ଜୟପୁର: ଚଳିତ ବିଜୟ ହଜାରେ ଟ୍ରଫି କ୍ରିକେଟରେ ଓଡିଶା ୯ ୱିକେଟରେ ମଣିପୁରକୁ ପରାସ୍ତ କରିିଛି । ଏହି ସମ୍ପୂର୍ଣ୍ଣ ଏକତରଫା ମ୍ୟାଚରେ ପ୍ରଥମେ ବ୍ୟାଟିଂ କରି ମଣିପୁର ୪୦ ଓଭରରେ ୧୦୦ ରନ କରି ଅଲଆଉଟ ହୋଇ ଯାଇଥିଲା । ବସିର ରହେମାନ ସର୍ବାଧିକ ୨୦ ରନ କରିଥିଲେ । ୬ଜଣ ବ୍ୟାଟ୍ସମ୍ୟାନ ଦୁଇ ଅଙ୍କ ଛୁଇଁ ପାରି ନ ଥିଲେ । ଓଡିଶା ପକ୍ଷରୁ ତାପସ ଦାସ ୪ଟି ଓ ରାଜେଶ ମହାନ୍ତି ୩ଟି ୱିକେଟ ଅକ୍ତିଆର କରିଥିଲେ । ୧୦୧ ରନର ବିଜୟ ଲକ୍ଷ୍ୟକୁ ଓଡିଶା ୨୦ ଓଭରରେ ଗୋଟିଏ ୱିକେଟ ହରାଇ ହାସଲ କରି ନେଇଥିଲା । ସ୍ୱସ୍ତିକ ସାମଲ ୫୦ ଓ ଅଧିନାୟକ ସନ୍ଦୀପ ପଟ୍ଟନାୟକ ୨୪ ରନ କରି ଅପରାଜିତ ରହିଥିଲେ । ବର୍ଷା ଯୋଗୁ ୫୦ ଓଭର ବିଶିଷ୍ଟ ମ୍ୟାଚକୁ ୪୭ ଓଭର କରାଯାଇଥିଲା ।
ବିଜୟ ସହ ଓଡିଶା ୪ଟି ମ୍ୟାଚରୁ ୮ ପଂଏଟ ହାସଲ କରିଛି । ଝାଡଖଣ୍ଡ, ହରିୟାଣା ଓ ଗୁଜରାଟ ବିପକ୍ଷରେ ଓଡିଶା ମ୍ୟାଚ ଖେଳିବ । ଏହି ୩ଟି ମ୍ୟାଚରେ ବିଗଜୟ ହାସଲ କରି ଓଡିଶା ନକଆଉଟ ପର୍ଯ୍ୟାୟରେ ପ୍ରବେଶ କରିବା ପାଇଁ ଉଦ୍ୟମ କରିବ । ଅବଶ୍ୟ ଏଥିପାଇଁ ଅନ୍ୟ ମ୍ୟାଚର ଫଳାଫଳ ଉପରେ ଦଳକୁ ନିର୍ଭର କରିବାକୁ ପଡିବ । ଏହା ପୂର୍ବ ମୁକାବିଲାରେ ଉତରାଖଣ୍ଡକୁ ଓଡିଶା ପରାସ୍ତ କରିଥିଲା ।