ତାଳଚେର : ଜୋର କରି ପଶିଲେ ଆଉ ବନ୍ଧୁକ ଦେଖାଇ ଲୁଟିନେଲେ। ଆଖି ସାମ୍ନାରେ ଲୁଟିନେଲେ ଲକ୍ଷ ଲକ୍ଷ ଟଙ୍କା। ଏମିତି କିଛି ଦୃଶ୍ୟ ଦେଖିବାକୁ ମିଳିଛି ତାଳଚେର ଗୁରୁଜାଙ୍ଗ ଠାରେ ଥିବା ବିଦେଶୀ ମଦ ଦୋକାନରେ। ତିନି ଦୁର୍ବୃତ୍ତ ବନ୍ଧୁକ ଏବଂ ଖଣ୍ଡା ଧରି ଲୁଟି ନେଇଛନ୍ତି ଦେଢ଼ ଲକ୍ଷ ଟଙ୍କା ସହ ମଦ। ଯାହାର ସମସ୍ତ ଚିତ୍ର ଏବେ ସିସିଟିଭିରେ କଏଦ ହୋଇଛି
ସିସିଟିଭି ଫୁଟେଜ ଅନୁସାରେ ତିନି ଜଣ ଦୁର୍ବୃତ୍ତ ହେଲମେଟ ଏବଂ ମୁହଁରେ ମାସ୍କ ପିନ୍ଧି ବାଇକରେ ଆସିଥିଲେ। ସେମାନେ ବନ୍ଧୁକ ଏବଂ ଭୁଜାଲି ଧରି ବିଦେଶୀ ମଦ ଦୋକାନ ଭିତରକୁ ଯାଇଥିଲେ। ସେଠାରେ ମାରପିଟ କରିବା ସହ ଦୋକାନ ଭିତରେ କ୍ୟାସିଅରକୁ ଧମକ ଦେଇଥିଲେ। ପରେ ସେମାନେ କ୍ୟାସ କାଉଣ୍ଟରରୁ ପାଖାପାଖି ଦେଢ଼ ଲକ୍ଷ ଟଙ୍କା ଜୋର କରି ଲୁଟି ନେଇଥିଲେ। କେବଳ ଏତିକି ନୁହେଁ ଲୁଟ ପରେ ସେମାନେ ମଦ ଧରି ଚମ୍ପଟ ମାରିଥିଲେ।
ଏ ନେଇ ବେଦେଶୀ ମଦ ଦୋକାନର ସମସ୍ତ କର୍ମଚାରୀ ଭୟଭୀତ ହୋଇପଡିଥିବା ବେଳେ ତାଳଚେର ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି। ତେବେ ଗୋଡିବନ୍ଧ ଫାଣ୍ଡିର ଏକ କିଲୋମିଟର ଦୂରତା ଭିତରେ ମଦ ଦୋକାନ ରହିଥିବା ବେଳେ, ଏଭଳି ଲୁଟକୁ ନେଇ ପୋଲିସର ପାରିବା ପଣିଆ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଗତ ଦୁଇ ମାସ ଭିତରେ ତାଳଚେର ଥାନା ଅଞ୍ଚଳରେ ୪୦ ରୁ ଉର୍ଦ୍ଧ୍ବ ଚୋରି ଏବଂ ଲୁଟ ହୋଇଥିବା ବେଳେ ଅଧାରୁ ଅଧିକ କେସରେ ପୋଲିସର ହାତ ଖାଲି ଥିବା ସୂଚନା ମିଳିଛି। ତେବେ ଆଗକୁ ଇଂରାଜୀ ନବବର୍ଷ ପାଖେଇ ଆସୁଥିବା ବେଳେ, ଲୁଟେରା ମାନଙ୍କ ପାଇଁ ତାଳଚେର ପୋଲିସକି ପଦକ୍ଷେପ ନେବ ଦେଖିବାକୁ ବାକି ରହିଲା।