ବିରଳ ଗୋଧି ମାଂସ ରାନ୍ଧି ଖାଇବା ଅଭିଯୋଗରେ ୟୁଟ୍ୟୁବର ଗିରଫ 

ଭୁବନେଶ୍ୱର: ଏକ ବିରଳ ପ୍ରଜାତିର ବଡ ଗୋଧିର ମାଂସ ରାନ୍ଧି ଖାଇବା ଏବଂ ଏହାର ଏକ ଭିଡିଓ ସୋସିଆଲ ମିଡିଆରେ ସେୟାର କରିବା ଅଭିଯୋଗରେ ମୟୂରଭଞ୍ଜ ଜିଲ୍ଲାର ଜଣେ ୟୁଟ୍ୟୁବରଙ୍କୁ ଗିରଫ କରାଯାଇଛି।

ଅଭିଯୁକ୍ତଙ୍କୁ ଅସନବଣୀ ଗ୍ରାମର ବାସିନ୍ଦା ରୂପ ନାୟକ ବୋଲି ଚିହ୍ନଟ କରାଯାଇଛି।

ସୂଚନା ଅନୁଯାୟୀ, ସେ ଭଦ୍ରକରୁ ଫେରିବା ସମୟରେ ବନ୍ତ ନିକଟ ରାସ୍ତା କଡ଼ରେ ଏକ ମୃତ ଗୋଧି ପାଇଥିଲେ। ଯାହାକୁ ଘରକୁ ନେଇ ସେ ରାନ୍ଧିବା ସହ ଏହି ପ୍ରକ୍ରିୟାର ଏକ ଭିଡିଓ ଫେସବୁକ୍ ଏବଂ ୟୁଟ୍ୟୁବରେ ପୋଷ୍ଟ କରିଥିଲେ।

ତେବେ ଭିଡିଓଟି ଭାଇରାଲ ହେବା ପରେ ବନ ବିଭାଗ ତଦନ୍ତ ଆରମ୍ଭ କରି ସ୍ୱତଃ ଏକ ମାମଲା ରୁଜୁ କରିଥିଲା। ପରେ ୟୁଟ୍ୟୁବରଙ୍କୁ ହେପାଜତକୁ ନିଆଯାଇ ପଚରାଉଚରା କରାଯାଇଥିଲା। ପରବର୍ତ୍ତୀ ସମୟରେ ବନ୍ୟପ୍ରାଣୀ ସୁରକ୍ଷା ଆଇନ, 1972 ର ଧାରା 2(16)(a)(b), 9, 39(1)(b), 48(a)(b) ଏବଂ 50(1) ସମେତ ବିଭିନ୍ନ ଧାରା ଅନୁଯାୟୀ ଗିରଫ କରାଯାଇଥିଲା।