ପୁରୀ: ଶ୍ରୀମନ୍ଦିରର ମୁଖ୍ୟ ପ୍ରବେଶ ଦ୍ୱାର ସିଂହଦ୍ୱାର ରୂପା ଛାଉଣୀରେ ଆଚ୍ଛାଦିତ ହେବା କାମ ଶେଷ ହୋଇଛି। ଭାଇ-ଭଉଣୀ ମନ୍ଦିର ଭିତରେ ପ୍ରବେଶ କରିବା ପୂର୍ବରୁ ଶେଷ ହୋଇଛି କାମ।
ମୁମ୍ବାଇରୁ ଆସିଥିବା କାରିଗରମାନେ ନିର୍ଦ୍ଧାରିତ ସମୟ ମଧ୍ୟରେ କାମ ଶେଷ କରିଥିଲେ। ପ୍ରାଚୀନ ଉତ୍କଳୀୟ ସ୍ଥାପତ୍ୟ ଅନୁସାରେ ରୂପା କଳସ ନିର୍ମାଣ କରାଯାଇଛି ସିହଂଦ୍ୱାରରେ। ଏଥିପାଇଁ ମୁମ୍ବାଇର ଜଣେ ଶ୍ରୀଜଗନ୍ନାଥ ଭକ୍ତ ୫୦୦ କିଲୋ ରୂପା ଦାନ କରିଥିଲେ।
ସିଂହଦ୍ୱାରରେ ହୋଇଥିବା ଏହି କାମ କରିବାର ପ୍ରକ୍ରିୟା ଅନ୍ୟମାନଙ୍କଠାରୁ ବେଶ୍ ଭିନ୍ନ। ଚାରି ଇଞ୍ଚ ଓସାର ବିଶିଷ୍ଟ ଶାଗୁଆନ କାଠକୁ ଷ୍ଟିଲ ଫ୍ରେମ୍ ଉପରେ ଲଗାଯାଇଛି। ଏହାପରେ କବାଟରେ ଶଙ୍ଖ ଓ ପଦ୍ମ ପରି ନକ୍ସା ଓ ଚିହ୍ନ ଥିବା ରୂପା ଥାଳିରେ ଲଗାଯାଇଛି। ଏହାର ସିଂହଦ୍ୱାର ଆହୁରି ଦୀର୍ଘ ଦିନ ଯାଏ ଠିକ୍ ରହିବ ଏବଂ ଖରାପ ହେବ ନାହିଁ । ସିଂହଦ୍ୱାରରେ ରୂପା ଲଗାଇବା ବେଳେ ବଲ୍ ଓ ବେରିଂ ଲଗାଯାଇଛି।
ସିଂହଦ୍ୱାର ରୂପା ଛାଉଣୀ ସମୟରେ ସିସିଟିଭି କ୍ୟାମେରା ଲଗାଯାଇଛି। ଏହି ଗୁରୁତ୍ୱପୂର୍ଣ୍ଣ କାମ କରିବା ସମୟରେ ମାଜିଷ୍ଟ୍ରେଟ୍ ଉପସ୍ଥିତ ରହିବା ସହ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା।
ଶୁକ୍ରବାର ହେବାକୁ ଥିବା ନୀଳାଦ୍ରି ବିଜେ ଉତ୍ସବ ଅବସରରେ ଗୁଣ୍ଡିଚା ମନ୍ଦିରକୁ ନବଦିନାତ୍ମକ ଯାତ୍ରା ଶେଷ କରିବା ପରେ ଶ୍ରୀଜଗନ୍ନାଥ ଓ ଭାଇ ଭଉଣୀ ବଳଭଦ୍ର ଓ ଦେବୀ ସୁଭଦ୍ରା ରୂପାବେଶରେ ସିଂହଦ୍ୱାର ଦେଇ ଶ୍ରୀମନ୍ଦିରକୁ ପ୍ରବେଶ କରିବେ।
ସିଂହଦ୍ୱାର ପୂର୍ବରୁ ସାତପାହାଚ, ଜୟବିଜୟ ଦ୍ୱାର, କଳାହାଟ ଦ୍ୱାର, ବେହାରା ଦ୍ୱାର ଓ ଭୋଗ ମଣ୍ଡପରେ ପ୍ରାଚୀନ ଉତ୍କଳୀୟ ସ୍ଥାପତ୍ୟ ଅନୁସାରେ ରୂପା ଲାଗି କରାଯାଇଥିଲା।
ଶ୍ରୀଜଗନ୍ନାଥ ମନ୍ଦିର ପ୍ରଶାସନ ମଧ୍ୟ ଆଗାମୀ ଦିନରେ ଶ୍ରୀମନ୍ଦିରର ଅନ୍ୟ ତିନି ଦ୍ୱାରରେ ରୂପା ଲାଗି କରିବାକୁ ନିଷ୍ପତ୍ତି ନେଇଛି।
Comments are closed.