ଭୁବନେଶ୍ୱର: ‘ମୁଁ ଗୋଟେ ସଭାରେ ଥିଲି। ମୁଖ୍ୟମନ୍ତ୍ରୀ ମୋତେ ନିଜେ ଫୋନ କରି କହିଥିଲେ ମନ୍ତ୍ରୀମଣ୍ଡଳରେ ସାମିଲ ହେଉଛ। ମୁଁ ଅଭିଭୂତ ହୋଇପଡ଼ିଥିଲି।’ ଏମିତି କହି ମନ୍ତ୍ରୀ ହେବା ପରେ ନିଜର ଖୁସି ଜାହରି କରିଛନ୍ତି ଶାରଦା ନାଏକ ।
ଅବଶ୍ୟ ଗଣମାଧ୍ୟମକୁ ସାକ୍ଷାତ ଦେଇ ଶାରଦା କହିଛନ୍ତି, ମନ୍ତ୍ରୀ ପଦ ମିଳିବା ଖାଲି ଏକ ଖୁସିର କଥା ନୁହେଁ, ଏହା ଏକ ଦୟିତ୍ୱର କଥା । ଦାୟିତ୍ୱ ତୁଲାଇବା ପାଇଁ ମୁଖ୍ୟମନ୍ତ୍ରୀ ତାଙ୍କୁ ଯୋଗ୍ୟ ବୋଲି ଭାବିଥିବାରୁ ସେ କୃତଜ୍ଞତା ଜଣାଇବା ସହସେ ଖୁବ ଶୀଘ୍ର ତାଙ୍କ କାମ ଆରମ୍ଭ କରିବେ ବୋଲି କହିଛନ୍ତି । ଯଦି ଆବଶ୍ୟକ ପଡେ ଦଳରେ ପରିବର୍ତ୍ତନ ଆଣିବେ ବୋଲି ସେ କହିଛନ୍ତି ।
ରାଜ୍ୟ କ୍ୟାବିନେଟରେ ଆଜି ସାମିଲ ହୋଇଛନ୍ତି ତିନି ନୂଆ ମୁହଁ । ତିନି ନୂଆ ସଦସ୍ୟ ବିକ୍ରମ କେଶରୀ ଆରୁଖ, ଶାରଦା ନାଏକ ଏବଂ ସୁଦାମ ମାର୍ଣ୍ଡି ଆଜି କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଛନ୍ତି । ବିକ୍ରମ କେଶରୀ ଆରୁଖଙ୍କୁ ଅର୍ଥ ବିଭାଗ ଦାୟିତ୍ବ ମିଳିଥିବାବେଳେ ସୁଦାମ ମାର୍ଣ୍ଡିଙ୍କୁ ସ୍କୁଲ ଓ ଗଣଶିକ୍ଷା ଦାୟିିତ୍ୱ ଏବଂ ଶାରଦା ନାୟକଙ୍କୁ ଶ୍ରମ ବିଭାଗ ଦାୟିତ୍ୱ ମିଳିଛି ।
ଶାରଦା ନାଏକ ମନ୍ତ୍ରୀ ହେବାକୁ ନେଇ ଅନେକ କଥା ଚର୍ଚ୍ଚାକୁ ଆସିଛି । ଗଣମାଧ୍ୟମରେ ଚର୍ଚ୍ଚା ହେଉଛି, ଦୀପାଳି ଦାସ-ସୁଶାନ୍ତି ସିଂ କଳିରୁ ଲାଭ ଉଠେଇଛନ୍ତି ଶାରଦା । ପୂର୍ବରୁ ନବ ଦାସ-ସୁଶାନ୍ତ ସିଂଙ୍କ ମଧ୍ୟରେ ବ୍ୟାବସାୟିକ ଶତ୍ରୁତା ଲାଗି ରହିଥିଲା । ନବ ଦାସଙ୍କ ମୃତ୍ୟୁ ପରେ ବି ଏହି ବିବାଦ ଥମିନି । ଏବେ ନବଙ୍କ ସ୍ଥାନରେ ତାଙ୍କ ଝିଆ ଦୀପାଳି ।ଦୀପାଳିଙ୍କ ସହ ମଧ୍ୟ ସୁଶାନ୍ତଙ୍କର ଭଲ ପଡୁ ନ ଥିବା ଜଣାଯାଇଛି ।
ସେଥିପାଇଁ ଝାରସୁଗୁଡା ଉପନିର୍ବାଚନ ସମୟରେ ପ୍ରଚାର ତାଲିକାରେ ସୁଶାନ୍ତ ସିଂଙ୍କ ନାଁ ଥିଲେ ମଧ୍ୟ ସେ ପ୍ରଚାର ପାଇଁ ଯାଇ ନ ଥିଲେ । ଏପଟେ ପ୍ରଥମ ଥର ପାଇଁ ନିର୍ବାଚିତ ହେଲେ ମଧ୍ୟ ଦୀପାଳିଙ୍କୁ ମନ୍ତ୍ରୀ ପଦ ମିଳିବା ନେଇ ଚର୍ଚ୍ଚା ହେଉଥିଲା । ଏପଟେ ମନ୍ତ୍ରୀପଦ ପାଇବା ନେଇ ସୁଶାନ୍ତ ସିଂ ମଧ୍ୟ ଆଶାୟୀ ଥିଲେ । ହେଲେ ମୁଖ୍ୟମନ୍ତ୍ରୀ କାହାକୁ ବି ତାଙ୍କ ସଂପ୍ରସାରିତ ମନ୍ତ୍ରୀମଣ୍ଡଳରେ ସ୍ଥାନ ଦେଇ ନାହାନ୍ତି । ଏପରିକି ଆଜିର ଶପଥ ଗ୍ରହଣ ଉତ୍ସବରେ ନା ଦୀପାଳି ନା ସୁଶାନ୍ତ କାହାକୁ ବି ଦେଖିବାକୁ ମିଳି ନଥିଲା। ଏଣୁ କୁହାଯାଉଛି, ଦୁହିଁଙ୍କ ବିବାଦ ଶାରଦାଙ୍କ ଭାଗ୍ୟ ଖୋଲିଦେଲା ।
Comments are closed.