ଭୁବନେଶ୍ୱର: ଓଡିଶା ସୂଚନା କମିଶନ ଲାଞ୍ଚ ଅଭିଯୋଗରେ ଜଡିତ ଜଣେ ଆରଟିଆଇ ଆବେଦନକାରୀଙ୍କ ବିଷୟରେ ତଦନ୍ତ କରିବାକୁ ପୋଲିସ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି।
ଏହି ସମ୍ପର୍କରେ କମିଶନ ପକ୍ଷରୁ ରେଜିଷ୍ଟ୍ରାର ଉପଯୁକ୍ତ ତଦନ୍ତ ପାଇଁ ଓଡିଶା ପୋଲିସ ମହାନିର୍ଦ୍ଦେଶକଙ୍କୁ ଏକ ପତ୍ର ଲେଖିଛନ୍ତି।
ସୂଚନାଯୋଗ୍ୟ, କମିଶନ ସମ୍ପ୍ରତି ଭିଡିଓ କ୍ଲିପ୍ ସହିତ ଏକ ଅଭିଯୋଗ ପାଇଛନ୍ତି। ଏଥିରେ ବଲାଙ୍ଗୀର ଜିଲ୍ଲାର ଟଙ୍କଧର ସାହୁ ନାମକ ଜଣେ ଆରଟିଆଇ ଆବେଦନକାରୀ ତାଙ୍କର ଆରଟିଆଇ ଅଭିଯୋଗ ପ୍ରତ୍ୟାହାର କରିବା ପାଇଁ ଜନ ସୂଚନା ଅଧିକାରୀ (ପିଆଇଓ)ଙ୍କ ଠାରୁ ବେଆଇନ ଅର୍ଥ ଦାବି କରୁଥିବା ଦେଖାଯାଇଛି। ରେକର୍ଡ ଯାଞ୍ଚ କରିବା ପରେ ଜଣାଯାଇଛି ଯେ ଉକ୍ତ ଆବେଦନକାରୀ ବିଭିନ୍ନ ସରକାରୀ ବିଭାଗ ବିରୁଦ୍ଧରେ ଶହ ଶହ ଆରଟିଆଇ ଆବେଦନ ଦାଖଲ କରିଛନ୍ତି।
ଯାଞ୍ଚରୁ ଜଣାପଡିଛି ଯେ ଆବେଦନକାରୀ ପ୍ରାୟତଃ ଭୁବନେଶ୍ୱରରେ ଡେରା ପକାଇ ଓଡ଼ିଶା ସୂଚନା କମିଶନଙ୍କ ସମ୍ମୁଖରେ ଶୁଣାଣିରେ ଯୋଗ ଦେଉଥିବା ପିଆଇଓ ଏବଂ ପ୍ରଥମ ଆପିଲେଟ୍ କର୍ତ୍ତୃପକ୍ଷଙ୍କଠାରୁ ଲାଞ୍ଚ ଦାବି କରୁଥିଲେ। ଅଭିଯୋଗ ହୋଇଥିଲା ଯେ ସେ ଶୁଣାଣି ସମୟରେ ମାମଲାକୁ ସ୍ଥଗିତ ରଖିବା ଏବଂ ଅବୈଧ ଲାଭ ପାଇବା ପରେ ମାମଲାଗୁଡ଼ିକୁ ପ୍ରତ୍ୟାହାର କରିବାର ଏକ ପଦ୍ଧତି ଗ୍ରହଣ କରିଥିଲେ।
ଏହି ମାମଲାକୁ କମିଶନର ପୂର୍ଣ୍ଣାଙ୍ଗ ଖଣ୍ଡପୀଠଙ୍କ ସମ୍ମୁଖରେ ରଖା ଯାଇଥିଲା। ଏହାର ବିଚାର ପରେ ଭିଡିଓ କ୍ଲିପ୍ ଏବଂ ସମ୍ପର୍କିତ ସାମଗ୍ରୀ ସହିତ ମାମଲାକୁ ତଦନ୍ତ ପାଇଁ ପୋଲିସ କର୍ତ୍ତୃପକ୍ଷଙ୍କ ନିକଟକୁ ପଠାଇବାକୁ କମିଶନଙ୍କ ପକ୍ଷରୁ ନିଷ୍ପତ୍ତି ନିଆଯାଇଥିଲା। କମିଶନ ମଧ୍ୟ ଉକ୍ତ ଆବେଦନକାରୀଙ୍କ ଦ୍ୱାରା ଦାଖଲ କରାଯାଇଥିବା ସମସ୍ତ ମାମଲାକୁ ପୋଲିସ ତଦନ୍ତ ସମାପ୍ତ ନହେବା ପର୍ଯ୍ୟନ୍ତ ସ୍ଥଗିତ ରଖିବାକୁ ନିଷ୍ପତ୍ତି ନେଇଛି।