ନୂଆଦିଲ୍ଲୀ: ଆଜିର ଯୁଗରେ ସୋସିଆଲ ମିଡିଆ ଆମ ଜୀବନର ଏକ ଅବିଚ୍ଛେଦ୍ୟ ଅଂଶ ହୋଇଗଲାଣି। ଲୋକମାନେ ଦିନର ଅଧିକାଂଶ ସମୟ ଫେସବୁକ, ଇନଷ୍ଟାଗ୍ରାମ, ହ୍ୱାଟ୍ସଆପ, ଟିକଟକ ଓ ଅନ୍ୟାନ୍ୟ ପ୍ଲାଟଫର୍ମରେ ସ୍କ୍ରୋଲିଂ, ଚାଟିଂ କିମ୍ବା ଭିଡିଓ ଦେଖିବାରେ ବିତାଉଛନ୍ତି। କିନ୍ତୁ ଆପଣ ଜାଣନ୍ତି କି, କେଉଁ ଦେଶର ଲୋକମାନେ ସୋସିଆଲ ମିଡିଆରେ ସବୁଠାରୁ ଅଧିକ ସମୟ ବିତାଉଛନ୍ତି? ଏକ ସାମ୍ପ୍ରତିକ ରିପୋର୍ଟ ଅନୁସାରେ, ଅନେକ ଦେଶରେ ଲୋକମାନେ ଦିନକୁ ୩ରୁ ୫ ଘଣ୍ଟା ପର୍ଯ୍ୟନ୍ତ ସୋସିଆଲ ମିଡିଆରେ ବିତାଉଛନ୍ତି। ଆସନ୍ତୁ ଜାଣିବା ଶୀର୍ଷ ଦେଶଗୁଡ଼ିକର ତାଲିକା ଏବଂ ଭାରତର ସ୍ଥିତି।
ଫିଲିପିନ୍ସ
ଫିଲିପିନ୍ସ ହେଉଛି ସୋସିଆଲ ମିଡିଆରେ ସବୁଠାରୁ ଅଧିକ ସମୟ ବିତାଉଥିବା ଦେଶ। ଏଠାରେ ଲୋକମାନେ ଦୈନିକ ହାରାହାରି ୪ ଘଣ୍ଟା ୬୦ ମିନିଟ (ଅର୍ଥାତ୍ ପ୍ରାୟ ୫ ଘଣ୍ଟା) ସୋସିଆଲ ମିଡିଆରେ ସକ୍ରିୟ ରହୁଛନ୍ତି। ଏହାର ଅର୍ଥ ହେଉଛି ଦିନର ଏକ ବଡ଼ ଅଂଶ ଭର୍ଚୁଆଲ ଦୁନିଆରେ ବିତୁଛି।
କୋଲମ୍ବିଆ
ଦ୍ୱିତୀୟ ସ୍ଥାନରେ ରହିଛି କୋଲମ୍ବିଆ, ଯେଉଁଠାରେ ସୋସିଆଲ ମିଡିଆର ବ୍ୟାପକ ବ୍ୟବହାର ହୁଏ। ରିପୋର୍ଟ ଅନୁସାରେ, ଏଠାରେ ଲୋକମାନେ ଦୈନିକ ହାରାହାରି ୩ ଘଣ୍ଟା ୪୬ ମିନିଟ ସୋସିଆଲ ମିଡିଆରେ ବିତାଉଛନ୍ତି। ଏଠାରେ ଗ୍ରାହକମାନେ ବିଶେଷ କରି ଚାଟିଂ ଓ ଭିଡିଓ କଣ୍ଟେଣ୍ଟରେ ଅଧିକ ସମୟ ବିତାଉଛନ୍ତି।
ଦକ୍ଷିଣ ଆଫ୍ରିକା
ଦକ୍ଷିଣ ଆଫ୍ରିକା ସୋସିଆଲ ମିଡିଆ ବ୍ୟବହାରରେ ତୃତୀୟ ସ୍ଥାନରେ ରହିଛି। ଏଠାରେ ଲୋକମାନେ ହାରାହାରି ୩ ଘଣ୍ଟା ୪୩ ମିନିଟ ପ୍ରତିଦିନ ସୋସିଆଲ ମିଡିଆରେ ସକ୍ରିୟ ରହୁଛନ୍ତି। ମନୋରଞ୍ଜନ ଓ ଖବର ଅପଡେଟ୍ ପାଇଁ ଏଠାରେ ସୋସିଆଲ ମିଡିଆ ଅତ୍ୟନ୍ତ ଲୋକପ୍ରିୟ।
ବ୍ରାଜିଲ
ବ୍ରାଜିଲର ଲୋକମାନେ ମଧ୍ୟ ସୋସିଆଲ ମିଡିଆରେ ବେଶ୍ ସକ୍ରିୟ ରହୁଛନ୍ତି। ଏଠାରେ ଲୋକମାନେ ଦୈନିକ ପ୍ରାୟ ୩ ଘଣ୍ଟା ୪୧ ମିନିଟ ସୋସିଆଲ ମିଡିଆ ପ୍ଲାଟଫର୍ମରେ ବିତାଉଛନ୍ତି। ବିଶେଷ କରି ଏଠାରେ ଯୁବକମାନେ ସୋସିଆଲ ମିଡିଆକୁ ମୁଖ୍ୟ ଯୋଗାଯୋଗର ମାଧ୍ୟମ ଭାବେ ବ୍ୟବହାର କରୁଛନ୍ତି।
ଆର୍ଜେଣ୍ଟିନା
ଆର୍ଜେଣ୍ଟିନା ସୋସିଆଲ ମିଡିଆ ବ୍ୟବହାରରେ ପଞ୍ଚମ ସ୍ଥାନରେ ରହିଛି। ଏଠାରେ ଲୋକମାନେ ହାରାହାରି ୩ ଘଣ୍ଟା ୨୬ ମିନିଟ ପ୍ରତିଦିନ ସୋସିଆଲ ମିଡିଆ ପ୍ଲାଟଫର୍ମରେ ସକ୍ରିୟ ରହୁଛନ୍ତି। ଏଠାରେ ଖେଳ ଓ ମନୋରଞ୍ଜନ ସମ୍ବନ୍ଧୀୟ କଣ୍ଟେଣ୍ଟ ସବୁଠାରୁ ଅଧିକ ପସନ୍ଦ କରାଯାଏ।
ଭାରତର ସ୍ଥିତି
ଭାରତ ଏହି ତାଲିକାରେ ୧୪ତମ ସ୍ଥାନରେ ରହିଛି। ଏଠାରେ ଲୋକମାନେ ହାରାହାରି ୨ ଘଣ୍ଟା ୩୬ ମିନିଟ ସୋସିଆଲ ମିଡିଆରେ ବିତାଉଛନ୍ତି। ଯଦିଓ ଭାରତରେ ଇଣ୍ଟରନେଟ ବ୍ୟବହାରକାରୀଙ୍କ ସଂଖ୍ୟା ବିଶ୍ୱରେ ସବୁଠାରୁ ଅଧିକ, କିନ୍ତୁ ହାରାହାରି ସମୟ ଅନେକ ଅନ୍ୟ ଦେଶଠାରୁ କମ୍।
Comments are closed.