ନୂଆଦିଲ୍ଲୀ: ବର୍ଷକ ମଧ୍ୟରେ ଭାରତ ରୋହିତ ଶର୍ମାଙ୍କ ନେତୃତ୍ୱରେ ୨ଟି ଆଇସିସି ଟ୍ରଫି ଜିତିଛି । ଏବେ ଏକ ରିପୋର୍ଟ ଅନୁସାରେ ରୋହିତ ଆଗାମୀ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ଖେଳି ନ ପାରନ୍ତି । ସେ ବ୍ୟକ୍ତିଗତ ଭାବେ ବୋର୍ଡକୁ ଏ ନେଇ ମନା କରିଛନ୍ତି ବୋଲି ଉକ୍ତ ରିପୋର୍ଟରେ ଉଲ୍ଲେଖ କରାଯାଇଛି । ଆଇପିଏଲ ୨୦୨୫ ପରେ ଭାରତୀୟ ଟିମ ଇଂଲଣ୍ଡ ଗସ୍ତରେ ଯିବ । ଅଷ୍ଟ୍ରେଲିଆ ବିପକ୍ଷ ବର୍ଡର-ଗାଭାସ୍କର ଟ୍ରଫିରେ ରୋହିତଙ୍କ ନେତୃତ୍ୱରେ ଟିମ ଇଣ୍ଡିଆ ନୈରାଶ୍ୟଜନକ ପ୍ରଦର୍ଶନ କରିଥିଲା । ରୋହିତଙ୍କ ପ୍ରଦର୍ଶନ ମଧ୍ୟ ପ୍ରଶଂସନୀୟ ରହି ନ ଥିଲା । ରୋହିତଙ୍କୁ ଏଥିନେଇ କଡା ସମାଲୋଚନାର ଶୀକାର ହେବାକୁ ପଡିଥିଲା । ଆଇସିସି ଚାମ୍ପିୟନ୍ସ ଟ୍ରଫିରେ ଭାରତକୁ ଚାମ୍ପିୟନ କରାଇବା ପରେ ଅବଶ୍ୟ ଅନେକ ସମାଲୋଚକଙ୍କ ସ୍ୱର ବଦଳି ଯାଇଛି ।
ରୋହିତ କିମ୍ବା ଟିମ ଇଣ୍ଡିଆ ପକ୍ଷରୁ ଏ ସମ୍ପର୍କରେ ବିଧିବଦ୍ଧ ଭାବେ କୌଣସି ଘୋଷଣା କରାଯାଇ ନାହିଁ । ପୂର୍ବରୁ ରୋହିତଙ୍କ ସମ୍ପର୍କରେ ଏ ଭଳି ଅନେକ ରିପୋର୍ଟ ପ୍ରକାଶ ପାଇଥିଲା ଏବଂ ପରେ ଏହା ମିଥ୍ୟା ପ୍ରମାଣିତ ହୋଇଥିଲା । ରୋହିତ ଯିବା ନେଇ ସଂଶୟ ରହିଥିବା ବେଳେ ବିରାଟ କୋହଲି ଏହି ଗସ୍ତରେ ଯିବା ଏକପ୍ରକାର ନିଶ୍ଚିିତ । ଅଷ୍ଟ୍ରେଲିଆ ବିପକ୍ଷ ସିରିଜରେ କୋହଲି ୧୯ ଇନିଂସରେ ୩୮୨ ଏବଂ ରୋହିତ ୧୫ ପାରିରେ ୧୬୪ ରନ କରିଥିଲେ । ଭାରତର ଇଂଲଣ୍ଡ ଗସ୍ତ ୨୦ ଜୁନରୁ ଆରମ୍ଭ ହେବ । ପ୍ରଥମ ଟେଷ୍ଟ ଲୀଡ୍ସରେ ଖେଳାଯିବ ।
Comments are closed.