ବାଲେଶ୍ୱର: ପର୍ଯ୍ଯଟନ ଓ ସଂସ୍କୃତି ମନ୍ତ୍ରୀ ଅଶ୍ୱିନୀ କୁମାର ପାତ୍ର ଆଗାମୀ ନିର୍ବାଚନରେ ବସ୍ତା ବିଧାନସଭା ନିର୍ବାଚନ ମଣ୍ଡଳୀ ପାଇଁ ବିଜୁ ଜନତା ଦଳର ନୂଆ ପ୍ରାର୍ଥୀଙ୍କ ନାମ ଘୋଷଣା କରି ବାଲେଶ୍ୱର ଜିଲ୍ଲାର ରାଜନୈତିକ ମହଲରେ ଆଲୋଡ଼ନ ସୃଷ୍ଟି କରିଥିବା ଜଣାପଡିଛି।
ଦଳର ଜନସମ୍ପର୍କ ପଦଯାତ୍ରାରେ ଯୋଗ ଦେଇ ମନ୍ତ୍ରୀ ବସ୍ତା ଆସନ ପାଇଁ ବିଜେଡି ପ୍ରାର୍ଥୀ ଭାବେ ସୁଭାଷିନୀ ଜେନାଙ୍କ ନାମ ଘୋଷଣା କରିଥିବା ଜଣାପଡ଼ିଛି।
ବସ୍ତା ବିଧାନସଭା ନିର୍ବାଚନ ମଣ୍ଡଳୀର ବିଜେଡି ବିଧାୟକ ନିତ୍ୟାନନ୍ଦ ସାହୁ ଅନୁପସ୍ଥିତ ଥିବା ବେଳେ ପୂର୍ବତନ ସାଂସଦ ରବିନ୍ଦ୍ର କୁମାର ଜେନାଙ୍କ ପତ୍ନୀ ଶ୍ରୀମତୀ ଜେନା ଆଗାମୀ ନିର୍ବାଚନରେ ବସ୍ତା ବିଧାନସଭା ନିର୍ବାଚନ ମଣ୍ଡଳୀରେ ଦଳର ନେତୃତ୍ୱ ନେବେ ଏବଂ ଅଞ୍ଚଳବାସୀ ତାଙ୍କୁ ସମର୍ଥନ କରିବେ ବୋଲି ଅଶ୍ୱିନୀ ପାତ୍ର କହିଥିଲେ।
ବିଜେଡି ଜିଲ୍ଲା ପର୍ଯ୍ୟବେକ୍ଷକ ପ୍ରତାପ ଦେବଙ୍କ ଉପସ୍ଥିତିରେ ଅଶ୍ୱିନୀ ପାତ୍ରଙ୍କ ଏଭଳି ବୟାନ ସ୍ଥାନୀୟ ଅଞ୍ଚଳର ଦଳୀୟ କର୍ମୀଙ୍କୁ ଚକିତ କରିଛି।
ଏହି କାର୍ଯ୍ୟକ୍ରମରେ ଅନୁପସ୍ଥିତ ଥିବା ବିଧାୟକ ନିତ୍ୟାନନ୍ଦ ସାହୁ ଗଣମାଧ୍ୟମକୁ କହିଛନ୍ତି ଯେ ଅସୁସ୍ଥତା କାରଣରୁ ସେ ବୈଠକରେ ଯୋଗ ଦେଇ ପାରୁନାହାନ୍ତି। ମନ୍ତ୍ରୀଙ୍କ ଘୋଷଣାକୁ ନେଇ ବିସ୍ମୟ ପ୍ରକାଶ କରି ବିଧାୟକ ଅଶ୍ବିନୀ ପାତ୍ର କାହିଁକି ଏଭଳି ଘୋଷଣା କଲେ ସେନେଇ ତାଙ୍କର କିଛି ଧାରଣା ନାହିଁ ବୋଲି କହିଥିଲେ। ତେବେ ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକଙ୍କ ଉପରେ ତାଙ୍କର ପୂର୍ଣ୍ଣ ଭରସା ଥିବାରୁ ବ୍ୟସ୍ତ ହେବାର କୌଣସି କାରଣ ନାହିଁ ବୋଲି ବିଧାୟକ କହିଛନ୍ତି।
