କଲେଜରେ ଲାଗିବ ସରକାରୀ ଯୋଜନାର ହୋର୍ଡିଂ, ଶିକ୍ଷାବିତ୍ କହିଲେ ନଷ୍ଟ ହୋଇପାରେ ଶୈକ୍ଷିକ ମାହୋଲ

ଭୁବନେଶ୍ୱର: ରାଜ୍ୟର ବିଭିନ୍ନ ବିଶ୍ୱବିଦ୍ୟାଳୟ ଓ କଲେଜରେ ରାଜ୍ୟ ସରକାରଙ୍କ ବିଭିନ୍ନ କାର୍ଯ୍ୟକ୍ରମ ସମ୍ପର୍କିତ ହୋର୍ଡିଂ ଲାଗିବ। ଏଥିସହ ଉଚ୍ଚଶିକ୍ଷା ପାଇଁ ଛାତ୍ରବୃତ୍ତି ବ୍ୟବସ୍ଥା ପ୍ରଦର୍ଶନ କରିବାକୁ ନିଷ୍ପତ୍ତି ନିଆଯାଇଛି। ଉଚ୍ଚଶିକ୍ଷା ପାଇଁ ଓଡ଼ିଶା ସରକାରଙ୍କ ଦ୍ୱାରା ପ୍ରଦାନ କରାଯାଉଥିବା ବିଭିନ୍ନ ଯୋଜନା ଓ ଛାତ୍ରବୃତ୍ତି ସମ୍ପର୍କରେ ବ୍ୟାପକ ସଚେତନତା ସୃଷ୍ଟି କରିବା ଏହି ପଦକ୍ଷେପର ଲକ୍ଷ୍ୟ ବୋଲି କୁହାଯାଉଛି। କିନ୍ତୁ ଏହାକୁ ଭୋଟ୍ ବ୍ୟାଙ୍କ ରାଜନୀତି ବୋଲି ଶିକ୍ଷାବିତ ଅନୁଭବ କରିଛନ୍ତି ଆଉ କଲେଜ କ୍ୟାମ୍ପସରେ ଏପରି ନହେବା ଠିକ୍ ହେବ ବୋଲି କହୁଥିବା ବେଳେ ବିରୋଧୀ ଦଳର ଛାତ୍ର ସଂଗଠନ ଏପରି ହେଲେ ଆଗାମୀ ଦିନରେ କଡ଼ା ଜବାବ ଦିଆଯିବ ବୋଲି କହିଛି।

ଗଣମାଧ୍ୟମକୁ ସୂଚନା ଦେଇ ଉଚ୍ଚଶିକ୍ଷା ମନ୍ତ୍ରୀ ଅତନୁ ସବ୍ୟସାଚୀ ନାୟକ କହିଛନ୍ତି, ଏସସି/ଏସଟି ସ୍କଲାରସିପ ହେଉ କିମ୍ବା କିଛି ମେରିଟ ସ୍କଲାରସିପ କିମ୍ବା ସରକାରଙ୍କ ଦ୍ୱାରା ଆରମ୍ଭ କରାଯାଇଥିବା ଅନ୍ୟ କୌଣସି ଯୋଜନାକୁ ବିଦ୍ୟାର୍ଥୀ, ଅଭିଭାବକ ଆଦିଙ୍କୁ ଅବଗତ କରାଇବା ଦିଗରେ ଏହା ସହାୟକ ହେବ। ଆମର ଉଦ୍ଦେଶ୍ୟ ଯେ ଏହାଦ୍ୱାରା ଛାତ୍ରଛାତ୍ରୀମାନେ ଠିକ୍ ସମୟରେ ଏହାର ଲାଭ ଉଠାଇପାରିବେ । ତେଣୁ ଏହି ହୋର୍ଡିଂ ଗୁଡ଼ିକ ଏହି ଦିଗରେ ସହାୟକ ହେବ।

ଯଦିଓ ସରକାର ଏହାକୁ ଛାତ୍ରଛାତ୍ରୀଙ୍କ ପାଇଁ ଏକ ସଚେତନତା କାର୍ଯ୍ୟକ୍ରମ ବୋଲି ଦାବି କରୁଛନ୍ତି ହେଲେ ୨୦୨୪ ନିର୍ବାଚନ ପୂର୍ବରୁ ଏହା ଏକ ରାଜନୈତିକ ଚାଲ୍ ବୋଲି ବିରୋଧୀ କହିଛନ୍ତି।

