ଭୁବନେଶ୍ୱର: ଓଡ଼ିଶାରେ ଲୋକସଭା ଓ ବିଧାନସଭା ନିର୍ବାଚନ ପୂର୍ବରୁ ରାଜ୍ୟର ଦୁଇ ପ୍ରମୁଖ ଦଳ ବିଜେପି ଓ ବିଜେଡି ମଧ୍ୟରେ ମେଣ୍ଟ ହୋଇପାରେ ବୋଲି ରାଜନୈତିକ ମହଲରେ କଳ୍ପନାଜଳ୍ପନା ଜୋର ଧରିଛି। ଗତବର୍ଷ ଆଇଏଏସ ଚାକିରିରୁ ସ୍ୱେଚ୍ଛାକୃତ ଅବସର ନେଇ ବିଜେଡିରେ ଯୋଗ ଦେଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପୂର୍ବତନ ସଚିବ ଭିକେ ପାଣ୍ଡିଆନଙ୍କ ବୟାନକୁ ନେଇ ଏହି ଚର୍ଚ୍ଚା ଜୋର ଧରିଛି।
ନବୀନଙ୍କ ପରେ ବିଜେଡିର ଦ୍ୱିତୀୟ ପ୍ରଭାବଶାଳୀ ବ୍ୟକ୍ତି ଭାବେ ପରିଗଣିତ ପାଣ୍ଡିଆନ ଖବର ସରବରାହ ସଂସ୍ଥା ଏଏନଆଇର ସମ୍ପାଦକ ସ୍ମିତା ପ୍ରକାଶଙ୍କୁ ସାକ୍ଷତକାର ଦେଇ କହିଛନ୍ତି ଯେ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀ ମୋଦୀ ପରସ୍ପର ପ୍ରତି ‘ସମ୍ପର୍କ’ ଏବଂ ‘ଅତ୍ୟନ୍ତ ସମ୍ମାନ’ ରଖିଛନ୍ତି। ସେ କହିଛନ୍ତି ଯେ ସେମାନେ “ଦୁଇ ବନ୍ଧୁ” ପରି ସାକ୍ଷାତ କରନ୍ତି ଏବଂ “ସଂଘୀୟ ବ୍ୟବସ୍ଥା” ପ୍ରତି ଉଭୟଙ୍କର ଏକ ସମାନ ପ୍ରତିବଦ୍ଧତା ଅଛି। ସେ ଆହୁରି ମଧ୍ୟ କହିଛନ୍ତି ଯେ ୨୦୧୪ରେ ମୋଦୀ ପ୍ରଧାନମନ୍ତ୍ରୀ ହେବା ପରେ କେନ୍ଦ୍ର-ରାଜ୍ୟ ସମ୍ପର୍କରେ ଯଥେଷ୍ଟ ଉନ୍ନତି ଘଟିଛି।
ନିକଟରେ ଆଇଆଇଏମ୍-ସମ୍ବଲପୁରର ସ୍ଥାୟୀ କ୍ୟାମ୍ପସ ଉଦଘାଟନ ଅବସରରେ ମୋଦୀ ଓ ନବୀନଙ୍କ ମଧ୍ୟରେ ହୋଇଥିବା ଉଷ୍ମ ପ୍ରଶଂସା ମଧ୍ୟ କଳ୍ପନାଜଳ୍ପନାକୁ ଆହୁରି ବଢ଼ାଇ ଦେଇଛି। ମୋଦୀ ନବୀନଙ୍କୁ ନିଜର ବନ୍ଧୁ ବୋଲି କହିବା ସହ ଭାରତକୁ ଅର୍ଥନୈତିକ ପାୱାର ହାଉସ କହି ମୋଦୀଙ୍କୁ ପ୍ରଶଂସା କରିଛନ୍ତି ନବୀନ।
ଓଡ଼ିଶାର ମୁଖ୍ୟ ବିରୋଧୀ ଦଳ ବିଜେପି। ୨୦୨୨ରେ ମୋଦୀ ରାଜ୍ୟସଭାରେ ନବୀନଙ୍କୁ ପ୍ରଶଂସା କରିଥିଲେ ଯେ ସେ ସଂସ୍କାର ଏବଂ କେନ୍ଦ୍ରୀୟ ଯୋଜନାର କାର୍ଯ୍ୟକାରିତାରେ ନେତୃତ୍ୱ ନେଇଛନ୍ତି। ୨୦୦୦ରୁ ୨୦୦୯ ପର୍ଯ୍ୟନ୍ତ ଓଡ଼ିଶାରେ ବିଜେପିର ମେଣ୍ଟ ସହଯୋଗୀ ତଥା ବାଜପେୟୀ ସରକାରରେ କେନ୍ଦ୍ରମନ୍ତ୍ରୀ ଥିବା ନବୀନ ସିଏଏ ଓ ଜମ୍ମୁ-କଶ୍ମୀରର ସ୍ୱତନ୍ତ୍ର ପାହ୍ୟା ଭଳି ଅଧିକାଂଶ ବିବାଦୀୟ ପ୍ରସଙ୍ଗରେ ମୋଦୀ ସରକାରଙ୍କୁ ସମର୍ଥନ କରିଛନ୍ତି।
ପାଣ୍ଡିଆନ୍ କହିଛନ୍ତି ଯେ ମୋଦୀ ଏବଂ ନବୀନଙ୍କ ବନ୍ଧୁତା ସେହି ଦିନଠାରୁ ଆରମ୍ଭ ହୋଇଛି ଯେତେବେଳେ ମୋଦୀ ଗୁଜୁରାଟର ମୁଖ୍ୟମନ୍ତ୍ରୀ ଥିଲେ।
ବିଜେପି-ବିଜେଡି ମେଣ୍ଟର କଳ୍ପନାଜଳ୍ପନାକୁ କଂଗ୍ରେସ ସାଂସଦ ରାହୁଲ ଗାନ୍ଧୀ ସମାଲୋଚନା କରିଛନ୍ତି । ବୁଧବାର ଭାରତ ଯୋଡ଼ ନ୍ୟାୟ ଯାତ୍ରା ସମୟରେ ଉଭୟ ଦଳ ଓଡ଼ିଶାରେ ‘ଭାଗିଦାରୀ ସରକାର’ ଚଳାଇଥିବା କଥା କହିଥିଲେ ରାହୁଲ ଗାନ୍ଧୀ। ଉଭୟ ଦଳ ଲୋକଙ୍କ ବିକାଶ ଓ କଲ୍ୟାଣ କରିବାରେ ବିଫଳ ହୋଇଛନ୍ତି ବୋଲି ସେ ଅଭିଯୋଗ କରିଛନ୍ତି।
Comments are closed.