ଭାରତର କେଉଁ ରାଜ୍ୟରେ ଦେବାକୁ ପଡ଼ିନଥାଏ ଇନ୍‌କମ୍ ଟ୍ୟାକ୍ସ ? ଓଡ଼ିଶା ରହିଛି କି ଏହି ତାଲିକାରେ

ନୂଆଦିଲ୍ଲୀ: ଭାରତରେ ପ୍ରତିବର୍ଷ କୋଟି କୋଟି ଲୋକ ନିଜର ଆୟର ବିବରଣୀ ଇନକମ ଟ୍ୟାକ୍ସ ବିଭାଗକୁ ପ୍ରଦାନ କରନ୍ତି। ବେତନ, ବ୍ୟବସାୟ, ସେୟାର ମାର୍କେଟ କିମ୍ବା ନିବେଶରୁ ହେଉଥିବା ଆୟ ଉପରେ ଟ୍ୟାକ୍ସ ଦେବା ଏକ ସାଧାରଣ ବିଷୟ। କିନ୍ତୁ ଆପଣ ଜାଣନ୍ତି କି, ଭାରତରେ ଏପରି ଏକ ରାଜ୍ୟ ଅଛି, ଯେଉଁଠାରେ ଆୟ ଉପରେ ଶୂନ ଟ୍ୟାକ୍ସ ଲାଗେ? ଏହି ରାଜ୍ୟର ମୂଳ ନିବାସୀମାନେ ନିଜ ଆୟ ଉପରେ କୌଣସି ଇନକମ ଟ୍ୟାକ୍ସ ଦିଅନ୍ତି ନାହିଁ। ଏହା ପଛରେ କାରଣ କ’ଣ, ଆସନ୍ତୁ ଜାଣିବା।
କାହିଁକି ଏହି ଟ୍ୟାକ୍ସ ଛାଡ ମିଳିଛି?
ସିକ୍କିମ ହେଉଛି ଭାରତର ଏକମାତ୍ର ରାଜ୍ୟ, ଯେଉଁଠାରେ ଇନକମ ଟ୍ୟାକ୍ସ ଛାଡ ଦିଆଯାଇଛି। ଏହି ରାଜ୍ୟକୁ ଭାରତୀୟ ସମ୍ବିଧାନର ବିଶେଷ ଅନୁଚ୍ଛେଦ 371(F) ଅନୁଯାୟୀ ଏହି ଛାଡ ପ୍ରଦାନ କରାଯାଇଛି। 1975 ମସିହାରେ ଯେତେବେଳେ ସିକ୍କିମ ଭାରତର ଅଂଶ ହେଲା, ସେତେବେଳେ ସେଠାରେ ନିଜସ୍ୱ ପ୍ରଶାସନିକ ବ୍ୟବସ୍ଥା ଓ କର ପ୍ରଣାଳୀ ଥିଲା। ଭାରତ ସରକାର ସେତେବେଳେ ପ୍ରତିଶ୍ରୁତି ଦେଇଥିଲେ ଯେ ସିକ୍କିମର ପାରମ୍ପରିକ ନିୟମ ଓ କାନୁନକୁ ବଜାୟ ରଖାଯିବ। ଏହି ପ୍ରତିଶ୍ରୁତିକୁ ପୂରଣ କରିବା ପାଇଁ ସମ୍ବିଧାନରେ ଅନୁଚ୍ଛେଦ 371(F) ଯୋଡାଯାଇଥିଲା, ଯାହା ସିକ୍କିମକୁ ଏକ ବିଶେଷ ମାନ୍ୟତା ପ୍ରଦାନ କରିଛି।
ଏହା ସହିତ, ଇନକମ ଟ୍ୟାକ୍ସ ଆଇନର ଧାରା 10(26AAA) ଅନୁଯାୟୀ ସିକ୍କିମର ମୂଳ ନିବାସୀମାନଙ୍କୁ ଟ୍ୟାକ୍ସରୁ ସମ୍ପୂର୍ଣ୍ଣ ଛାଡ ଦିଆଯାଇଛି। ଏହି ଧାରା ଅନୁସାରେ, ସିକ୍କିମରେ ରହୁଥିବା ଓ ସେଠାକାର ସବଜେକ୍ଟ ସାର୍ଟିଫିକେଟ ଧାରୀ ଲୋକଙ୍କ ବେତନ, ବ୍ୟବସାୟ, ନିବେଶ, ସୁଧ କିମ୍ବା ସେୟାରରୁ ହେଉଥିବା ଆୟ ଉପରେ କୌଣସି ଟ୍ୟାକ୍ସ ଲାଗେ ନାହିଁ।
କେଉଁମାନେ ଏହି ସୁବିଧା ପାଆନ୍ତି ନାହିଁ?
