ନୂଆଦିଲ୍ଲୀ: ଭାରତୀୟ ମହିଳା କ୍ରିକେଟ ଦଳର ବ୍ୟାଟ୍ସମ୍ୟାନ୍ ଓ ବିଶ୍ୱକପ୍ ବିଜୟିନୀ ସ୍ମୃତି ମନ୍ଧାନା ତାଙ୍କ ଇନଷ୍ଟାଗ୍ରାମରେ ସଂଗୀତଜ୍ଞ ପଲାଶ ମୁଚଲଙ୍କ ସହ ତାଙ୍କର ନିର୍ବନ୍ଧକୁ ନେଇ ଏକ ରିଲ୍ ସେୟାର କରିଛନ୍ତି।
ଜେମିମାହ ରଡ୍ରିଗ୍ସ, ଶ୍ରେୟଙ୍କା ପାଟିଲ୍, ରାଧା ଯାଦବ ଏବଂ ଅରୁନ୍ଧତୀ ରେଡ୍ଡିଙ୍କ ସହିତ ସ୍ମୃତି ୨୦୦୬ ମସିହାର ଫିଲ୍ମ “ଲଗେ ରହୋ ମୁନ୍ନା ଭାଇ”ର “ସମଝୋ ହୋ ହି ଗୟା” ଗୀତରେ ନୃତ୍ୟ କରୁଥିବାର ଏହି ଭିଡିଓରେ ଦେଖାଯାଇଛି। ଏଥିସହିତ ସେ ଭିଡିଓରେ ନିଜର ନିର୍ବନ୍ଧ ମୁଦିକୁ ମଧ୍ୟ ଦେଖାଇଥିଲେ।
ଗତ ଅକ୍ଟୋବର ମାସରେ ଇନ୍ଦୋରର ଷ୍ଟେଟ୍ ପ୍ରେସ୍ କ୍ଲବରେ ଏକ କାର୍ଯ୍ୟକ୍ରମରେ ଯୋଗଦେଇ ମୁଚଲ ସେମାନଙ୍କ ସମ୍ପର୍କ ବିଷୟରେ ଇଙ୍ଗିତ କରିଥିଲେ। ସ୍ମୃତି ଖୁବ୍ ଶୀଘ୍ର ଇନ୍ଦୋରର ବୋହୂ ହେବେ ବୋଲି ସେ ଏହି କାର୍ଯ୍ୟକ୍ରମରେ କହିଥିଲେ। ଭାରତର ଐତିହାସିକ ICC ମହିଳା ODI ବିଶ୍ୱକପ୍ ବିଜୟରେ ସ୍ମୃତି ନିଜ ବ୍ୟାଟ୍ ରେ ଚମତ୍କାର ପ୍ରଦର୍ଶନ କରିଥିଲେ। ସେ ନ୍ୟୁଜିଲ୍ୟାଣ୍ଡ ବିପକ୍ଷରେ ଏକ ମ୍ୟାଚ୍ ରେ ବିଜୟୀ ଶତକ ସହିତ ନଅଟି ଇନିଂସରେ ୫୪.୨୨ହାରରେ ୪୩୪ ରନ ହାସଲ କରିଥିଲେ।
୨୨ ମେ ୧୯୯୫ ରେ ମଧ୍ୟପ୍ରଦେଶର ଇନ୍ଦୋରରେ ଜନ୍ମଗ୍ରହଣ କରିଥିବା ପଲାଶ ମୁଚଲ ଏକ ମାରୱାଡି ପରିବାରର ସଦସ୍ୟ ଅଟନ୍ତି ଓ ତାଙ୍କ ପରିବାରରେ ସଙ୍ଗୀତ ପ୍ରାୟ ଏକ ପାରିବାରିକ ଭାଷା ଥିଲା। ତେବେ ତାଙ୍କ ଭଉଣୀ ପଲକ ମୁଚଲ ବଲିଉଡର ଜଣେ ଲୋକପ୍ରିୟ ପ୍ଲେବ୍ୟାକ୍ ଗାୟିକା ଅଟନ୍ତି କିନ୍ତୁ ପଲାଶ ବହୁତ କମ୍ ବୟସରେ ହିଁ ନିଜ ପାଇଁ ଏକ ଅଲଗା ପରିଚୟ ସୃଷ୍ଟି କରିଥିଲେ। ପଲାଶ ହିନ୍ଦୁସ୍ତାନୀ ଶାସ୍ତ୍ରୀୟ ସଙ୍ଗୀତରେ ତାଲିମପ୍ରାପ୍ତ କରିବା ସହ ସେ ଅନେକ ସଙ୍ଗୀତ ରଚନା ମଧ୍ୟ କରିଛନ୍ତି। କେବଳ ଏତିକି ନୁହେଁ ଉଭୟ ମୁଚଲ ଭାଇଭଉଣୀ ହୃଦ୍ ଅସ୍ତ୍ରୋପଚାର ଆବଶ୍ୟକ କରୁଥିବା ଅବହେଳିତ ପିଲାମାନଙ୍କ ପାଇଁ ପାଣ୍ଠି ସଂଗ୍ରହ କରିଥାନ୍ତି।
Comments are closed.