ରାୟଗଡା ଲକ୍ଷ୍ମୀ ମାଝୀ ମୃତ୍ୟୁ ମାମଲା: କୁଆଡ଼େ ଗଲା ମା’କୁ ସମ୍ମାନର ନାରା କହି ସିବିଆଇ ତଦନ୍ତ ଦାବି କଲା ବିଜେପି

ଭୁବନେଶ୍ୱର: ‘ମା’କୁ ସମ୍ମାନ’ର ନାରା ଦେଉଛନ୍ତି ରାଜ୍ୟ ସରକାର। ହେଲେ ଏବେ ରାୟଗଡ଼ା ଜିଲ୍ଲା ଚନ୍ଦ୍ରପୁରରେ ‘ମା’ ଗୃହର ୱାର୍ଡେନ୍ ଲକ୍ଷ୍ମୀ ମାଝୀଙ୍କ ମୃତ୍ୟୁ ମାମଲାରେ ପୁଲିସ ଶବ ବ୍ୟବଚ୍ଛେଦ ରିପୋର୍ଟ ଶୋକସନ୍ତପ୍ତ ପରିବାରକୁ ହସ୍ତାନ୍ତର ନକରିବା ଶାସକ ଦଳର ନାରା ଏବଂ ରାଜ୍ୟ ସରକାରର ଉଦ୍ଦେଶ୍ୟ କ’ଣ ବୁଝାପୁଡିଛି ବୋଲି ବିଜେପି ମହିଳା ମୋର୍ଚ୍ଚାର ନେତ୍ରୀ କହିଛନ୍ତି।

ଏହି ମାମଲାରେ କ୍ରାଇମବ୍ରାଞ୍ଚ ତଦନ୍ତ ଚଳାଇଥିବା ବେଳେ ବିଜେପି ମହିଳା ମୋର୍ଚ୍ଚା ସଭାନେତ୍ରୀ ଐଶର୍ଯ୍ୟା ବିଶ୍ୱାଳ ଭୁବନେଶ୍ୱରରେ ସାମ୍ବାଦିକ ସମ୍ମିଳନୀ କରି ଅଭିଯୋଗ କରିଛନ୍ତି ଯେ ଲକ୍ଷ୍ମୀ ମାଝୀଙ୍କ ମୃତ୍ୟୁକୁ ସପ୍ତାହରେ ଅଧିକ ସମୟ ବିତିଯାଇଥିଲେ ମଧ୍ୟ ପୁଲିସ ଶବ ବ୍ୟବଚ୍ଛେଦ ରିପୋର୍ଟ ଶୋକସନ୍ତପ୍ତ ପରିବାରକୁ ହସ୍ତାନ୍ତର କରିନାହିଁ। ଗତ ଡିସେମ୍ବର ୨୧ ତାରିଖରେ ଚନ୍ଦ୍ରପୁର ଡାକ୍ତରଖାନା ପରିସରରୁ ଲକ୍ଷ୍ମୀଙ୍କ ଅର୍ଦ୍ଧଦଗ୍ଧ ମୃତଦେହ ମିଳିଥିଲା।

ପୁଲିସ ଓ ରାଜ୍ୟ ସରକାର ଏହି ଘଟଣାକୁ ଚାପି ଦେବାକୁ ପ୍ରୟାସ କରୁଛନ୍ତି ବୋଲି ସେ ଅଭିଯୋଗ କରିଛନ୍ତି। ଲକ୍ଷ୍ମୀଙ୍କ ଭଳି ଜଣେ ଦିବ୍ୟଙ୍ଗ ଓ ଆଦିବାସୀ ମହିଳାଙ୍କୁ ଡାକ୍ତରଖାନା ପରିସରରେ ହତ୍ୟା କରି ପୋଡ଼ି ଦେବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ବିଜେପି ନେତା କହିଛନ୍ତି।

ମୃତକଙ୍କ ବାପାଙ୍କ ଅଭିଯୋଗ ସତ୍ତ୍ୱେ ପୁଲିସ ମା’ ଗୃହ ଚଳାଉଥିବା ଏନଜିଓ ଆଲିଶାର ସଭାପତିଙ୍କୁ ଗିରଫ କରିନାହିଁ ବୋଲି କହି ବିଜେପି ମହିଳା ମୋର୍ଚ୍ଚା ନେତ୍ରୀ ତଦନ୍ତ ଉପରେ ସନ୍ଦେହ ପ୍ରକାଶ କରିଛନ୍ତି।

ଏଭଳି ତଥ୍ୟକୁ ଦୃଷ୍ଟିରେ ରଖି ଲକ୍ଷ୍ମୀଙ୍କ ସହ ପ୍ରକୃତରେ କ’ଣ ଘଟିଥିଲା ତାହା ସାମ୍ନାକୁ ଆସିବା ପାଇଁ ଘଟଣାର ସିବିଆଇ ତଦନ୍ତର ଆବଶ୍ୟକତା ରହିଛି ବୋଲି ବିଶ୍ୱାଳ ଦାବି କରିଛନ୍ତି।

ଓଡ଼ିଶା ସରକାରଙ୍କୁ ଟାର୍ଗେଟ କରି ସେ ଆହୁରି ମଧ୍ୟ କହିଛନ୍ତି, ରାଜ୍ୟ ସରକାର ନିଜକୁ ‘ମା’କୁ ସମ୍ମାନ’ର ରକ୍ଷକ ବୋଲି ଦାବି କରୁଥିବା ବେଳେ ଏଭଳି ଘଟଣା ଦର୍ଶାଉଛି ଯେ ଓଡ଼ିଶାର ମହିଳାମାନେ ସୁରକ୍ଷିତ ନୁହଁନ୍ତି ଏବଂ ସମୃଦ୍ଧ ହୋଇପାରୁନାହାନ୍ତି।

ଉଲ୍ଲେଖଯୋଗ୍ୟ, ଏହି ମାମଲାରେ ରାୟଗଡାରେ ଆଦିବାସୀ ମହାସଂଘ ଜାନୁଆରୀ ପାଞ୍ଚ ତାରିଖରେ ରାୟଗଡ ବନ୍ଦ ଡାକରା ଦେଇଛନ୍ତି।