ନୂଆ ଜିଲ୍ଲା ମାନ୍ୟତା ପ୍ରସଙ୍ଗରେ ହାଇକୋର୍ଟଙ୍କ ନିଷ୍ପତ୍ତି: ଘେରିଲେ ବିରୋଧୀ, ବ୍ୟାକଫୁଟରେ ଶାସକ ଦଳ

ଭୁବନେଶ୍ୱର: ନୂଆ ଜିଲ୍ଲା ପ୍ରତିଷ୍ଠା ନେଇ ସରକାରଙ୍କ ସାମର୍ଥ୍ୟ ଉପରେ ଓଡ଼ିଶା ହାଇକୋର୍ଟ କଟକଣା ଜାରି କରିବା ପରେ ଶୁକ୍ରବାର ଓଡ଼ିଶାର ରାଜନୈତିକ ଦୃଶ୍ୟପଟ୍ଟ ଦୋହଲି ଯାଇଛି।

ପଦ୍ମପୁରକୁ ଜିଲ୍ଲା ମାନ୍ୟତା ଦେବା ପାଇଁ ରାଜ୍ୟ ସରକାରଙ୍କର ପ୍ରକୃତ ଉଦ୍ଦେଶ୍ୟ ନଥିବା ଅଭିଯୋଗ କରି ବିଜେପି ନେତା ପ୍ରଦୀପ ପୁରୋହିତ ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି। ସରକାରଙ୍କ ପୂର୍ବ ପ୍ରତିଶ୍ରୁତି କେବଳ ଉପ-ନିର୍ବାଚନରେ ଭୋଟରଙ୍କୁ ଭୁଆଁ ବୁଲାଇବା ପାଇଁ ଉଦ୍ଦିଷ୍ଟ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପଦ୍ମପୁରବାସୀଙ୍କୁ ପ୍ରତାରଣା କରିଛନ୍ତି। ଉପନିର୍ବାଚନ ଫଳାଫଳକୁ ପ୍ରଭାବିତ କରିବା ପାଇଁ ପଦ୍ମପୁର ଉପଖଣ୍ଡକୁ ଜିଲ୍ଲା ମାନ୍ୟତାକୁ ଉନ୍ନୀତ କରିବାକୁ ସେ ପ୍ରତିଶ୍ରୁତି ଦେଇଥିଲେ। କିନ୍ତୁ ତାଙ୍କର ଆନ୍ତରିକ ଉଦ୍ଦେଶ୍ୟ ନ ଥିବାରୁ ସେ ଏକ ରିଟ୍ ପିଟିସନ୍ ଦାଖଲ କରିବା ପାଇଁ ଓକିଲମାନଙ୍କୁ ନିଯୁକ୍ତ କରିଥିଲେ, ଯାହାଫଳରେ କୋର୍ଟରୁ ସ୍ଥଗିତାଦେଶ ମିଳିଥିଲା ବୋଲି ପୁରୋହିତ କହିଛନ୍ତି।

ବିଜୁବାବୁ ୧୭ଟି ନୂଆ ଜିଲ୍ଲା ଗଠନ ଘୋଷଣା କରି ଓଡ଼ିଶାରେ ମୋଟ୍ ୩୦ଟି ଜିଲ୍ଲାକୁ ନେଇଯିବା ବେଳେ ହାଇକୋର୍ଟ କାହିଁକି ଏଥିରେ ହସ୍ତକ୍ଷେପ କଲେ ନାହିଁ ବୋଲି ପ୍ରଦୀପ ପୁରୋହିତ ପ୍ରଶ୍ନ କରିଛନ୍ତି।

କଂଗ୍ରେସ ମଧ୍ୟ ସମାଲୋଚନାର ସ୍ୱରରେ ସାମିଲ ହୋଇଛି। ରାଜ୍ୟ ସଭାପତି ଶରତ ପଟ୍ଟନାୟକ ଜୋର ଦେଇ କହିଥିଲେ ଯେ ୨୦୨୪ ନିର୍ବାଚନରେ ଏହି ବିଶ୍ୱାସଘାତକତା ପାଇଁ ଓଡ଼ିଶାବାସୀ ସରକାରଙ୍କୁ ଉତ୍ତରଦାୟୀ କରିବେ।

ନୂଆ ଜିଲ୍ଲା ଗଠନ ମନମୁଖୀ ହୋଇପାରିବ ନାହିଁ ଏବଂ ନିର୍ଦ୍ଦିଷ୍ଟ ନିୟମ ଓ ମାନଦଣ୍ଡକୁ ପାଳନ କରିବା ଆବଶ୍ୟକ ବୋଲି ଶରତ ପଟ୍ଟନାୟକ ଗୁରୁତ୍ୱାରୋପ କରିଥିଲେ। ମିଥ୍ୟା ପ୍ରତିଶୃତି ଦେଇ ବିଜେଡ଼ି ବିଜେପୁର ଉପ-ନିର୍ବାଚନ ଜିତିବା ସହ ଦୀର୍ଘ ୨୪ ବର୍ଷ ଧରି ପ୍ରତାରଣା ପୂର୍ବକ କ୍ଷମତାରେ ରହିଆସିଛି ବୋଲି ସେ ଅଭିଯୋଗ କରିଛନ୍ତି।

ବିଜେଡି ବିଧାୟକ ପ୍ରଶାନ୍ତ କୁମାର ମୁଦୁଲି କହିଛନ୍ତି ଯେ ସରକାର ଏହି ରାୟକୁ ସମ୍ମାନ ଦେଉଛନ୍ତି ଏବଂ ସାମ୍ବିଧାନିକ ନିୟମକୁ ପାଳନ କରିବାର ଆବଶ୍ୟକତାକୁ ବୁଝୁଛନ୍ତି। ଲୋକଙ୍କ ଦାବି ପୂରଣ ଦିଗରେ ସରକାରଙ୍କ ପ୍ରତିବଦ୍ଧତା ଦୃଢ଼ ରହିଛି ଏବଂ ଯଥାସମୟରେ ଉପଯୁକ୍ତ ପଦକ୍ଷେପ ନିଆଯିବ ବୋଲି ସେ ଆଶ୍ୱାସନା ଦେଇଛନ୍ତି।

ସେପଟେ ଓଡ଼ିଶା ହାଇକୋର୍ଟଙ୍କ ଏହି ରାୟ ପରେ ଜିଲ୍ଲା ଗଠନରେ ଥିବା ମାନଦଣ୍ଡ ଓ ପ୍ରକ୍ରିୟାକୁ ନେଇ ଚର୍ଚ୍ଚା ଜୋର ଧରିଛି। ହାଇକୋର୍ଟଙ୍କ ବିନା ଅନୁମତିରେ ଜିଲ୍ଲା ପୁନର୍ଗଠନ ନେଇ ଚୂଡାନ୍ତ ନିଷ୍ପତି ନେବା ଉପରେ କୋର୍ଟ ନିର୍ଦ୍ଦେଶ ଦେଇଛନ୍ତି।