WhatsApp ଓ Telegramକୁ ଟକ୍କର ଦେବ ପୁଟିନଙ୍କ ମେସେଜିଂ ଆପ୍, କ’ଣ ଆପଣ କରିପାରିବେ ବ୍ୟବହାର ?
ନୂଆଦିଲ୍ଲୀ: ସୁରକ୍ଷିତ ମେସେଜିଂ ଆପ୍ର ଦୌଡ଼ରେ ଏବେ ହ୍ୱାଟ୍ସଆପ୍ ଓ ଟେଲିଗ୍ରାମ୍ର ଆଧିପତ୍ୟ ରହିଛି। ଏହି ବିଶାଳ ବ୍ୟବହାରକାରୀ ଥିବା ପ୍ଲାଟଫର୍ମଗୁଡ଼ିକ ଏଲନ୍ ମସ୍କଙ୍କ X-Chat ଉପରେ ମଧ୍ୟ ନଜର ରଖିଛନ୍ତି, ଯାହା ଟେଲିଗ୍ରାମ୍ ସହ ସମାନ। କିନ୍ତୁ ଏବେ ଏହି ଦୌଡ଼ରେ ଆଉ ଏକ ନୂଆ ପ୍ଲେୟାର ପ୍ରବେଶ କରିଛି। ଏହାର ନାମ ହେଉଛି ଭ୍ଲାଡ୍ସ ଆପ୍। ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସାଂସଦମାନେ ଏକ ସରକାରୀ ନିୟନ୍ତ୍ରିତ ମେସେଜିଂ ଆପ୍କୁ ଅନୁମୋଦନ ଦେଇଛନ୍ତି, ଯାହା ହ୍ୱାଟ୍ସଆପ୍ ଓ ଟେଲିଗ୍ରାମ୍ ଭଳି ବିଦେଶୀ ଆପ୍ର ବିକଳ୍ପ ହେବ।
ହ୍ୱାଟ୍ସଆପ୍ ଓ ଟେଲିଗ୍ରାମ୍ର ସ୍ଥାନ ନେବ
ଗତ ମାସରେ ତୁର୍କୀର ଅନାଦୋଲୁ ଏଜେନ୍ସି ରିପୋର୍ଟ କରିଥିଲା ଯେ, ରୁଷ ଡୁମାର ସୂଚନା ନୀତି କମିଟିର ମୁଖ୍ୟ ସେର୍ଗେଇ ବୟାର୍ସ୍କି ଏହି ଆପ୍କୁ “ହ୍ୱାଟ୍ସଆପ୍ ଓ ଟେଲିଗ୍ରାମ୍ ଭଳି ସେବାର ଏକ ସୁରକ୍ଷିତ ଓ ବହୁମୁଖୀ ବିକଳ୍ପ” ବୋଲି ବର୍ଣ୍ଣନା କରିଛନ୍ତି। ବୟାର୍ସ୍କି କହିଛନ୍ତି, ଏହା “ଆମ ଡିଜିଟାଲ ସୁରକ୍ଷାର ଶେଷ ଅଭାବକୁ ପୂରଣ କରିବ” ଏବଂ “ଅସୁରକ୍ଷିତ ବିଦେଶୀ ମେସେଞ୍ଜର”ର ସ୍ଥାନ ନେବ।
ସଂସଦର ଉଚ୍ଚ ସଦନରେ ପାସ୍ ହେବାକୁ ରହିଛି ବାକି
ରିପୋର୍ଟ ଅନୁସାରେ, ଏହି ଆଇନକୁ ରୁଷ ସଂସଦର ଉଚ୍ଚ ସଦନରେ ପାସ୍ ହେବାକୁ ବାକି ଅଛି ଏବଂ ଆଇନରେ ପରିଣତ ହେବା ପାଇଁ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଦସ୍ତଖତ ଆବଶ୍ୟକ। ଡିଜିଟାଲ ବିକାଶ ମନ୍ତ୍ରୀ ମାକ୍ସୁଟ ଶାଦାୟେଭ ଗତ ସପ୍ତାହରେ ରାଷ୍ଟ୍ରପତି ପୁଟିନଙ୍କ ସହ ଏକ ବୈଠକରେ ଏକ ଜାତୀୟ ମେସେଜିଂ ଆପ୍କୁ ସରକାରୀ ସେବା ସହ ସଂଯୋଗ କରିବାର ପ୍ରସ୍ତାବ ଦେଇଥିଲେ। ସେ ଅନ୍ୟ ଦେଶର ତୁଳନାରେ ରୁଷର ଏହି କ୍ଷେତ୍ରରେ ଅଭାବକୁ ଉଜାଗର କରିଥିଲେ।
ଏହା କ’ଣ କରିବ?
