ଖାକି ପିନ୍ଧିବା ସହିତ ସିନେମା ପ୍ରତି ଥିଲା ଦୁର୍ବଳତା, ଗିରଫ ଥାନାଧିକାରୀ ସୁଶାନ୍ତଙ୍କୁ ନେଇ ବିଜେପି ଉଠାଇଲା ପ୍ରଶ୍ନ

ଭୁବନେଶ୍ୱର: ବୈପାରିଗୁଡା ଥାନା ଆଇଆଇସି ସୁଶାନ୍ତ ଶତପଥୀଙ୍କ ନିକଟରୁ ୩୭ ଲକ୍ଷ ଟଙ୍କାର ବେଆଇନ ଟଙ୍କା ଜବତ ହେବା ପରେ ଗିରଫ ଅଧିକାରୀଙ୍କ ଓଲିଉଡ ସହ ସମ୍ପର୍କ ଥିବା ସ୍ପଷ୍ଟ ହୋଇଛି। ସୂଚନା ଅନୁସାରେ ସୁଶାନ୍ତ ଶତପଥୀ ଅନେକ ଓଡ଼ିଆ ଚଳଚ୍ଚିତ୍ର ଓ ଟିଭି ଧାରାବାହିକରେ ଅଭିନୟ କରିଛନ୍ତି। ତେବେ ମନୋରଞ୍ଜନ ଶିଳ୍ପରେ ତାଙ୍କର ସମ୍ପୃକ୍ତି କେବଳ ବ୍ୟକ୍ତିଗତ ସ୍ୱାର୍ଥ ଥିଲା ନା ସେ ଚଳଚ୍ଚିତ୍ର ପ୍ରକଳ୍ପରେ ବେଆଇନ ପାଣ୍ଠି ବିନିଯୋଗ କରିଥିଲେ ତାହା ଅସ୍ପଷ୍ଟ ରହିଛି।

ଓଲିଉଡ ଲିଙ୍କ୍ ବ୍ୟତୀତ ଆଇଆଇସି ପଦବୀରେ ଅବସ୍ଥାପିତ ହେବା ପୂର୍ବରୁ ସୁଶାନ୍ତ ଶତପଥୀ ନିଲମ୍ବନର ସମ୍ମୁଖୀନ ହୋଇଥିଲେ ବୋଲି ଜଣାପଡିଛି। ତିନିଟି ଜିଲ୍ଲାର ଏସପିଙ୍କ ଆଦେଶକ୍ରମେ ତାଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ଆରମ୍ଭ ହୋଇଥିଲା। ସର୍ଭିସ ରେକର୍ଡରେ ସମସ୍ୟା ଥିଲେ ମଧ୍ୟ ସେ ୨୦୨୩ରେ ଆଇଆଇସି ଭାବେ ପଦୋନ୍ନତି ପାଇଥିଲେ।

ସୁଶାନ୍ତ ଶତପଥୀଙ୍କ ବିରୋଧରେ ୨୦୧୨ରେ ଜଗତସିଂହପୁର ଏସପି ବିଭାଗୀୟ କାର୍ଯ୍ୟାନୁଷ୍ଠାନ ଆରମ୍ଭ କରିଥିବା ବେଳେ ୨୦୧୮ରେ କଟକ ଏସପି ଅନୁରୂପ ନିର୍ଦ୍ଦେଶ ଜାରି କରିଥିଲେ। ୨୦୨୦ରେ ରାୟଗଡା ଏସପି ସୁଶାନ୍ତ ଶତପଥୀଙ୍କୁ ତାଗିଦ କରିବା ପରେ ତାଙ୍କୁ ନିଲମ୍ବିତ କରିବା ପରେ ଆଗକୁ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯାଇଥିଲା।

ଏହି ବିବାଦ ସତ୍ତ୍ୱେ ସୁଶାନ୍ତ ଶତପଥୀ କିପରି ଏକ ପଦୋନ୍ନତି ପାଇଲେ, ପ୍ରଭାବଶାଳୀ ସମର୍ଥନ ଥିବା ସନ୍ଦେହରେ ପ୍ରଶ୍ନ ଉଠୁଛି। ସୁଶାନ୍ତ ଶତପଥୀଙ୍କ ସହ ଜଡିତ ଥିବା କଳାଧନର ବେଆଇନ କାରବାରରେ କିଛି ମନ୍ତ୍ରୀ ଓ ବିଜୁ ଜନତା ଦଳର ବିଧାୟକଙ୍କ ସମ୍ପୃକ୍ତି ଥିବା ଅଭିଯୋଗ କରି ଭାରତୀୟ ଜନତା ପାର୍ଟି ଓଡ଼ିଶା ସରକାରଙ୍କ ଉପରେ ଅଙ୍ଗୁଳି ଉଠାଇଛି।

