ନୂଆଦିଲ୍ଲୀ: ଦେଶର ଅପରାଧିକ ନ୍ୟାୟ ବ୍ୟବସ୍ଥାର ସୁଧାର ପାଇଁ ଲୋକସଭାରେ ଉପସ୍ଥାପିତ ହୋଇଥିବା କେନ୍ଦ୍ରର ତିନୋଟି ବିଲ୍ ଉପରେ ପୂର୍ବତନ କେନ୍ଦ୍ର ମନ୍ତ୍ରୀ ତଥା କଂଗ୍ରେସ ନେତା ପି ଚିଦାମ୍ବରମ୍ ମନ୍ତବ୍ୟ ଦେଇଛନ୍ତି। ପୁଡୁକୋଟ୍ଟଇରେ ସାମ୍ବାଦିକଙ୍କ ସହ ଏକ ସାକ୍ଷାତକାରରେ ଚିଦାମ୍ବରମ୍ ବିଜେପି ନେତୃତ୍ୱାଧୀନ କେନ୍ଦ୍ର ସରକାରଙ୍କ ଉକ୍ତ ବିଲରେ ହିନ୍ଦୀ ନାମ ଦେବା ପଛରେ ଥିବା ଯୁକ୍ତି ଉପରେ ପ୍ରଶ୍ନ କରିଛନ୍ତି।
ଏକ ରିପୋର୍ଟ ଅନୁଯାୟୀ ସେ ଗଣମାଧ୍ୟମକୁ କହିଛନ୍ତି, “ମୁଁ କହୁ ନାହିଁ ଯେ (ବିଲ) ହିନ୍ଦୀ ନାମ ଦିଆଯିବା ଉଚିତ ନୁହେଁ। ଯେତେବେଳେ ଇଂରାଜୀ ବ୍ୟବହୃତ ହୁଏ, ସେତେବେଳେ ଏହାକୁ ଏକ ଇଂରାଜୀ ନାମ ଦିଆଯାଇପାରେ। ଯଦି ହିନ୍ଦୀ ବ୍ୟବହୃତ ହୁଏ ତେବେ ଏହାର ନାମ ହିନ୍ଦୀ ହୋଇପାରେ। ଯେତେବେଳେ ଆଇନ ପ୍ରସ୍ତୁତ ହୁଏ ସେତେବେଳେ ଏହା ଇଂରାଜୀରେ କରାଯାଇଥାଏ ଏବଂ ପରେ ଏହା ହିନ୍ଦୀରେ ଅନୁବାଦ କରାଯାଇଥାଏ। କିନ୍ତୁ ସେମାନେ ବିଲର ନିୟମ / ବ୍ୟବସ୍ଥାଗୁଡ଼ିକୁ ଇଂରାଜୀରେ ପ୍ରସ୍ତୁତ କରି ଏହାକୁ ହିନ୍ଦୀ ନାମ ଦେଇଛନ୍ତି। ଏହାକୁ ଉଚ୍ଚାରଣ କରିବା ମଧ୍ୟ କଷ୍ଟକର।”
ଭାରତୀୟ ଦଣ୍ଡବିଧି ସଂହିତା ୧୮୬୦ ବଦଳରେ ଭାରତୀୟ ନ୍ୟାୟ ସଂହିତା ବିଧେୟକ ୨୦୨୩, କ୍ରିମିନାଲ ପ୍ରୋସିଜିଓର କୋଡ୍ ୧୮୯୮ ବଦଳରେ ଭାରତୀୟ ନାଗରିକ ସୁରକ୍ଷା ସଂହିତା ବିଧେୟକ ୨୦୨୩ ଏବଂ ଭାରତୀୟ ପ୍ରମାଣ ଆଇନ ୧୮୭୨ ବଦଳରେ ଭାରତୀୟ ସାକ୍ଷୀ ବିଧେୟକ ୨୦୨୩ ଲାଗୁ ହୋଇଛି। କଂଗ୍ରେସର ବରିଷ୍ଠ ନେତା ଏହା ମଧ୍ୟ ସୂଚାଇ ଦେଇଛନ୍ତି ଯେ ଅଧିକାଂଶ ସମୟରେ ଇଂରାଜୀ ଶବ୍ଦ ହିନ୍ଦୀ ତୁଳନାରେ କୋର୍ଟରେ ବ୍ୟବହୃତ ହୁଏ ଏବଂ ହିନ୍ଦୀ ଶବ୍ଦ ବ୍ୟବହାର ହେଲେ ମଧ୍ୟ ବିଚାରପତିମାନେ ସେମାନଙ୍କର ଇଂରାଜୀ ଅନୁବାଦ ମାଗନ୍ତି। ଏଥି ସହିତ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଲୋକସଭାରେ ଉପସ୍ଥାପିତ ହେବା ପରେ ଏହି ତିନୋଟି ବିଲ୍ ଷ୍ଟାଣ୍ଡିଂ କମିଟି ନିକଟକୁ ପଠାଯାଇଛି।
Comments are closed.