ମୁମ୍ବାଇ: ଶରଦ ପାୱାର କ୍ରିକେଟ ଏକାଡେମୀରେ ଚାଲିଥିବା ରଣଜୀ ଟ୍ରଫି କ୍ରିକେଟର ଏକ ମ୍ୟାଚରେ ମୁମ୍ବାଇ ବିପକ୍ଷରେ ଓଡିଶା ସ୍ଥିତି ଖରାପ ରହିଛି । ଫଲୋଅପ ପରେ ଓଡିଶା ଏବେ ପରାଜୟ ଏଡାଇବା ପାଇଁ ସଂଘର୍ଷ କରୁଛି । ପ୍ରଥମେ ବ୍ୟାଟିଂ କରି ମୁମ୍ବାଇ ଶ୍ରେୟାଶ ଆୟାରଙ୍କ ଦ୍ୱିଶତକ ବଳରେ ୪ ୱିକେଟ ବିିନିମୟରେ ୬୦୨ ରନ କରି ଇନିଂସ ଘୋଷଣା କରିଥିଲା । ଜବାବରେ ସନ୍ଦୀପ ପଟ୍ଟନାୟକ ଆକର୍ଷଣୀୟ ଶତକ ସତ୍ୱେ ଓଡିଶା ୨୮୫ ରନ କରି ଅଲଆଉଟ ହୋଇ ଯାଇଥିଲା । ସନ୍ଦୀପ ୧୦୨ ରନ କରିଥିଲେ । ଶାମ୍ସ ମୂଲାନୀ ୬ଟି ୱିକେଟ ଅକ୍ତିଆର କରି ଓଡିଶାର ବ୍ୟାଟିଂ ବିପର୍ଯ୍ୟୟ ଘଟାଇଥିଲେ ।
ଫଲୋଅନ ହେବା ପରେ ଦ୍ୱିତୀୟ ଇନିଂସରେ ଓଡିଶା ବ୍ୟାଟ୍ସମ୍ୟାନ ଭଲ ବ୍ୟାଟିଂ କରିବେ ବୋଲି ଆଶା କରାଯାଉଥିଲେ ମଧ୍ୟ ତୃତୀୟ ଦିବସ ଖେଳ ଶେଷ ସୁଦ୍ଧା ୧୨୬ ରନରେ ୫ଟି ୱିକେଟ ହରାଇ ବିପଦରେ ପଡିଛି । ହିଂମାଶୁ ସିଂ ୩ଟି ୱିକେଟ ଅକ୍ତିଆର କରିଛନ୍ତି । ଦଳ ଏବେ ବି ମୁମ୍ବାଇ ସ୍କୋରଠାରୁ ୧୯୧ ରନ ପଛରେ ରହିଛି । ଆଶୀର୍ବାଦ ସ୍ୱାଇଁ ୪୬ ରନ କରି ଅପରାଜିତ ରହିଛନ୍ତି । ମ୍ୟାଚକୁ ଡ୍ର କରିବାକୁ ହେଲେ ଓଡିଶା ବ୍ୟାଟ୍ସମ୍ୟାନଙ୍କୁ ଏକ ସ୍ମରଣୀୟ ଇନିଂସ ଖେଳିବାକୁ ପଡିବ ।