ଏହା ସ୍ପଷ୍ଟ ଭାବରେ ପ୍ରଥମ ଥର ଭୋଟରଙ୍କୁ ଆକୃଷ୍ଟ କରିବା ପାଇଁ ଏକ ରାଜନୈତିକ ଚାଲ୍, ଯେଉଁମାନେ ବର୍ତ୍ତମାନ କଲେଜ ଏବଂ ବିଶ୍ୱବିଦ୍ୟାଳୟରେ ଅଧ୍ୟୟନ କରୁଛନ୍ତି। ସେମାନେ ଆମର ଟିକସ ଅର୍ଥକୁ ସେମାନଙ୍କର ରାଜନୈତିକ ସ୍ୱାର୍ଥ ସାଧନ ପାଇଁ ଖର୍ଚ୍ଚ କରୁଛନ୍ତି। ଏଭଳି ନାଟକକୁ ଆମେ ବରଦାସ୍ତ କରିବୁ ନାହିଁ ଏବଂ କଲେଜ ଓ ବିଶ୍ୱବିଦ୍ୟାଳୟରେ ଲାଗିଥିବା ପ୍ରତ୍ୟେକ ହୋର୍ଡିଂ/ପୋଷ୍ଟକୁ ଚିରିଦେବୁ ବୋଲି ଛାତ୍ର କଂଗ୍ରେସର ସଭାପତି ୟାଶିର ନଓ୍ୱାଜ କହିଛନ୍ତି।

ସେହିପରି ଏଆଇଏସ୍ଏଫ୍, ରାଜ୍ୟ ସଭାପତି ସଙ୍ଘମିତ୍ରା ଜେନା କହିଛନ୍ତି, ସରକାର ସବୁ ଓଡ଼ିଆଙ୍କ ହୃଦୟରେ ନିଜକୁ ଦାବି କରୁଛନ୍ତି, କିନ୍ତୁ ସବୁଠି ପୋଷ୍ଟର/ହୋର୍ଡିଂ ଲଗାଇବାକୁ ପଡ଼ୁଛି। ହୋର୍ଡିଂରେ ରାସ୍ତା ଓ ରାଜପଥ ଭରିବା ପରେ ଏବେ କଲେଜ ଓ ବିଶ୍ୱବିଦ୍ୟାଳୟ କ୍ୟାମ୍ପସକୁ ଟାର୍ଗେଟ୍ କରୁଛନ୍ତି। ଉପଯୁକ୍ତ ଶିକ୍ଷା ଓ ନିଯୁକ୍ତି ସୁଯୋଗ ନମିଳିବାରୁ ଛାତ୍ରଛାତ୍ରୀମାନେ ରାସ୍ତାକୁ ଓହ୍ଲାଇବେ ବୋଲି ଆଶଙ୍କା ପ୍ରକାଶ ପାଇଛି। ଦରକାର ପଡ଼ିଲେ ରାଜ୍ୟ ସରକାରଙ୍କ ବିଫଳତାକୁ ଦର୍ଶାଇ ବ୍ୟାନର ଓ ପୋଷ୍ଟର ଲଗାଇବୁ।

ସରକାରଙ୍କ କାମକୁ ପ୍ରୋତ୍ସାହିତ କରିବା ପାଇଁ ବିଭିନ୍ନ ଉପାୟ ଓ କୌଶଳ ରହିଛି। ଶିକ୍ଷାନୁଷ୍ଠାନ, ମହାବିଦ୍ୟାଳୟ ଓ ବିଶ୍ୱବିଦ୍ୟାଳୟକୁ ରାଜନୈତିକ ଦଳର ପ୍ରଚାର ପ୍ରସାର ପାଇଁ ବ୍ୟବହାର କରିବା ଅଗଣତାନ୍ତ୍ରିକ ବୋଲି ଶିକ୍ଷାବିତ୍ କହିଛନ୍ତି।