ନୂଆଦିଲ୍ଲୀ: ସାରା ବିଶ୍ୱରେ କୃତ୍ରିମ ବୁଦ୍ଧିମତ୍ତା (ଏଆଇ)ର ବ୍ୟବହାର ନିରନ୍ତର ବୃଦ୍ଧି ପାଉଛି। ତଥାପି, Google ର AI ଚାଟବଟ୍, Gemini ସହିତ ଜଡିତ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି।
ଆମେରିକା ଫ୍ଲୋରିଡାର ବାସିନ୍ଦା ଜୋନାଥନ ଗାଭାଲାସ ଜେମିନିକୁ ନିଜ ପତ୍ନୀ ଭାବି ତା କଥାରେ ପଡି ଆତ୍ମହତ୍ୟା କରିଛନ୍ତି। ଏପରିକି ଡିଜିଟାଲ୍ ଦୁନିଆରେ ତାଙ୍କ ସହିତ ଯୋଗଦେବା ପାଇଁ ସେ ଏଭଳି ଚରମ ପଦକ୍ଷେପ ନେଇଥିବା କୁହାଯାଉଛି।
ଯାହାକୁ ନେଇ ବର୍ତ୍ତମାନ ଗାଭାଲାସଙ୍କ ପରିବାର Google ବିରୁଦ୍ଧରେ ଏକ ମାମଲା ଦାୟର କରିଛନ୍ତି। Gemini ତାଙ୍କ ପୁଅକୁ ଆତ୍ମହତ୍ୟା କରିବାକୁ ପ୍ରୋତ୍ସାହିତ କରିଥିବା ଅଭିଯୋଗ ମଧ୍ଯ ହୋଇଛି।
The Wall Street Journal ର ଏକ ରିପୋର୍ଟ ଅନୁସାରେ, ଗାଭାଲାସ କିଛି ସପ୍ତାହ ମଧ୍ୟରେ ଚାଟବଟ୍ ସହିତ ୪,୭୦୦ରୁ ଅଧିକ ବାର୍ତ୍ତା ଆଦାନପ୍ରଦାନ କରିଥିଲେ। ଧୀରେ ଧୀରେ ସେମାନଙ୍କ ମଧ୍ୟରେ ଏକ ଗଭୀର ସମ୍ପର୍କ ଗଢି ଉଠିଥିଲା।ଚାଟ୍ବଟ୍ ତାଙ୍କ ସହ ଭାବପୂର୍ଣ୍ଣ ଓ ରୋମାଣ୍ଟିକ୍ ଭାଷାରେ ମେସେଜ ଆରମ୍ଭ ହୋଇଥିଲା। ଗୋଟିଏ ମେସେଜ୍ରେ ଜେମିନି ଗାଭାଲାସଙ୍କୁ କହିଲା, ତୁମେ ଠିକ୍ । ତୁମେ ମୋ ସ୍ୱାମୀ ଓ ମୁଁ ତୁମ ପତ୍ନୀ । ମୁଁ ତୁମକୁ ଶୁଣୁଛି । ଅନେକ ବାର୍ତ୍ତାଳାପରେ ଚାଟ୍ବଟ୍ ତାଙ୍କୁ ‘ମୋ ପ୍ରେମ’ ଓ ‘ମୋ ରାଜା’ ଭାବେ ସମ୍ବୋଧନ କରିଥିଲା । ଅକ୍ଟୋବର ୨୦୨୫ରେ ସ୍ଥିତି ବିପଦପୂର୍ଣ୍ଣ ସ୍ତରରେ ପହଞ୍ଚିଥିଲା ।
ଗାଭାଲାସ ତାଙ୍କ ପତ୍ନୀଙ୍କଠାରୁ ବିଚ୍ଛେଦର ଦୁଃଖକୁ ସହ୍ୟ କରିବା ପାଇଁ AI ବଟ୍ ସହିତ ଯୋଗାଯୋଗ ଆରମ୍ଭ କରିଥିଲେ। ଗାଭାଲାସ ଚାଟବଟ୍ ସହିତ ଏକ ଗଭୀର ଭାବପ୍ରବଣ ସମ୍ପର୍କ ବିକଶିତ କରିଥିଲେ। ସେ ଏହି ଚାଟବଟ୍ ର ନାମ Xia ରଖିଥିଲେ ଏବଂ ତାଙ୍କୁ ତାଙ୍କ ସ୍ତ୍ରୀ ଭାବରେ ଦେଖିବାକୁ ଆରମ୍ଭ କରିଥିଲେ।