲାଇନରେ ମେଡିକାଲ୍ ସାର୍ଟିଫିକେଟ୍ ପ୍ରଦାନ ବାଧ୍ୟତାମୂଳକ ହେବ। ରାଜ୍ୟ ପରିବହନ କର୍ତ୍ତୃପକ୍ଷଙ୍କ ନିୟମ ଅନୁସାରେ 40 ବର୍ଷରୁ ଅଧିକ ବୟସର ଯେକୌଣସି ବ୍ୟକ୍ତି ଡ୍ରାଇଭିଂ ଲାଇସେନ୍ସ ନେବାକୁ ଚାହୁଁଥିଲେ କିମ୍ବା ମୋଟର ଯାନ ଆଇନ ଅନୁସାରେ ଡ୍ରାଇଭିଂ ଲାଇସେନ୍ସ ନବୀକରଣ ପାଇଁ ଯାଉଥିବା ବ୍ୟକ୍ତିଙ୍କ ପାଇଁ ମେଡିକାଲ ସାର୍ଟିଫିକେଟ୍ ବାଧ୍ୟତାମୂଳକ।
ଆରଟିଓ କାର୍ଯ୍ୟାଳୟରେ ଭିଡ଼ କମାଇବା ପାଇଁ 1(କ) ଫର୍ମରେ ମେଡିକାଲ ସାର୍ଟିଫିକେଟ୍ ଇଲେକ୍ଟ୍ରୋନିକ୍ ମାଧ୍ୟମରେ ଦେବା ପାଇଁ ନିଷ୍ପତ୍ତି ନିଆଯାଇଥିବା ସୂଚନା ମିଳିଛି। ଏଥିପାଇଁ ସାରଥି ପୋର୍ଟାଲରେ ଆବଶ୍ୟକ ସୁବିଧା ପ୍ରଦାନ କରାଯାଇଛି ଯେଉଁଠାରେ ପୋର୍ଟାଲରେ ପଞ୍ଜିକୃତ ଡାକ୍ତରମାନେ ସିଧାସଳଖ ମେଡିକାଲ ପ୍ରମାଣପତ୍ର ପ୍ରଦାନ କରିପାରିବେ ଯାହା ମେଡିକାଲ ପ୍ରମାଣପତ୍ର ଦାଖଲ ଏବଂ ମାନୁଆଲ ମୋଡରେ ଯାଞ୍ଚ ପ୍ରକ୍ରିୟା କରିଥାଏ। ଏନେଇ ଯୁଗ୍ମ ପରିବହନ କମିସନର (ବୈଷୟିକ) ଦୀପ୍ତି ରଞ୍ଜନ ପାତ୍ର ସୂଚନା ଦେଇଛନ୍ତି।
ଦୀପ୍ତୀ ରଞ୍ଜନ ପାତ୍ରଙ୍କ କହିବାନୁସାରେ, ଏମବିବିଏସ୍ ଡିଗ୍ରୀ କିମ୍ବା ତା’ଠାରୁ ଅଧିକ ଥିବା ଯେକୌଣସି ଡାକ୍ତର ଏହି ପୋର୍ଟାଲରେ ପଞ୍ଜିକରଣ ପାଇଁ ଯୋଗ୍ୟ। ଡାକ୍ତରଙ୍କ ପଞ୍ଜୀକରଣ ସମ୍ପୂର୍ଣ୍ଣ ମାଗଣାରେ ହୋଇଥାଏ। ଏହା ସୁନିଶ୍ଚିତ କରିବ ଯେ କେହି ନକଲି ଡାକ୍ତରୀ ପ୍ରମାଣପତ୍ର ଅପଲୋଡ୍ କରିପାରିବେ ନାହିଁ ଏବଂ ଡ୍ରାଇଭିଂ ଲାଇସେନ୍ସ ପାଇପାରିବେ ନାହିଁ। ସମ୍ପୂର୍ଣ୍ଣ ବ୍ୟବସ୍ଥାକୁ ସ୍ୱଚ୍ଛ କରିବା ପାଇଁ ଏହି ପୋର୍ଟାଲର ଶୁଭାରମ୍ଭ କରାୟାଇଛି, ଯେଉଁଥିରେ ଲାଇସେନ୍ସଧାରୀ ଆବେଦନକାରୀ ବିନା କୌଣସି ଅସୁବିଧାରେ ସିଧାସଳଖ ଡାକ୍ତରୀ ପ୍ରମାଣପତ୍ର ପାଇପାରିବେ।
ଯେଉଁ ଡାକ୍ତରମାନେ ସ୍ୱେଚ୍ଛାକୃତ ଭାବେ ପୋର୍ଟାଲ ଜରିଆରେ ମେଡିକାଲ ସାର୍ଟିଫିକେଟ୍ ପ୍ରଦାନ କରିବେ ସେମାନଙ୍କୁ ଆଇଡି ଏବଂ ପାସଓ୍ୱାର୍ଡ ପ୍ରଦାନ କରାଯିବ। ସେମାନଙ୍କୁ ଆବେଦନକାରୀଙ୍କ ପ୍ରମାଣପତ୍ର ଇଲେକ୍ଟ୍ରୋନିକ୍ ମାଧ୍ୟମରେ ସାରଥୀ ପୋର୍ଟାଲରେ ଅପଲୋଡ୍ କରିବାକୁ ପଡ଼ିବ।
Comments are closed.