ଏକ ସାମ୍ବାଦିକ ସମ୍ମିଳନୀରେ ବିଜେପି ମୁଖପାତ୍ର ଅନୀଲ ବିଶ୍ୱାଳ ସୁଶାନ୍ତ ଶତପଥୀଙ୍କ ନବୀନ ନିବାସରେ ପୋଷ୍ଟିଂ ଓ ବିଭାଗୀୟ କାର୍ଯ୍ୟାନୁଷ୍ଠାନ ଚାଲିଥିବା ସତ୍ତ୍ୱେ ତାଙ୍କର ପଦୋନ୍ନତିକୁ ନେଇ ପ୍ରଶ୍ନ ଉଠାଇଛନ୍ତି। ସେହିପରି ଚାକିରି ଦୁର୍ନୀତିର ମାଷ୍ଟର ମାଇଣ୍ଡ ବିରଞ୍ଚି ସାହୁଙ୍କ ସହ ସୁଶାନ୍ତ ଶତପଥୀଙ୍କ ସମ୍ପର୍କ ଏବଂ ଜଣେ ପୂର୍ବତନ ମନ୍ତ୍ରୀ ଓ ବିଜେଡି ବିଧାୟକଙ୍କ ସହଯୋଗରେ ଗଞ୍ଜେଇ ଚୋରା ଚାଲାଣରେ ସୁଶାନ୍ତ ଶତପଥୀଙ୍କ ସମ୍ପୃକ୍ତି ନେଇ ବିଜେପି ଉଦବେଗ ପ୍ରକାଶ କରିଛି।

ତେବେ ସୁଶାନ୍ତ ଶତପଥୀଙ୍କ ଓଲିଉଡ ଲିଙ୍କ୍ ସମ୍ପର୍କରେ ଅନୀଲ ବିଶ୍ୱାଳ ବିଜେଡିର ଜଣେ ସାଂସଦଙ୍କ ଓଡ଼ିଆ ସିନେମାରେ ତାଙ୍କ ଯୋଗଦାନକୁ ନେଇ ପ୍ରଶ୍ନ ଉଠାଇଛନ୍ତି।

ସୁଶାନ୍ତ ଶତପଥୀଙ୍କ ସରକାରୀ ବାସଭବନ, ବୈପାରିଗୁଡ଼ାସ୍ଥିତ ଅଫିସ୍ ଚାମ୍ବର, କଟକସ୍ଥିତ କ୍ୱାର୍ଟର୍ସରେ ଚଢ଼ଉ ବେଳେ ଜବତ ହୋଇଥିବା ୩୭ ଲକ୍ଷ ଟଙ୍କାର ଉତ୍ସ ସମ୍ପର୍କରେ ସ୍ପଷ୍ଟ ନକରିବାରୁ ଭିଜିଲାନ୍ସ ତାଙ୍କୁ ଗିରଫ କରିଛି। ସେ ଏବେ ବୈପାରିଗୁଡା ଜେଲରେ ଅଛନ୍ତି। ଭିଜିଲାନ୍ସ ହାତରେ ଏହି ଟଙ୍କା କେଉଁଠୁ ଆସିଲା ତାହା ସ୍ପଷ୍ଟ ହୋଇନଥିବା ବେଳେ ସୁଶାନ୍ତ ଶତପଥୀ ଆଇଆଇସି ଭାବେ କାର୍ଯ୍ୟ କରୁଥିବା କୋରାପୁଟ ଓ ମାଲକାନଗିରି ଜିଲ୍ଲାରେ ଗଞ୍ଜେଇ ଚୋରା ଚାଲାଣ ସହ ଏହାର ସମ୍ଭାବ୍ୟ ସମ୍ପର୍କ ନେଇ ସନ୍ଦେହ ସୃଷ୍ଟି ହୋଇଛି।