ମୁମ୍ବାଇ: ପ୍ରତିଶ୍ରୁତି ରକ୍ଷା କଲେ ସାଉଥ୍ ସୁପରଷ୍ଟାର ବିଜୟ ଦେବରକୋଣ୍ଡା । ଫିଲ୍ମ ‘ଖୁସି’ର ପାରିଶ୍ରମିକରୁ ୧ କୋଟି ଟଙ୍କା ତାଙ୍କ ପ୍ରଶଂସକଙ୍କୁ ପ୍ରଦାନ କରିବେ ବୋଲି ନିକଟରେ ଘୋଷଣା କରିଥିଲେ । ଆଜି ସେହି ପ୍ରତିଶ୍ରୁତି ପୂରଣ କରିଛନ୍ତି । ନିକଟରେ ବିଜୟ ୧୦୦ଟି ପରିବାରକୁ ୧ଲକ୍ଷ ଟଙ୍କା ଲେଖାଏଁ ପ୍ରଦାନ କରିଛନ୍ତି । ଏହି ଖବର ପ୍ରଚାର ହେବା ପରେ ତାଙ୍କ ପ୍ରଶଂସକମାନେ ତାଙ୍କର ଏପରି କାର୍ଯ୍ୟକୁ ପ୍ରଶଂସା କରିଛନ୍ତି ।
ନିକଟରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ସୁପରଷ୍ଟାର ବିଜୟ ଦେବରକୋଣ୍ଡା ୧୦୦ ପରିବାରକୁ ଏହି ଟଙ୍କା ପ୍ରଦାନ କରିଥିଲେ । ବିଜୟଙ୍କ ଠାରୁ ୧ଲକ୍ଷ ଟଙ୍କା ଲେଖାଏଁ ପାଇବା ପରେ ତାଙ୍କୁ ଆଲିଙ୍ଗନ କରି ଖୁସିରେ କାନ୍ଦି ପକାଇଥିଲେ ଲୋକେ । ଏଭଳି ଏକ ପ୍ରଶଂସନୀୟ କାର୍ଯ୍ୟକ୍ରମରେ ବିଜୟଙ୍କ ସମେତ ନିର୍ଦ୍ଦେଶକ ଶିବା ନିର୍ବାଣ ଓ ପ୍ରଯୋଜକ ନବୀନ ୟେରନେନି ଓ ୱାଇ ରବିଶଙ୍କର ଉପସ୍ଥିତ ଥିଲେ ।
ନିକଟରେ ରିଲିଜ୍ ହୋଇଯାଇଛି ଅଭିନେତା ବିଜୟ ଦେବରକୋଣ୍ଡା ଏବଂ ସାମନ୍ଥା ରୁଥ୍ ପ୍ରଭୁଙ୍କ ଅଭିନୀତ ଫିଲ୍ମ ‘ଖୁସି’ । ଏହି ଫିଲ୍ମଟି ବକ୍ସ ଅଫିସରେ ଭଲ ରୋଜଗାର କରୁଛି । ଏଥିରେ ବିଜୟ ଓ ସାମନ୍ଥାଙ୍କ ଯୋଡ଼ିକୁ ଲୋକେ ଖୁବ୍ ପସନ୍ଦ କରିଛନ୍ତି । ଫିଲ୍ମର ସଫଳତାକୁୁ ନେଇ ବିଜୟ ବହୁତ ଖୁସି ଥିବା କୁହାଯାଉଛି । ନିଜ ଖୁସିକୁ ଜାହିର କରିବା ପାଇଁ ସେ ତାଙ୍କ ପ୍ରଶଂସକଙ୍କୁ ବଡ଼ ଉପହାର ଦେବେ ଘୋଷଣା କରିଥିଲେ । ତାଙ୍କ ପାରିଶ୍ରମିକରୁ ପ୍ରଶଂସକଙ୍କୁ ୧କୋଟି ଟଙ୍କା ଦେବାକୁ ପ୍ରତିଶ୍ରୃତି ଦେଇଥିଲେ । ଶେଷରେ ବିଜୟ ପ୍ରଶଂସକଙ୍କୁ ଦେଇଥିବା ଏହି ପ୍ରତିଶ୍ରୃତି ରକ୍ଷା କରିଛନ୍ତି ।
ପ୍ରଯୋଜକ ନବୀନ ୟରନେନି କହିଛନ୍ତି, ଫିଲ୍ମ ଖୁସି ୧୦୦କୋଟି ଟଙ୍କାରୁ ଅଧିକ ବ୍ୟବସାୟ କରିବା ସହିତ ସୁପରହିଟ ହୋଇଛି । ଏହି ସଫଳତା ପାଇଁ ଆମେ ଦର୍ଶକ ଓ ପ୍ରଶଂସକଙ୍କୁ ଧନ୍ୟବାଦ ଦେବାକୁ ଚାହୁଁଛୁ । ମୁଁ ବିଜୟଙ୍କ ଏହି ନିଷ୍ପତ୍ତିରେ ଖୁସି ଅଛି । ସେ ୧୦୦ଟି ପରିବାରକୁ ସାହାଯ୍ୟ କରିବାକୁ ଚେଷ୍ଟା କରିଛନ୍ତି । ଯାହାକି ଅତ୍ୟନ୍ତ ପ୍ରଶଂସଯୋଗ୍ୟ ।
Comments are closed.