ମୁମ୍ବାଇ: ୨୦୨୫ ଇଦ୍ ଅବସରରେ ବକ୍ସ ଅଫିସରେ କମାଲ କରିବାକୁ ଆସୁଛନ୍ତି ବଲିଉଡର ଭାଇଜାନ। ରିଲିଜ ହୋଇଛି ସଲମାନ ଖାନଙ୍କ ଅଭିନୀତ ‘ସିକନ୍ଦର’ର ଟିଜର । ପୂର୍ବରୁ ୨୭ ଡିସେମ୍ବର ଅର୍ଥାତ ସଲମାନ ଖାନଙ୍କ ଜନ୍ମଦିନରେ ‘ସିକନ୍ଦର’ର ଟିଜର ମୁକ୍ତିଲାଭ କରିବା ପାଇଁ ନିର୍ଦ୍ଧାରିତ ହୋଇଥିଲା। ମାତ୍ର ପୂର୍ବତନ ପ୍ରଧାନମନ୍ତ୍ରୀ ଡକ୍ଟର ମନମୋହନ ସିଂହଙ୍କ ଦେହାନ୍ତ କାରଣରୁ ଏହାକୁ ସ୍ଥଗିତ ରଖାଯାଇଥିଲା। ଏହାପରେ ଗତକାଲି ‘ସିକନ୍ଦର’ ଟିଜର ମୁକ୍ତିଲାଭ କରିଥିଲା । ମୁକ୍ତିଲାଭ କରିବା ପରେ ଖୁବ ପ୍ରଶଂସା ସାଉଁଟୁଛି ‘ସିକନ୍ଦର’।
ଦମଦାର ଡାଇଲଗ୍ ସହ ବ୍ୟାକଗ୍ରାଣ୍ଡ ମ୍ୟୁଜିକ । ମାତ୍ର ୧.୪୧ ମିନିଟର ଏହି ଟିଜରରେ ସଲମାନ ଖାନଙ୍କ ଏଣ୍ଟ୍ରି ପ୍ରଶଂସକଙ୍କ ଉତ୍ସାହକୁ ଦ୍ଵିଗୁଣିତ କରିଛି । ଟିଜର ରିଲିଜ୍ ହେବା ମାତ୍ରେ ସାମାଜିକ ଗଣମାଧ୍ୟମରେ ‘ସିକନ୍ଦର’ ଟ୍ରେଣ୍ଡ କରିବାରେ ଲାଗିଛି। ସେପଟେ ଟିଜରରେ ଶୁଣିବାକୁ ମିଳୁଥିବା ସଲମାନଙ୍କ ସଂଳାପ ଗ୍ୟାଙ୍ଗଷ୍ଟାର ଲରେନ୍ସ ବିଷ୍ଣୋଇ ପାଇଁ କିଛି ସଂକେତ ଥିବା ନେଇ ସୋସିଆଲ ମିଡିଆରେ ଚର୍ଚ୍ଚା ହେଉଛି ।
କହିରଖୁଛୁ କି, ଡିସେମ୍ବର ୨୬ ତାରିଖ ସନ୍ଧ୍ୟାରେ ସିକନ୍ଦର ଫିଲ୍ମରେ ସଲମାନ ଖାନଙ୍କ ପ୍ରଥମ ଲୁକ୍ ସେୟାର କରି ଫ୍ୟାନ୍ସଙ୍କୁ ଖୁସି ଖବର ଦେଇଥିଲେ ନିର୍ମାତା । ସଲମାନ ଖାନଙ୍କ ୫୯ତମ ଜନ୍ମଦିନ ଅବସରରେ ତାଙ୍କ ଚଳଚ୍ଚିତ୍ର ‘ସିକନ୍ଦର’ର ଟିଜର ଡିସେମ୍ବର ୨୭ରେ ରିଲିଜ୍ ହେବାର ଥିଲା । କିନ୍ତୁ ପୂର୍ବତନ ପ୍ରଧାନମନ୍ତ୍ରୀଙ୍କ ଦେହାନ୍ତ ପରେ ଏହି ରିଲିଜକୁ ସ୍ଥଗିତ ରଖାଯାଇଥିଲା । ଏହାପରେ ଗତକାଲି ଏହାର ଟିଜର ରିଲିଜ ହୋଇଛି ।
ତେବେ ‘ସିକନ୍ଦର’ ଫିଲ୍ମ ୨୦୨୫ ମାର୍ଚ୍ଚ ଇଦ୍ ଅବସରରେ ରିଲିଜ ହେବ । ‘ସିକନ୍ଦର’ର ନିର୍ଦ୍ଦେଶନା ଦେଇଛନ୍ତି ଆର୍ ମୁରୁଗାଦୋସ । ସଲମାନଙ୍କ ସହ ପ୍ରଥମ ଥର ପାଇଁ କାମ କରିଛନ୍ତି ଏହି ନିର୍ଦ୍ଦେଶକ । ଏଥିସହ ଏହି ଫିଲ୍ମର ନିର୍ମାତା ଅଟନ୍ତି ସାଜିଦ ନାଦିଆଡୱାଲା । ବର୍ତ୍ତମାନ ୧୦ବର୍ଷ ପରେ ସଲମାନ ଖାନ ଏବଂ ସାଜିଦ ନାଦିଆଡୱାଲା ପୁଣିଥରେ ଏକାଠି କାମ କରିବାକୁ ଯାଉଛନ୍ତି । ‘ସିକନ୍ଦର’ରେ ସଲମାନଙ୍କ ସହ ପ୍ରଥମ ଥର ପାଇଁ ରଶ୍ମିକା ମନ୍ଦାନା ଲିଡ୍ ରୋଲରେ ଅଛନ୍ତି ।