ନୂଆଦିଲ୍ଲୀ: ଭାରତର ଷ୍ଟାର ପେସ ବୋଲର ମହମ୍ମଦ ସାମୀ ରଣଜୀ ଟ୍ରଫିରେ ଚମତ୍କାର ପ୍ରଦର୍ଶନ କରିଛନ୍ତି । ଆଘାତ ସମସ୍ୟରୁ ମୁକୁଳି ସେ ଭଲ ବୋଲିଂ କରିଥିବାରୁ ଆଗାମୀ ବର୍ଡର-ଗାଭାସ୍କର ଟ୍ରଫି ପାଇଁ ସେ ଅଷ୍ଟ୍ରେଲିଆ ଗସ୍ତରେ ଯିବା ସମ୍ଭାବନା ସୃଷ୍ଟି ହୋଇଛି । ୱାର୍ଲ୍ଡ ଟେଷ୍ଟ ସିରିଜ ଫାଇନାଲରେ ପ୍ରବେଶ କରିବା ପାଇଁ ଭାରତକୁ ଅଷ୍ଟ୍ରେଲିଆ ବିପକ୍ଷ ଏହି ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ଭଲ ପ୍ରଦର୍ଶନ କରିବାକୁ ପଡିବ । ସାମୀ ବେଙ୍ଗଲ ବିପକ୍ଷରେ ୧୯ ଓଭରରେ ୫୪ ରନ ଦେଇ ୪ଟି ୱିକେଟ ଅକ୍ତିଆର କରିଛନ୍ତି । ମ୍ୟାଚ ପରେ ତାଙ୍କୁ ଯନ୍ତ୍ରଣା ଅନୂଭବ ହୋଇ ନ ଥିଲା କିମ୍ବା ଗୋଡ ଫୁଲି ନ ଥିଲା ।
ଯଦି ସମସ୍ତ ମାନଦଣ୍ଡରେ ସେ ଉନ୍ନୀତ ହୁଅନ୍ତି ତେବେ ଦ୍ୱିତୀୟ ଟେଷ୍ଟ ପୂର୍ବରୁ ଦଳ ସହିତ ଯୋଗ ଦେଇପାରନ୍ତି । ରଣଜୀ ଟ୍ରଫି ନଭେମ୍ବର ୧୬ରେ ଶେଷ ହେବ ଏବଂ ନଭେମ୍ବର ୨୨ରୁ ଏହି ଟେଷ୍ଟ ସିରିଜ ଆରମ୍ଭ ହେବ । ଗତବର୍ଷ ଦିନିକିଆ ବିଶ୍ୱକପ ପରଠାରୁ ସାମୀ ଆଉ କୌଣସି ଆନ୍ତର୍ଜାତୀୟ ମ୍ୟାଚ ଖେଳି ନାହାନ୍ତି । ନ୍ୟୁଜିଲାଣ୍ଡ ବିପକ୍ଷ ଘରୋଇ ସିରିଜ ପୂର୍ବରୁ ସେ ଦଳକୁ ଫେରିବେ ବୋଲି ଆଶା କରାଯାଉଥିଲା । ତେବେ ସେ ଯନ୍ତ୍ରଣା ଅନୂଭବ କରିବାରୁ ସିରିଜରୁ ଓହରି ଯାଇଥିଲେ । ସାମୀ ଏବଂ ଯଶପ୍ରୀତ ବୁମରାହ କମ୍ବିନେଶନ ଭାରତର ବୋଲିଂ ବିଭାଗକୁ ଅଷ୍ଟ୍ରେଲିଆରେ ବେଶ ମଜଭୁତ କରିବ ବୋଲି ଆଶା କରାଯାଉଛି ।
Comments are closed.