ନୂଆଦିଲ୍ଲୀ: ଯୁବ ବ୍ୟାପାର ଏବଂ କ୍ରୀଡ଼ା ମନ୍ତ୍ରୀ କିରେନ ରିଜିଜୁ ବୁଧବାର ମେଜର ଧାନ ଚାନ୍ଦ ଷ୍ଟାଡିୟମରେ ସ୍ପୋର୍ଟସ ଅଥରିଟି ଅଫ୍ ଇଣ୍ଡିଆ (SAI) ର ଏକ ନୂଆ ଲୋଗୋ ଲଞ୍ଚ କରିଛନ୍ତି।
ଏହା କ୍ରୀଡା ଇକୋସିଷ୍ଟମରେ ଅଗ୍ରଣୀ ଏବଂ କ୍ରୀଡା ଉତ୍କର୍ଷକୁ ପ୍ରୋତ୍ସାହିତ କରିବାର ପ୍ରାଥମିକ ଏଜେଣ୍ଟ । ଏହା ଆଥଲେଟ ମାନଙ୍କୁ ଆବଶ୍ୟକ ସହାୟତା ପ୍ରଦାନ କରିଛି ଯାହା ଦ୍ୱାରା ସେମାନଙ୍କର କ୍ରୀଡା କ୍ୟାରିଅର୍ ସୁରୁଖୁରୁରେ ଆଗକୁ ଯିବେ ଓ ସଫଳ ହେବେ ବୋଲି କହିଛନ୍ତି କ୍ରୀଡ଼ା ମନ୍ତ୍ରୀ ।
ଲୋଗୋର ମହତ୍ତ୍ୱ ବ୍ୟାଖ୍ୟା କରି ସେ କହିଛନ୍ତି, ଲୋଗୋର ଫ୍ଲାଇଙ୍ଗ୍ ଫିଗର୍ ସୂଚାଇଥାଏ ଯେ ଜଣେ ଆଥଲେଟ୍ କିପରି ନିଜ ସ୍ୱପ୍ନ ପୁରା କରିବାକୁ ଉଡ଼ିପାରେ ଓ ଏଥି ପାଇଁ SAI ର ଅବଦାନକୁ ଏହା ସୂଚିତ କରୁଛି ।
SAI ଶବ୍ଦ ବିଭିନ୍ନ ହିତାଧିକାରୀଙ୍କ ମଧ୍ୟରେ ସଂଗଠନକୁ ପରିଚୟ ପ୍ରଦାନ କରିଥାଏ ଯାହାକି ଭାରତର କ୍ରୀଡ଼ା ପ୍ରାଧିକରଣର ସଂକ୍ଷିପ୍ତ ଶବ୍ଦ ଅଟେ । ଭାରତୀୟ ତ୍ରିରଙ୍ଗା ଏବଂ ଚକ୍ରର ନୀଳ ରଙ୍ଗ ଜାତୀୟ ଉତ୍ସାହକୁ ଯୋଡିଥାଏ କାରଣ SAI କ୍ରୀଡ଼ା କ୍ଷେତ୍ରରେ ବଡ ନାମ ପ୍ରତିପୋଷଣ କରିଛି, ଯେଉଁମାନେ ବିଶ୍ୱ ସ୍ତରରେ ଭାରତର ପ୍ରତିନିଧିତ୍ୱ କରୁଛନ୍ତି ବୋଲି ରିଜିଜୁ କହିଛନ୍ତି।
ଜନସାଧାରଣଙ୍କୁ SAI ପାଇଁ ଏକ ଲୋଗୋ ଡିଜାଇନ୍ କରିବାକୁ ନିମନ୍ତ୍ରଣ କରାଯାଇଥିଲା । ବହୁ ସଂଖ୍ୟକ ଏଣ୍ଟ୍ରି ଗ୍ରହଣ କରାଯାଇଥିଲା, ଯେଉଁଥିରୁ ଗୋଟିଏ ଚୟନ କରାଯାଇଥିଲା ।
ଏହି ଉତ୍ସବରେ ଭାରତୀୟ ଅଲିମ୍ପିକ୍ ଆସୋସିଏସନ୍ ସଭାପତି ନରିନ୍ଦର ବତ୍ରା ଏବଂ SAI ମହାନିର୍ଦ୍ଦେଶକ ସନ୍ଦୀପ ପ୍ରଧାନ ବ୍ୟକ୍ତିଗତ ଭାବେ ଯୋଗ ଦେଇଥିବାବେଳେ ଭିଡିଓ ଲିଙ୍କ୍ ମାଧ୍ୟମରେ ଦେଶର ବିଭିନ୍ନ ସ୍ଥାନରୁ ବିଶିଷ୍ଟ ଆଥଲେଟ୍, କୋଚ୍ ଏବଂ କ୍ରୀଡା ଉତ୍ସାହୀ ଯୋଗ ଦେଇଥିଲେ।