ଭୁବନେଶ୍ୱର: ମୁମ୍ବାଇର ଶରଦ ପାୱାର ଏକାଡେମୀ ଗ୍ରାଉଣ୍ଡରେ ଖେଳାଯାଉଥିବା ମୁମ୍ବାଇ ବିପକ୍ଷ ରଣଜୀ ଟ୍ରଫି ମୁକାବିଲାରେ ଓଡିଶା ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଛି । ଶ୍ରେୟାଶ ଆୟାରଙ୍କ ବିସ୍ଫୋରକ ଦ୍ୱିଶତକ( ୨୩୩ ) ଓ ସିଦ୍ଧେଶ ଲାଡ(୧୬୯)ଙ୍କ ଶତକ ବଳରେ ମୁମ୍ବାଇ ୪ ୱିକେଟ ବିନିମୟରେ ୬୦୨ ରନ କରି ଇନିଂସ ଘୋଷଣା କରିଥିଲା । ଉଭୟ ୪ର୍ଥ ୱିକେଟରେ ୩୫୪ ରନର ପାର୍ଟନରଶିପ ସଂଗ୍ରହ କରିଥିଲେ । ଶେଷ ଭାଗରେ ସୂର୍ଯ୍ୟାଂଶ ଶେଜ ୩୬ ବଲରେ ୭୯ ରନ କରି ଅପରାଜିତ ରହିଥିଲେ ।
ଏହାର ଜବାବରେ ଦ୍ୱିତୀୟ ଦିବସ ଷ୍ଟମ୍ପସ ଅପସାରଣ ବେଳକୁ ଓଡିଶା ୫ ୱିକେଟ ବିନିମୟରେ ୧୪୬ ରନ ସଂଗ୍ରହ କରିଛି । ସନ୍ଦୀପ ପଟ୍ଟନାୟକ ୭୩ ରନ କରି ଅପରାଜିତ ରହିଛନ୍ତି । ଅନୁରାଗ ଷଡଙ୍ଗୀ ୩୯ ରନ କରି ଆଉଟ ହୋଇଛନ୍ତି । ସ୍ୱସ୍ତିକ ସାମଲ, ଗୋବିନ୍ଦ ପୋଦ୍ଦାର ଓ ବିପ୍ଲବ ସାମନ୍ତରାୟ ଖାତା ଖୋଲି ନ ପାରି ପ୍ୟାଭିଲିୟନ ଫେରି ଯାଇଥିଲେ । ମୁମ୍ବାଇ ପକ୍ଷରୁ ହିମାଂଶୁ ସିଂ ଓ ଶାମ୍ସ ମୁଲାନୀ ୨ଟି ଲେଖାଏଁ ୱିକେଟ ଅକ୍ତିଆର କରିଥିଲେ । ଚଳିତ ସିଜନରେ ଓଡିଶାର ନୈରାଶ୍ୟଜନକ ପ୍ରଦର୍ଶନ ଜାରୀ ରହିଛି । ଏବେ ବି ମୁମ୍ବାଇ ସ୍କୋରଠାରୁ ଓଡିଶା ୪୫୬ ରନ ପଛରେ ରହିଛି ।