ରାମ ଲଲାଙ୍କ ପ୍ରାଣ ପ୍ରତିଷ୍ଠାକୁ ଆସିବେ ନାହିଁ କଂଗ୍ରେସ ନେତା, କହିଲେ ଆରଏସଏସ-ବିଜେପି କାର୍ଯ୍ୟକ୍ରମ

ନୂଆଦିଲ୍ଲୀ: କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ଏବଂ ପୂର୍ବତନ ସଭାପତି ସୋନିଆ ଗାନ୍ଧୀ ଏବଂ ଲୋକସଭାରେ ବିରୋଧୀ ଦଳ ନେତା ଅଧୀର ରଞ୍ଜନ ଚୌଧୁରୀଙ୍କ ସମେତ ବରିଷ୍ଠ ନେତାମାନେ ଜାନୁଆରି ୨୨ ତାରିଖରେ ଅଯୋଧ୍ୟାରେ ହେବାକୁ ଥିବା ରାମ ଲଲାଙ୍କ ପ୍ରାଣ ପ୍ରତିଷ୍ଠା କାର୍ଯ୍ୟକ୍ରମରେ ଯୋଗ ଦେବେ ନାହିଁ।

କଂଗ୍ରେସ ନିଜ ଅଫିସିଆଲ୍ ଏକ୍ସରେ ସେୟାର କରିଥିବା ଏକ ଚିଠିରେ ଏହି ମେଗା ସମାରୋହକୁ ଆରଏସଏସ/ବିଜେପି କାର୍ଯ୍ୟକ୍ରମ ବୋଲି କହିଛି।

ଜାନୁଆରୀ ୨୨ ରେ ଅଯୋଧ୍ୟାରେ ଆୟୋଜିତ ଏହି ସମାରୋହରେ ଯୋଗଦେବା ପାଇଁ ମଲ୍ଲିକାର୍ଜୁନ ଖଡଗେ, ସୋନିଆ ଗାନ୍ଧୀ ଏବଂ ଅଧୀର ରଞ୍ଜନ ଚୌଧୁରୀଙ୍କୁ ନିମନ୍ତ୍ରଣ ମିଳିଥିଲା। ତେବେ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ) ଏବଂ ଭାରତୀୟ ଜନତା ପାର୍ଟି (ବିଜେପି) ଅଯୋଧ୍ୟାର ମନ୍ଦିରକୁ ଏକ ରାଜନୈତିକ ପ୍ରକଳ୍ପରେ ପରିଣତ କରିଛନ୍ତି ବୋଲି ଦଳ ଅଭିଯୋଗ କରିଛି।

ଏହି ସମାରୋହରେ ଯୋଗ ନଦେବା ପାଇଁ କଂଗ୍ରେସର ନିଷ୍ପତ୍ତି ଉପରେ ପ୍ରତିକ୍ରିୟା ପ୍ରକାଶ କରି ବିଶ୍ୱ ହିନ୍ଦୁ ପରିଷଦ (ଭିଏଚପି) କହିଛି ଯେ ଯଦି କଂଗ୍ରେସ ରାମଲଲାଙ୍କ କାର୍ଯ୍ୟକ୍ରମରେ ଯୋଗ ଦେବାକୁ ଚାହେଁ ନାହିଁ, ତେବେ ଏହା ସେମାନଙ୍କ ପସନ୍ଦ। ଆମେ ନିମନ୍ତ୍ରଣ ପଠାଇଛୁ, ଯଦି ସେମାନେ ଆସିବାକୁ ଚାହୁଁନାହାଁନ୍ତି ତେବେ ଠିକ୍ ଅଛି।

ଉତ୍ତରପ୍ରଦେଶ କଂଗ୍ରେସ ସଭାପତି ଅଜୟ ରାୟ କହିଛନ୍ତି ଯେ ସେ ଜାନୁଆରୀ ୧୫ ରେ ମକର ସଂକ୍ରାନ୍ତି ଅବସରରେ ରାମଲଲା ଦର୍ଶନ ପାଇଁ ଅଯୋଧ୍ୟା ଯିବେ ଏବଂ ସରୟୁ ନଦୀରେ ପବିତ୍ର ସ୍ନାନ କରିବେ । ତେବେ ଏହି ସମାରୋହରେ ତାଙ୍କୁ ନିମନ୍ତ୍ରଣ କରାଯାଇ ନାହିଁ ବୋଲି ସେ କହିଛନ୍ତି।