ଶ୍ରୀନଗର:ଜମ୍ମୁ-କଶ୍ମୀରରେ ସୁରକ୍ଷାବଳ ଏବଂ ଆତଙ୍କବାଦୀ ମୁହାଁମୁହିଁ ହୋଇଛନ୍ତି । ଆତଙ୍କୀଙ୍କ ବୋମା ମାଡରେ ୫ ଯବାନ ସହିଦ ହୋଇଛନ୍ତି । ଅନ୍ୟଜଣେ ଗୁରୁତର ଅବସ୍ଥାରେ ଜଣେ ଚିକିତ୍ସିତ ହେଉଛନ୍ତି ।
ପ୍ରଥମେ ଗୁରୁତର ଅବସ୍ଥାରେ ୪ ଜଣ ଯବାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ହେଲେ ଚିକିତ୍ସାଧୀନ ଅବସ୍ଥାରେ ୩ ଜଣଙ୍କର ମୃତ୍ୟୁ ଘଟିଛି । ଏଥିରେ ଏକାଧିକ ଆତଙ୍କୀ ନିହତ ହୋଇଥିବା ଜଣାଯାଇଛି । ଏହି ଘଟଣା ପରେ ସେନାର ଅପରେଶନ ଜାରି ରହିଛି । ସୁରକ୍ଷାକୁ ଦୃଷ୍ଟିରେ ରଖି ଇଣ୍ଟରନେଟ ସେବା ବନ୍ଦ କରି ଦିଆ ଯାଇଛି । ଆହତ ଯବାନଙ୍କୁ ହେଲିକପ୍ଟରରେ ଡାକ୍ତରଖାନା ପଠାଯାଇଛି।
ମିଳିଥିବା ସୂଚନା ଅନୁଯାୟୀ, ଖରାପ ପାଗ ସାଙ୍ଗକୁ ବର୍ଷା ବି ଲାଗି ରହିଛି । ଏପରି ପାଗରେ ଆତଙ୍କୀମାନେ ଆକ୍ରମଣ କରିଥିଲେ । ଜମ୍ମୁର ଘାଟଘୁରିୟନରେ ତୋତା ଗଳି ଅଞ୍ଚଳରେ ଆତଙ୍କୀମାନେ ଯବାନଙ୍କ ଉପରକୁ ଆକ୍ରମଣ କରି ଦେଇଥିଲେ । ଏହାପରେ ଲୁଚି ରହିଥିବା ଆତଙ୍କୀଙ୍କୁ ଖୋଜି ବାହାର କରିବା ପାଇଁ ସେନା ଅପରେଶନ ଆରମ୍ଭ ହୋଇଥିଲା ।
ରାଜୌରୀ ସେକ୍ଟରର କଣ୍ଡି ଜଙ୍ଗଲରେ ଆତଙ୍କୀ ଲୁଚି ରହିଥିବା ଖବର ମେ’ ୩ ତାରିଖରେ ମିଳିଥିଲା । ମେ’ ୫ ତାରିଖ ସକାଳ ପ୍ରାୟ ସାଢେ ୭ଟା ବେଳେ ଆତଙ୍କୀଙ୍କୁ ଠାବ କରିଥିଲା ସେନା । ଆତଙ୍କୀମାନେ ଏଠାରେ ଥିବା ଏକ ଗୁମ୍ଫାରେ ଲୁଚି ରହିଥିଲେ । ଯବାନମାନେ ତାଙ୍କୁ ବାହାରକୁ ଆଣିବା ପାଇଁ ଚେଷ୍ଟା କରୁଥିବାବେଳେ ସେମାନେ ବୋମାମାଡ କରିଥିଲେ । ୨ ଜଣ ଯବାନ ସହିଦ ହୋଇଥିଲେ । ଏହି ଆକ୍ରମଣରେ ଜଣେ ଅଧିକାରୀଙ୍କ ସମେତ ୪ ଜଣ ସୈନିକ ଆହତ ହୋଇଥିଲେ। ଚିକିତ୍ସାଧୀନ ଅବସ୍ଥାରେ ୩ ଜଣ ସହିଦ ହେଇଛନ୍ତି ।