ଭୁବନେଶ୍ୱର: ଶୁକ୍ରବାର ସଂଧ୍ୟାରେ ଘଟିଥିବା ବାହାନଗା ଟ୍ରେନ୍ ଦୁର୍ଘଟଣାରେ ଏବେ ବି ଶତାଧିକ ଶବର ଚିହ୍ନଟ ହୋଇପାରି ନାହିଁ। ଏହାକୁ ଦୃଷ୍ଟିରେ ରଖି ଭୁବନେଶ୍ୱର ସତ୍ୟନଗରସ୍ଥିତ ବିଏମସି କାର୍ଯ୍ୟାଳୟରେ ଏକ ସ୍ୱତନ୍ତ୍ର ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଖୋଲାଯାଇଛି। ଏହି କଣ୍ଟ୍ରୋଲ ରୁମ୍ ଆବଶ୍ୟକତା ଅନୁଯାୟୀ ଡାକ୍ତରଖାନା କିମ୍ବା ଶବାଗାରକୁ ନିର୍ଦ୍ଦେଶ ଦେଇ ଜୀବିତ ବ୍ୟକ୍ତିଙ୍କୁ ଖୋଜିବାରେ ସମ୍ପର୍କୀୟମାନଙ୍କୁ ସହାୟତା କରିବା ପାଇଁ ଲକ୍ଷ୍ୟ ରଖିଛି।
ଦୁର୍ଘଟଣା ପରେ ତାମିଲନାଡୁର ଦୁଇ ମନ୍ତ୍ରୀ ଓଡ଼ିଶା ଗସ୍ତରେ ରହିଛନ୍ତି। ଦୁଇ ମନ୍ତ୍ରୀ ବିଏମସିର ଏହି କଣ୍ଟ୍ରୋଲ ରୁମକୁ ବୁଲି ଦେଖିଛନ୍ତି। ଏହି ଦୁଇ ମନ୍ତ୍ରୀଙ୍କ ମଧ୍ୟରେ ରହିଛନ୍ତି ତାମିଲନାଡୁ ମୁଖ୍ୟମନ୍ତ୍ରୀ ଏମ୍ କେ ଷ୍ଟାଲିନଙ୍କ ପୁଅ ଉଦୟନାଥ ଷ୍ଟାଲିନ।
ଯେଉଁମାନେ ସହାୟତାର ଆବଶ୍ୟକତା ରହିଛି ସେମାନେ ୧୮୦୦୩୪୫୦୦୬୧/୧୯୨୯ ଟୋଲ୍ ଫ୍ରି ନମ୍ବରରେ ମଧ୍ୟ ଯୋଗାଯୋଗ କରିପାରିବେ ବୋଲି ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ଟୁଇଟ୍ ମାଧ୍ୟମରେ ସୂଚନା ଦିଆଯାଇଛି।
କଟକ ରେଳ ଷ୍ଟେସନ, କଟକ ବସଷ୍ଟାଣ୍ଡ, ଏସସିବି ହସ୍ପିଟାଲ, ଭୁବନେଶ୍ୱର ରେଳ ଷ୍ଟେସନ, ବରମୁଣ୍ଡା ବସଷ୍ଟାଣ୍ଡ, ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ସମେତ ବିଭିନ୍ନ ପ୍ରବେଶ ପଥରେ ହେଲ୍ପ ଡେସ୍କ ଖୋଲାଯାଇଛି।
ଆଜି ସକାଳେ ୫୦ଟି ଆମ୍ବୁଲାନ୍ସରେ ୧୦୦ ଜଣ ଯାତ୍ରୀଙ୍କ ମୃତଦେହକୁ ଏମ୍ସ-ଭୁବନେଶ୍ୱରକୁ ଅଣାଯାଇଛି। ଏହି ଶବ ଗୁଡିକୁ ଏମ୍ସ ଭୁବନେଶ୍ୱରର ଶବ ଗୃହରେ ରଖାଯାଇଛି। ସୂତ୍ରରୁ ଜଣାପଡିଛି ଯେ ଏବେ ପାଖାପାଖି ୫୫ଟି ମୃତଦେହ ଚିହ୍ନଟ କରାଯାଇଛି ଏବଂ ଆବଶ୍ୟକୀୟ ଶବ ବ୍ୟବଚ୍ଛେଦ ପରେ ସେମାନଙ୍କ ପରିବାର ସଦସ୍ୟଙ୍କୁ ହସ୍ତାନ୍ତର କରାଯାଇଛି।
ଭଦ୍ରକ ଓ ବାଲେଶ୍ୱରକୁ ଟ୍ରେନ୍ ଯୋଗାଯୋଗ ବ୍ୟାହତ ହେବାରୁ ଓଡ଼ିଶା ସରକାର ପ୍ରାୟ ୧୬୦ଟି ମୃତଦେହ ଭୁବନେଶ୍ୱର ଆଣିବା ପାଇଁ ପଦକ୍ଷେପ ନେଇଥିଲେ। ମୁଖ୍ୟ ଶାସନ ସଚିବ ପ୍ରଦୀପ ଜେନା କହିଛନ୍ତି ଯେ, ଅଚିହ୍ନା ମୃତଦେହକୁ ୪୨ ଘଣ୍ଟା ଯାଏ ସୁରକ୍ଷିତ ରଖାଯିବ।
ଚିହ୍ନଟ ପ୍ରୟାସରେ ସହାୟତା କରିବା ପାଇଁ, ମୃତକ ବ୍ୟକ୍ତିବିଶେଷ ଏବଂ ବିଭିନ୍ନ ଡାକ୍ତରଖାନାରେ ଚିକିତ୍ସିତ ହେଉଥିବା ବ୍ୟକ୍ତିଙ୍କର ଏକ ତାଲିକା ତିନୋଟି ଓ୍ୱେବସାଇଟ srcodisha.nic.in, bmc.gov.in, ଓ osdma.orରେ ଅପଲୋଡ କରାଯାଇଛି।