ସିକ୍କିମରେ ଟ୍ୟାକ୍ସ-ମୁକ୍ତ ବ୍ୟବସ୍ଥା ସମସ୍ତଙ୍କ ପାଇଁ ଲାଗୁ ହୁଏ ନାହିଁ। ଏହି ଛାଡ କେବଳ ସେହି ଲୋକଙ୍କୁ ମିଳେ, ଯେଉଁମାନେ 1961 ମସିହାର ସିକ୍କିମ ସବଜେକ୍ଟ ରେଗୁଲେସନରେ ନାମ ଲେଖାଇଥିଲେ କିମ୍ବା ତାଙ୍କର ବଂଶଧର। ଅର୍ଥାତ୍, ଯେଉଁମାନେ ସିକ୍କିମର ମୂଳ ନିବାସୀ ନୁହନ୍ତି କିମ୍ବା ପରେ ଏଠାକୁ ଆସି ବସବାସ କରିଛନ୍ତି, ସେମାନଙ୍କୁ ଟ୍ୟାକ୍ସ ଦେବାକୁ ପଡେ। ଏହା ହିଁ କାରଣ ଯେ, ଯଦି କୌଣସି ବ୍ୟକ୍ତି ସିକ୍କିମରେ କାମ କରୁଛନ୍ତି କିନ୍ତୁ ସେଠାକାର ମୂଳ ନିବାସୀ ନୁହନ୍ତି, ତେବେ ସେମାନଙ୍କୁ ଭାରତର ଅନ୍ୟ ଅଞ୍ଚଳ ପରି ଇନକମ ଟ୍ୟାକ୍ସ ଦେବାକୁ ପଡିବ।
ଏହି ବ୍ୟବସ୍ଥା ଏପର୍ଯ୍ୟନ୍ତ କାହିଁକି ବଜାୟ ରହିଛି?
ସିକ୍କିମର ଟ୍ୟାକ୍ସ ଛାଡ କେବଳ ଆର୍ଥିକ ସୁବିଧା ନୁହେଁ, ବରଂ ଏହା ସାଂସ୍କୃତିକ ସଂରକ୍ଷଣର ଏକ ପ୍ରତୀକ। ଏହି ବ୍ୟବସ୍ଥା ସିକ୍କିମର ଐତିହାସିକ ଓ ସାମାଜିକ ପରିଚୟକୁ ବଜାୟ ରଖିବା ପାଇଁ ରଖାଯାଇଛି। ଏହା ଦ୍ୱାରା ସ୍ଥାନୀୟ ଲୋକଙ୍କୁ କେବଳ ଆର୍ଥିକ ସହାୟତା ମିଳୁନାହିଁ, ବରଂ ସେମାନଙ୍କର ପାରମ୍ପରିକ ଓ ସାମାଜିକ ଢାଞ୍ଚାକୁ ମଧ୍ୟ ସୁରକ୍ଷା ମିଳୁଛି।
ଦେଶର ଏକ ଅନନ୍ୟ ଟ୍ୟାକ୍ସ ମଡେଲ
ସିକ୍କିମ ହେଉଛି ଭାରତର ଏକମାତ୍ର ରାଜ୍ୟ, ଯେଉଁଠାରେ ମୂଳ ନିବାସୀମାନେ ଇନକମ ଟ୍ୟାକ୍ସ ଦିଅନ୍ତି ନାହିଁ। ଏହି ବ୍ୟବସ୍ଥା ଦେଶର ଅନ୍ୟ କୌଣସି ଅଞ୍ଚଳରେ ଦେଖାଯାଏ ନାହିଁ। ତେବେ, ସିକ୍କିମରେ ଅନ୍ୟ ପ୍ରକାରର କର ଯେପରିକି ଜିଏସଟି କିମ୍ବା ରାଜ୍ୟ ସରକାରଙ୍କ ଦ୍ୱାରା ଲାଗୁ ହେଉଥିବା ଟ୍ୟାକ୍ସ ପ୍ରଯୁଜ୍ୟ ରହିଛି। ଏହି ବିଶେଷ ଛାଡ ଯୋଗୁଁ ସିକ୍କିମ କେବଳ ପ୍ରଶାସନିକ ଦୃଷ୍ଟିରୁ ନୁହେଁ, ଆର୍ଥିକ ଦୃଷ୍ଟିରୁ ମଧ୍ୟ ଏକ ଅନନ୍ୟ ରାଜ୍ୟ ହୋଇପାରିଛି।