50 ବର୍ଷରୁ ଅଧିକ ସମୟ ଧରି ରାଜନୀତିରେ ସକ୍ରିୟ ଥିବା ଦର୍ଶାଇ ବସ୍ତା ବିଧାୟକ କହିଛନ୍ତି ଯେ, ଏ ଅଞ୍ଚଳର ଲୋକେ ମଧ୍ୟ ତାଙ୍କ ସହ ଅଛନ୍ତି ଏବଂ ଏଥର ମଧ୍ୟ ସେ ବିଜେଡି ଟିକେଟ ପାଇବାକୁ ଆଶାବାଦୀ ଅଛନ୍ତି। ନିକଟରେ ସେ ମୁଖ୍ୟମନ୍ତ୍ରୀଙ୍କୁ ଭେଟିଥିବା ଦର୍ଶାଇ ନିତ୍ଯାନନ୍ଦ ସାହୁ କହିଛନ୍ତି ଯେ, ଦଳର ସଭାପତି ମଧ୍ୟ ତାଙ୍କ ଓ ତାଙ୍କ କାର୍ଯ୍ୟ ଦକ୍ଷତାକୁ ନେଇ ଭଲ ମତ ରଖିଛନ୍ତି।
ତେବେ ତାଙ୍କ ବଦଳରେ ଅନ୍ୟ କାହାକୁ ପ୍ରାର୍ଥୀ କରିବା ପାଇଁ ଦଳ ନିଷ୍ପତ୍ତି ନେଲେ ସେ ବିଜେଡ଼ି ଦ୍ୱାରା ମନୋନୀତ ପ୍ରାର୍ଥୀଙ୍କୁ ସମର୍ଥନ କରିବେ ବୋଲି ନିତ୍ୟାନନ୍ଦ ସାହୁ କହିଛନ୍ତି। ଆଗାମୀ ନିର୍ବାଚନରେ ତାଙ୍କୁ ବିଜେଡ଼ି ଟିକେଟ୍ ନମିଳିଲେ ମଧ୍ୟ ସେ ଦୁଃଖ କରିବେ ନାହିଁ ବୋଲି କହିଛନ୍ତି।
ଉଲ୍ଲେଖଯୋଗ୍ୟ, ଏହା ପୂର୍ବରୁ ସମାନ ପ୍ରକାର ପଦଯାତ୍ରା ବେଳେ ଧାମନଗରର ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳ ଧାମନଗର ବିଧାୟକ ପ୍ରାର୍ଥୀ ଭାବେ ଡାକ୍ତର ସଂଜୟ ଦାସଙ୍କ ନାଁ ଘୋଷଣା କରିଥିଲେ। ତେବେ ନବୀନ ନିବାସର ନିର୍ଦ୍ଦେଶ ହିଁ ବିଜେଡିର ଚୂଡାନ୍ତ ନିର୍ଦ୍ଦେଶ କୁହାଯାଉଥିବା ବେଳେ ଏବେ ପଦଯାତ୍ରା ବେଳେ ବିଜେଡିର ପ୍ରାର୍ଥୀ ଘୋଷଣା ସମସ୍ତଙ୍କୁ ଚକିତ କରିଛି। କାରଣ ଦଳର ଦୁଇ ନମ୍ବର ନେତା କୁହାଯାଉଥିବା ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ମଧ୍ୟ ନିର୍ବାଚନର ବହୁ ପୂର୍ବରୁ ସ୍ଥାନୀୟ ନେତା ପ୍ରାର୍ଥୀ ଘୋଷଣା କରିବା ଆଗାମୀ ଦିନରେ ଦଳକୁ ଅଡୁଆରେ ପକାଇପାରେ।
Comments are closed.