ହାଇଦ୍ରାବାଦ: ଚଳିତ ସନ୍ତୋଷ ଟ୍ରଫି ଫୁଟବଲରେ ଓଡିଶା କ୍ୱାର୍ଟରଫାଇନାଲରେ ପରାଜିତ ହୋଇଛି । ଡେକାନ ଏରିନାରେ ଅନୁଷ୍ଠିତ ବେଙ୍ଗଲ ବିପକ୍ଷ ମ୍ୟାଚରେ ଓଡିଶା ୧-୩ ଗୋଲରେ ହାରି ଯାଇଥିଲା । ବିଜୟ ସହ ବେଙ୍ଗଲ ସେମିଫାଇନାଲରେ ପ୍ରବେଶ କରିଛି । ମ୍ୟାଚର ୨୫ତମ ମିନିଟରେ ରାକେଶ ଓରାମଙ୍କ ଗୋଲ ବଳରେ ଓଡିଶା ଗୁରୁତ୍ୱପୂର୍ଣ୍ଣ ଅଗ୍ରଣୀ ହାସଲ କରିଥିଲା । ଏହାର ୨ ମିନିଟ ପରେ ବେଙ୍ଗଲ ମ୍ୟାଚକୁ ସମାନ ସ୍ଥିତିକୁ ଆଣିବାରେ ସଫଳ ହୋଇଥିଲା । ନରହରି ଶ୍ରେଷ୍ଠ ଗୋଲ ସ୍କୋର କରିଥିଲେ । ପ୍ରଥମାର୍ଦ୍ଧ ଶେଷ ସୁଦ୍ଧା ୧-୧ ସ୍ଥିତିରେ ମ୍ୟାଚ ରହିଥିଲା ।
ଦ୍ୱିତୀୟାର୍ଦ୍ଧରେ ମଧ୍ୟ ଉଭୟ ଦଳ ମଧ୍ୟରେ କଡା ସଂଘର୍ଷ ଦେଖିବାକୁ ମିଳିଥିଲା । ୭୭ତମ ମିନିଟରେ ରବି ହାଁସଦାଙ୍କ ଗୋଲ ଯୋଗୁ ବେଙ୍ଗଲ ୨-୧ର ଅଗ୍ରଣୀ ହାସଲ କରିଥିଲା । ଏହା ପରେ ଓଡିଶା ଚାପରେ ରହିଥିଲା । ମନ୍ତୋଷ ମାଝି ମ୍ୟାଚ ଶେଷ ହେବାର ୨ ମିନିଟ ପୂର୍ବରୁ ଆଉ ଏକ ଗୋଲ ଦେଇ ବେଙ୍ଗଲକୁ ୩-୧ରେ ବିଜୟୀ କରାଇଥିଲେ । ଗ୍ରୁପ ବି ୪ର୍ଥ ସ୍ଥାନରେ ରହି ଓଡିଶା କ୍ୱାର୍ଟରରେ ପ୍ରବେଶ କରିଥିଲା । ବେଙ୍ଗଲ ସମ୍ପୂର୍ଣ୍ଣ ଟୁର୍ଣ୍ଣାମେଂଟରେ ପ୍ରଭାବୀ ପ୍ରଦର୍ଶନ ଜାରୀ ରଖିଛି ।