କିଏଭ ଇଣ୍ଡିପେଣ୍ଡେଣ୍ଟ ଅନୁସାରେ, “ଏହି ନୂଆ ଆପ୍ ଋଷର ରାଜ୍ୟ ଓ ମ୍ୟୁନିସିପାଲ ଡାଟାବେସ୍ ସହ ସଂଯୁକ୍ତ ହେବ। ବ୍ୟବହାରକାରୀଙ୍କ ସମ୍ମତି ସହ ଏହା ପରିଚୟ ପତ୍ର ପାଇଁ, ଚୁକ୍ତିନାମା ସ୍ୱାକ୍ଷର କରିବା ପାଇଁ, ସେବା କିମ୍ବା ପଣ୍ୟ ପାଇଁ ପେମେଣ୍ଟ କରିବା ପାଇଁ ବ୍ୟକ୍ତିଗତ ସୂଚନା ସ୍ଥାନାନ୍ତର କରିପାରିବ।” ଏହା ଚୁକ୍ତିନାମା ସ୍ୱାକ୍ଷର ଏବଂ ଶିକ୍ଷାଗତ ସେବା ପାଇଁ ମଧ୍ୟ ବ୍ୟବହୃତ ହୋଇପାରିବ।
କିଏ ବ୍ୟବହାର କରିପାରିବ?
ଋଷ ବାହାରେ ଥିବା ବ୍ୟବହାରକାରୀମାନେ ଏହି ନୂଆ ସରକାରୀ ଆପ୍ ବ୍ୟବହାର କରିପାରିବେ ନାହିଁ। କିଛି ରିପୋର୍ଟ ଅନୁସାରେ, ଋଷ ସରକାର ହ୍ୱାଟ୍ସଆପ୍ ଓ ଟେଲିଗ୍ରାମ୍କୁ ଋଷ ଭିତରେ ଅବରୋଧ କରିପାରେ, ଯାହା ବ୍ୟବହାରକାରୀମାନଙ୍କୁ ଶେଷରେ ଏହି ନୂଆ ଆପ୍ ବ୍ୟବହାର କରିବାକୁ ବାଧ୍ୟ କରିବ।
ଚିନ୍ତାର ବିଷୟ
ଇଣ୍ଟରନେଟ ପ୍ରୋଟେକ୍ସନ ସୋସାଇଟିର ନିର୍ଦ୍ଦେଶକ ମିଖାଇଲ କ୍ଲିମାରେଭ ଟେଲିଗ୍ରାମ୍ରେ କହିଛନ୍ତି ଯେ, ସେ ଆଶା କରୁଛନ୍ତି ଋଷ ସରକାର ହ୍ୱାଟ୍ସଆପ୍ ଓ ଟେଲିଗ୍ରାମ୍ର ଗତି ଧୀମା କରି ନୂଆ ସରକାରୀ ମେସେଞ୍ଜର ପାଇଁ ଜାଗା ସୃଷ୍ଟି କରିବ। ସେ ଆଗୁଆ ସତର୍କ କରିଛନ୍ତି ଯେ, ଏହି ଆପ୍ ବ୍ୟକ୍ତିଗତ ସ୍ୱାଧୀନତାର ଉଲ୍ଲଂଘନ କରିପାରେ।
Comments are closed.