ଗାଲେ: ଭାରତ ଓ ଶ୍ରୀଲଙ୍କା ମଧ୍ୟରେ ଏଠାରେ ଟେଷ୍ଟ ସିରିଜ ଆରମ୍ଭ ହୋଇଛି । ଶ୍ରୀଲଙ୍କା ବିପକ୍ଷ ଗାଲେ ଟେଷ୍ଟର ପ୍ରଥମ ଦିନ ଖରାପ ଆଲୋକ ଯୋଗୁଁ ନିର୍ଦ୍ଧାରିତ ସମୟ ପୂର୍ବରୁ ଶେଷ ହୋଇଛି । ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ଭାରତ ପ୍ରଥମ ଦିବସ ଖେଳ ଶେଷ ସୁଦ୍ଧା ୨ ୱିକେଟ୍ ହରାଇ ୨୮୮ ରନ୍ ସଂଗ୍ରହ କରିଛି । ନିଜ ଟେଷ୍ଟ କ୍ୟାରିୟରର ପ୍ରଥମ ଶତକ ହାସଲ କରିଥିବା ଦେବଦତ୍ତ ପାଡିକଲ ୧୭୮ ବଲ୍ରୁ ୧୨ଟି ଚୌକା ଓ ୧ଟି ଛକା ସହାୟତାରେ ୧୩୧ ରନ୍ କରି ଅପରାଜିତ ଅଛନ୍ତି । ପାଡିକଲ ଶ୍ରୀଲଙ୍କା ବିପକ୍ଷ ଗାଲେ ଟେଷ୍ଟରେ ନିଜର ପ୍ରଥମ ଟେଷ୍ଟ ଶତକ ହାସଲ କରି କ୍ରିକେଟ୍ ଇତିହାସରେ ନୂଆ ରେକର୍ଡ ସୃଷ୍ଟି କରିଛନ୍ତି ।
୧୫ ଅଗଷ୍ଟରେ ଅନ୍ତର୍ଜାତୀୟ ଟେଷ୍ଟ କ୍ରିକେଟରେ ଶତକ ମାରିବାରେ ସେ ଭାରତର ପ୍ରଥମ ବ୍ୟାଟର ହୋଇଛନ୍ତି । ତାଙ୍କ ସହ ଋଷଭ ପନ୍ତ ୨୭ ରନ୍ କରି କ୍ରିଜ୍ରେ ଅଛନ୍ତି । ଦୁହେଁ ତୃତୀୟ ୱିକେଟ୍ ପାଇଁ ଅପରାଜିତ ୫୨ ରନ୍ର ଭାଗିଦାରୀ କରିଛନ୍ତି । ପାଡିକଲଙ୍କ ସହ ଦ୍ୱିତୀୟ ୱିକେଟ୍ ପାଇଁ ୧୫୦ ରନ୍ର ଭାଗିଦାରୀ କରିବା ପରେ ମାଂସପେଶୀ ସମସ୍ୟା ଯୋଗୁ କେଏଲ୍ ରାହୁଲ ୭୭ ରନରେ ରିଟାୟର ହର୍ଟ ହୋଇଥିଲେ । ଲଞ୍ଚ ପୂର୍ବରୁ ବର୍ଷା ଯୋଗୁଁ ଦୁଇଥର ଖେଳ ସ୍ଥଗିତ ରହିଥିଲା । ଶେଷରେ ଖରାପ ଆଲୋକ ଯୋଗୁଁ ପ୍ରଥମ ଦିନର ଖେଳକୁ ଶୀଘ୍ର ଶେଷ ଘୋଷଣା କରାଯାଇଥିଲା ।