ନୂଆଦିଲ୍ଲୀ: ମହଙ୍ଗା ଜିନିଷର କଥା ଆସିଲେ ଆମ ମନରେ ସାଧାରଣତଃ ଲଗ୍ଜୁରି କାର୍, ସୁନା କିମ୍ବା ହୀରା ଭଳି ଜିନିଷ ହିଁ ଆସେ । କିନ୍ତୁ ଜାପାନରେ ଏକ ଏଭଳି ଖରବୁଜ ଅଛି, ଯାହାର ମୂଲ୍ୟ ଏକ ନୂଆ କାର୍ଠାରୁ ମଧ୍ୟ ଅଧିକ ହୋଇପାରେ । ଏହାର ନାମ ହେଉଛି ଯୁବାରି କିଙ୍ଗ ମେଲନ୍ । ଏହା କେବଳ ଜାପାନରେ ହିଁ ଚାଷ ହୋଇଥାଏ ଏବଂ ଦୁନିଆର ସବୁଠାରୁ ମହଙ୍ଗା ଫଳ ହୋଇଛି। ଆସନ୍ତୁ ଜାଣିବା, ଏହି ଖରବୁଜର ଏତେ ଅଧିକ ମୂଲ୍ୟ ପଛରେ କ’ଣ ରହସ୍ୟ ଲୁଚି ରହିଛି ।
ଯୁବାରି କିଙ୍ଗ ମେଲନ୍ କ’ଣ ?
ଏହା କ୍ୟାନ୍ଟାଲୁପ୍ର ଏକ ପ୍ରିମିୟମ ପ୍ରକାର । ଏହା କେବଳ ଜାପାନର ହୋକ୍କାଇଡୋ ଦ୍ୱୀପର ଯୁବାରି ଅଞ୍ଚଳରେ ହିଁ ଚାଷ ହୋଇଥାଏ । ଏହା କେବଳ ଏକ ଫଳ ନୁହେଁ, ବରଂ ଏକ ଲଗ୍ଜୁରି ଉତ୍ପାଦ । ଏହାର ପୂର୍ଣ୍ଣ ଗୋଲାକାର ଆକୃତି, ଚିକ୍କଣ ଜାଲିଦାର ଛାଲ, ଚମକଦାର ଗୁଆ ଏବଂ ଏଠି ପ୍ରବଳ ମିଠା ଥାଏ।
ଏହାର ବିଶେଷତ୍ୱ କ’ଣ ?
ଏହାର ଉଚ୍ଚ ମୂଲ୍ୟ ହିଁ ଏହାର ସବୁଠାରୁ ବଡ଼ ବିଶେଷତ୍ୱ । ଯୁବାରି କିଙ୍ଗ ମେଲନ୍କୁ ଏକ ଭୌଗୋଳିକ ପରିଚୟ ମିଳିଛି, ଯାହାର ଅର୍ଥ ଏହାକୁ କେବଳ ଯୁବାରି ଅଞ୍ଚଳରେ ହିଁ ଚାଷ କରାଯାଇପାରିବ । ସେଠାରେ ଥିବା ମାଟି ଜ୍ୱାଳାମୁଖୀ ଖଣିଜରେ ପରିପୂର୍ଣ୍ଣ ଏବଂ ଦିନ ଓ ରାତିର ତାପମାତ୍ରାର ବଡ଼ ପାର୍ଥକ୍ୟ ଏହାକୁ ପ୍ରବଳ ମିଠା ଓ ସୁଗନ୍ଧ ପ୍ରଦାନ କରେ ।
ଚାଷ ନୁହେଁ, ଏକ ବୈଜ୍ଞାନିକ ପରୀକ୍ଷା
ଏହି ଖରବୁଜକୁ ଗ୍ରୀନ୍ହାଉସ୍ ଭିତରେ ଅତ୍ୟନ୍ତ ଯତ୍ନରେ ନିୟନ୍ତ୍ରିତ ପରିବେଶରେ ଚାଷ କରାଯାଏ । କୃଷକମାନେ ତାପମାତ୍ରା, ଆର୍ଦ୍ରତା, ସୂର୍ଯ୍ୟ କିରଣ ଏବଂ ପାଣିର ଗୁଣବତ୍ତା ଉପରେ କଡା ନଜର ରଖନ୍ତି । ଅନେକ କ୍ଷେତ୍ରରେ ପ୍ରତ୍ୟେକ ଗଛରେ କେବଳ ଗୋଟିଏ ହିଁ ଖରବୁଜ ରଖାଯାଏ, ଯାହା ଦ୍ୱାରା ସମସ୍ତ ପୋଷକ ତତ୍ତ୍ୱ ସେହି ଏକ ଫଳକୁ ମିଳିଥାଏ ।
ଏହି ଖରବୁଜ ପ୍ରତିବର୍ଷ ଅତ୍ୟନ୍ତ କମ୍ ପରିମାଣରେ ଉତ୍ପନ୍ନ ହୋଇଥାଏ । ଯେଉଁ ଫଳଗୁଡ଼ିକ ମିଠା କିମ୍ବା ନିର୍ଦ୍ଦିଷ୍ଟ ମାନଦଣ୍ଡ ପୂରଣ କରେ ନାହିଁ, ସେଗୁଡ଼ିକୁ ରିଜେକ୍ଟ କରିଦିଆଯାଏ । ଏହି ଖରବୁଜର ପ୍ରଥମ ଫସଲକୁ ପାରମ୍ପରିକ ଭାବେ ନିଲାମରେ ବିକ୍ରି କରାଯାଏ । ଧନୀ କ୍ରେତାମାନେ, ବିଶେଷକରି କମ୍ପାନୀଗୁଡ଼ିକ ପ୍ରଚାର ଓ ପ୍ରତିଷ୍ଠା ପାଇଁ ଉଚ୍ଚ ବୋଲି ଲଗାନ୍ତି । ୨୦୧୯ ମସିହାରେ ଏକ ନିଲାମରେ ଦୁଇଟି ଯୁବାରି କିଙ୍ଗ ଖରବୁଜର ମୂଲ୍ୟ ପ୍ରାୟ ୩୭ ଲକ୍ଷ ଟଙ୍କାରୁ ଅଧିକ (୫ ମିଲିୟନ ୟେନ୍) ହୋଇଥିଲା, ଯାହା ରେକର୍ଡ ।
