ଲୋକାରଣ୍ୟ ହାଟ ଭିତରେ ସୁରକ୍ଷାକର୍ମୀଙ୍କ ବନ୍ଧୁକରୁ ଫୁଟିଲା ଗୁଳି; ୩ ଗୁରୁତର

ସୁନ୍ଦରଗଡ: ଲୋକାରଣ୍ୟ ସାପ୍ତାହିକ ବଜାର । ଚାଲିଥାଏ କିଣାବିକା । ହଠାତ ଫୁଟିଲା ଗୁଳି । କେହି କିଛି ବୁଝି ପାରି ନ ଥିଲେ । ସେତେବେଳେକୁ ଗୁଳିମାଡରେ ତିନିଜଣ ବ୍ୟକ୍ତି ଲହୁଲୁହାଣ ହୋଇ ପଡିଲେଣି । ଏମିତି ଘଟଣା ଆଜି ସକାଳୁ ଦେଖିବାକୁ ମିଳିଥିଲା ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ଥାନା ସାପ୍ତାହିକ ବଜାର ନିକଟରେ । ଗୁରୁତରମାନଙ୍କୁ ତୁରନ୍ତ  ଡାକ୍ତରଖାନା ନିଆ ଯାଇଥିଲା । ସେଠାରେ ସେମାନଙ୍କର ଚିକିତ୍ସା ଚାଲିଛି ।

ଗୁଳି ଫୁଟିବା ଶବ୍ଦ ଶୁଣି ହଇଚଇ ପଡି ଯାଇଥିଲା ।  ଲୋକେ ଭୟଭୀତ ହୋଇ ପଡିଥିଲେ । ପରେ ଜଣାପଡିଥିଲା, ସୁରକ୍ଷାକର୍ମୀଙ୍କ ବନ୍ଧୁକରୁ ଭୁଲରେ ଗୁଳି ଫୁଟି ଯାଇଥିଲା । ଘଟଣା ଥିଲା ଏମିତି ।  ସୁନ୍ଦରଗଡ଼ ଜିଲ୍ଲା ରାଜଗାଙ୍ଗପୁର ଥାନା ସାପ୍ତାହିକ ବଜାର ନିକଟ ଆଇସିଆଇସିଆଇ ବ୍ୟାଙ୍କ ଏଟିଏମ୍ ରେ ଟଙ୍କା ଭର୍ତ୍ତି କରିବାକୁ ଆସିଥିଲେ । ସୁରକ୍ଷାକର୍ମୀମାନେ ଟଙ୍କା ଭର୍ତ୍ତି ବାକ୍ସ ଓହ୍ଲାଇଲା ବେଳେ ଭୁଲ ବଶତଃ  ଫୁଟିଗଲା ବନ୍ଧୁକ । ଗୁଳିବାଜି ଜଣେ ମହିଳା ସମେତ ୩ ଗୁରୁତର ହୋଇଛନ୍ତି । ଆହତ ତିନି ଜଣଙ୍କୁ ମେଡିକାଲରେ ଭର୍ତ୍ତି କରାଯାଇଛି ।