ଟାଙ୍ଗୀ: କୋଲକାତାରୁ ପୁରୀ ଅଭିମୁଖେ ଆସୁଥିବା ଏକ ତୀର୍ଥଯାତ୍ରୀ ବସ ଦୁର୍ଘଟଣାର ଶିକାର ହୋଇଛି। କଟକ ଜିଲ୍ଲା ଟାଙ୍ଗୀ ବନ୍ଦାଳସ୍ଥିତ ଟୋଲ ପ୍ଲାଜା ନିକଟରେ ବସଟି ଦୁର୍ଘଟଣାର ଶିକାର ହୋଇଛି। ସନ୍ଧ୍ୟା ପ୍ରାୟ ୭ଟା ସମୟରେ ୧୬ ନମ୍ବର ଜାତୀୟ ରାଜପଥରେ। ଖବର ଲେଖା ହେବା ସୁଦ୍ଧା ଦୁର୍ଘଟଣାରେ କାହାରି ମୃତ୍ୟୁ ହୋଇନଥିବା ସୂଚନା ରହିଛି। ଏହି ଦୁର୍ଘଟଣାରେ ୧୨ ଜଣ ଯାତ୍ରୀ ଆହତ ହୋଇଥିବା ବେଳେ ୪ ଜଣ ଗୁରୁତର ଥିବା ସୂଚନା ରହିଛି।
ଦୁର୍ଘଟଣାଗ୍ରସ୍ତ ବସଟି କଲିକତାରୁ ଆନନ୍ଦ ଟ୍ରାଭେଲ୍ସର ବୋଲି ଜଣାପଡିଛି। ଗାଡି ନମ୍ବର ଡବ୍ଲୁବି-୫୧-ଏ-୪୨୦୯ ନଂ ରହିଛି। ସଂଧ୍ୟା ସମୟରେ ବସଟି ଦ୍ରୁତ ଗତିରେ ପୁରୀ ଅଭିମୁଖେ ଯାଉଥିଲା। ଏହି ସମୟରେ ଡ୍ରାଇଭର ନିୟନ୍ତ୍ରଣ ହରାଇବାରୁ ଡିଭାଇଡରରେ ବସଟି ପିଟି ହୋଇଥିଲା। ତେଣୁ ବସର ଆଗରେ ଯେଉଁମାନେ ବସିଥିଲେ ସେମାନେ ଆହତ ହୋଇଛନ୍ତି ବୋଲି ସୂଚନା ରହିଛି।
ବସରେ ୫୦ରୁ ଅଧିକ ଯାତ୍ରୀ ରହିଥିବା ଜଣାପଡିଛି। ଆହତଙ୍କୁ ସଙ୍ଗେସଙ୍ଗେ ଆମ୍ବୁଲାନ୍ସରେ କଟକ ବଡ ମେଡିକାଲକୁ ସ୍ଥାନାନ୍ତର କରାଯାଇଛି। ଆହତ ହୋଇନଥିବା ଯାତ୍ରୀଙ୍କୁ ଅନ୍ୟ ଏକ ବସରେ ପୁରୀ ପଠାଯାଇଥିବା ବେଳେ ଦୁର୍ଘଟଣାଗ୍ରସ୍ତ ବସଟିକୁ ଟାଙ୍ଗୀ ଥାନାରେ ଅଟକ ରଖାଯାଇଛି। ଦୁର୍ଘଟଣା ପରେ ସ୍ଥାନୀୟ ଲୋକ ଏବଂ ପାଟ୍ରୋଲିଂ କରୁଥିବା ପୁଲିସ ଗାଡି ସହଯୋଗର ହାତ ବଢାଇଥିବା ସୂଚନା ରହିଛି।
Comments are closed.