ନୂଆଦିଲ୍ଲୀ: ଇଂଲଣ୍ଡ ବିପକ୍ଷ ସିରିଜ ପାଇଁ କେଏଲ ରାହୁଲଙ୍କୁ ବିଶ୍ରାମ ମିଳିବ ନାହିଁ । ପୂର୍ବରୁ ରାହୁଲ ଇଂଲଣ୍ଡ ବିପକ୍ଷ ସିରିଜରେ ବିଶ୍ରାମ ନେବେ ବୋଲି ଖବର ପ୍ରକାଶ ପାଇଥିଲା । ଏପରିକି ବିସିସିଆଇ ମଧ୍ୟ ଏଥିରେ ରାଜି ହେବା ସହ ଚାମ୍ପିୟନ୍ସ ଟ୍ରଫିରେ ତାଙ୍କୁ ଚୟନ କରାଯିବ ବୋଲି ଆଶ୍ୱସ୍ତି ପ୍ରଦାନ କରିଥିଲା । ଏବେ କିନ୍ତୁ ବିସିସିଆଇ ୟୁ ଟର୍ଣ୍ଣ ନେଇଛି । ରାହୁଲଙ୍କୁ ଇଂଲଣ୍ଡ ବିପକ୍ଷ ସିରିଜ ପାଇଁ ଉପସ୍ଥିତ ରହିବାକୁ କୁହାଯାଇଛି । ଚାମ୍ପିୟନ୍ସ ଟ୍ରଫି ପୂର୍ବରୁ ଏହି ସିରିଜ ତାଙ୍କୁ ଭଲ ଅଭ୍ୟାସର ସୁଯୋଗ ଦେବ ବୋଲି ଚୟନ କମିଟି ପକ୍ଷରୁ କୁହାଯାଇଛି । ଟିମ ଇଣ୍ଡିଆ ଚାମ୍ପିୟନ୍ସ ଟ୍ରଫି ପୂର୍ବରୁ ୩ଟି ଦିନିକିଆ ଓ ୫ଟି ଟି୨୦ ମ୍ୟାଚ ଖେଳିବ ।
ଅଷ୍ଟ୍ରେଲିଆ ବିପକ୍ଷ ବର୍ଡର-ଗାଭାସ୍କର ଟ୍ରଫିର ସମସ୍ତ ମ୍ୟାଚରେ ରାହୁଲ ଖେଳିଥିଲେ । ରାହୁଲ ୫ଟି ଟେଷ୍ଟରେ ୩୦.୬୬ ଆଭରେଜରେ ୨୭୬ ରନ କରିଥିଲେ । ଏଥିରେ ୨ଟି ଅର୍ଦ୍ଧଶତକ ସାମିଲ । ରାହୁଲ ବିଜୟ ହଜାରେ ଟ୍ରଫିରେ ମଧ୍ୟ କର୍ଣ୍ଣାଟକ ପକ୍ଷରୁ ଖେଳି ନ ଥିଲେ । ବରୋଦା ବିପକ୍ଷ କ୍ୱାର୍ଟର ଫାଇନାଲ ମ୍ୟାଚରେ ସେ ଖେଳିବେ ବୋଲି ଆଶା କରାଯାଉଥିଲେ ମଧ୍ୟ ରାହୁଲ ଖେଳି ନ ଥିଲେ । ୱାର୍ଲ୍ଡ ଟେଷ୍ଟ ଚାମ୍ପିୟନଶିପ ଫାଇନାଲରେ ଭାରତ ପ୍ରବେଶ ନ କରିପାରିବା ଏବଂ ଅଷ୍ଟ୍ରେଲିଆ ବିପକ୍ଷ ଟେଷ୍ଟ ସିରିଜରେ ଦଳର ପ୍ରଦର୍ଶନ ନେଇ ବିସିସିଆଇ ଆକ୍ସନ ମୋଡରେ ରହିଛି । କେତେକ ସିନିୟର ଖେଳାଳିଙ୍କ ଭାଗ୍ୟ ଏବେ ଚୟନ କମିଟି ହାତରେ ରହିଛି ।