ଦିଲ୍ଲୀ: ଜାମିଆ ମିଲିଆ ଇସଲାମିଆ ଗ୍ରାଉଣ୍ଡରେ ଖେଳାଯାଉଥିବା ରଣଜୀ ଟ୍ରଫି କ୍ରିକେଟ ମ୍ୟାଚରେ ଓଡିଶା ବିପକ୍ଷରେ ଦିଲ୍ଲୀ ପ୍ରଥମ ଇନିଂସ ଅଗ୍ରଣୀ ହାସଲ କରିଛନ୍ତି । ଗ୍ରୁପ ଡିର ଏହି ମୁକାବିଲାରେ ଓଡିଶା ପ୍ରଥମ ଇନିଂସରେ ୪୪୦ ରନ କରିଥିଲା । ଜବାବରେ ଦିଲ୍ଲୀ ୪୫୧ ରନ କରି ୧୧ ରନରେ ଅଗ୍ରଣୀ ରହିଛି । ୟଶ ଢ଼ୁଲ ୧୧୨ ଓ ଜଂଟି ସିଦ୍ଧୁ ୧୦୫ ରନ କରିଥିଲେ । ଦିଲ୍ଲୀ ୪୨୦ ରନରେ ୭ଟି ୱିକେଟ ହରାଇଥିବା ବେଳେ ଓଡିଶା ନିକଟରେ ମ୍ୟାଚକୁ ପ୍ରତ୍ୟାବର୍ତନ କରିବା ପାଇଁ ସୁଯୋଗ ରହିଥିଲା । ମାତ୍ର ସିଦ୍ଧୁଙ୍କ ଚମତ୍କାର ବ୍ୟାଟିଂ ଯୋଗୁ ଓଡିଶା ସଫଳ ହୋଇପାରି ନ ଥିଲା । ଗତକାଲିର ଅସମାପ୍ତ ଇନିଂସ ୧୮୭/୨ରୁ ଦିଲ୍ଲୀ ବ୍ୟାଟିଂ ଆରମ୍ଭ କରିଥିଲା ।
ଲଂଚ ବେଳକୁ ଦିଲ୍ଲୀ ୫ ୱିକେଟ ବିନିମୟରେ ୨୬୬ ରନ କରିଥିଲା । ସେ ସମୟରେ ଓଡିଶା ପଲା ଭାରି ଥିଲା । ଷଷ୍ଠ ୱିକେଟରେ ସିଦ୍ଧୁ ଓ ଖିତିଜ ଶର୍ମା ୧୪୭ ରନ ଯୋଗ କରି ସ୍ଥିତି ସୁଧାରିଥିଲେ । ଜମଳା ଭଜନ ମହାପାତ୍ର ତାଙ୍କ ପଦାର୍ପଣ ପ୍ରଥମ ଶ୍ରେଣୀ ମୁକାବିଲାରେ ୩ଟି ୱିକେଟ ନେଇଥିବା ବେଳେ ବିପ୍ଲବ ସାମନ୍ତରାୟ, ଗୋବିନ୍ଦ ପୋଦ୍ଦାର ଓ ସୁନୀଲ ରାଉଳ ୨ଟି ଲେଖାଏଁ ୱିକେଟ ହାସଲ କରିଥିଲେ । ସୋମବାର ମ୍ୟାଚର ଅନ୍ତିମ ଦିବସ ।
Comments are closed.