ନୂଆଦିଲ୍ଲୀ: ଆଜିର ଡିଜିଟାଲ ଦୁନିଆରେ ୟୁଟ୍ୟୁବ କେବଳ ଏକ ଭିଡିଓ ପ୍ଲାଟଫର୍ମ ନୁହେଁ, ବରଂ କ୍ୟାରିୟର ଗଢ଼ିବା ଓ ବ୍ରାଣ୍ଡ ତିଆରି କରିବାର ଏକ ଶକ୍ତିଶାଳୀ ମାଧ୍ୟମ ହୋଇଛି। ପ୍ରତିଦିନ ଲକ୍ଷ ଲକ୍ଷ ଭିଡିଓ ଅପଲୋଡ ହେଉଛି, କିନ୍ତୁ ସେଥିରୁ କେବଳ କିଛି ଭିଡିଓ ହିଁ ଭାଇରାଲ ହେଉଛି। କେବେ ଭାବିଛନ୍ତି କି, ଏକ ଭିଡିଓ ଭାଇରାଲ ହେବା ପଛରେ କେବଳ କଣ୍ଟେଣ୍ଟ ନୁହେଁ, ବରଂ ଭିଡିଓ ଅପଲୋଡ କରିବାର ସଠିକ ସମୟ ମଧ୍ୟ ଏକ ବଡ଼ ଭୂମିକା ନେଇଥାଏ?
ଯଦି ଆପଣ ୟୁଟ୍ୟୁବରେ ଦ୍ରୁତ ବୃଦ୍ଧି କରିବାକୁ ଚାହୁଁଛନ୍ତି ଏବଂ ଆପଣଙ୍କ ଭିଡିଓ ଲକ୍ଷାଧିକ ଦର୍ଶକଙ୍କ ପାଖରେ ପହଞ୍ଚିବାକୁ ଚାହୁଁଛନ୍ତି, ତେବେ କେଉଁ ସମୟରେ ଭିଡିଓ ଅପଲୋଡ କଲେ ଅଧିକ ଲାଭଦାୟକ ହେବ, ତାହା ଜାଣିବା ଆବଶ୍ୟକ।
ସଠିକ ସମୟର ମହତ୍ୱ
ୟୁଟ୍ୟୁବରେ ଭିଡିଓ ଅପଲୋଡ କରିବା ପରେ ପ୍ରଥମ କିଛି ଘଣ୍ଟା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହି ସମୟରେ ଯଦି ଅଧିକ ସଂଖ୍ୟକ ଦର୍ଶକ ଭିଡିଓ ଦେଖନ୍ତି, ଲାଇକ କରନ୍ତି ଓ ମନ୍ତବ୍ୟ ଦିଅନ୍ତି, ତେବେ ୟୁଟ୍ୟୁବର ଆଲଗୋରିଦମ ତାହାକୁ ପ୍ରୋମୋଟ କରିବା ଆରମ୍ଭ କରେ। ଏହା ହିଁ ଭିଡିଓକୁ ଭାଇରାଲ କରିବାର ପ୍ରଥମ ପଦକ୍ଷେପ।
ରିସର୍ଚ କ’ଣ କହୁଛି?
ବିଶ୍ୱର ବିଭିନ୍ନ ୟୁଟ୍ୟୁବ ବିଶେଷଜ୍ଞ ଓ ଡାଟା ବିଶ୍ଳେଷକଙ୍କ ରିପୋର୍ଟ ଅନୁସାରେ, ସପ୍ତାହର କାର୍ଯ୍ୟଦିବସ (ସୋମବାରରୁ ଶୁକ୍ରବାର) ଓ ସପ୍ତାହାନ୍ତ (ଶନିବାର ଓ ରବିବାର) ପାଇଁ ଭିଡିଓ ଅପଲୋଡର ସମୟ ଭିନ୍ନ ଭିନ୍ନ ଫଳାଫଳ ଦେଇଥାଏ।
ସୋମବାରରୁ ଶୁକ୍ରବାର:
- ଅପରାହ୍ନ ୨ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ: ଅଫିସ ଓ ସ୍କୁଲ ଶେଷ ହେବା ପରେ ଲୋକେ ଫ୍ରି ହୁଅନ୍ତି ଏବଂ ୟୁଟ୍ୟୁବ ବ୍ରାଉଜ କରନ୍ତି।
- ସନ୍ଧ୍ୟା ୭ଟାରୁ ରାତି ୯ଟା ମଧ୍ୟରେ: ଏହା ହେଉଛି ପ୍ରାୟମ ଟାଇମ, ଯେତେବେଳେ ଅଧିକାଂଶ ଲୋକ ୟୁଟ୍ୟୁବରେ ସକ୍ରିୟ ଥାଆନ୍ତି।
ଶନିବାର ଓ ରବିବାର:
- ସକାଳ ୧୦ଟାରୁ ଅପରାହ୍ନ ୧ଟା ପର୍ଯ୍ୟନ୍ତ: ସପ୍ତାହାନ୍ତରେ ଲୋକେ ଦେରିରେ ଉଠନ୍ତି ଏବଂ ଫ୍ରି ସମୟରେ ୟୁଟ୍ୟୁବ ଦେଖନ୍ତି।
- ସନ୍ଧ୍ୟା ୬ଟାରୁ ରାତି ୯ଟା ପର୍ଯ୍ୟନ୍ତ: ସପ୍ତାହାନ୍ତରେ ଏହା ହେଉଛି ମନୋରଞ୍ଜନର ସର୍ବାଧିକ ସମୟ।
ମୋବାଇଲ ବ୍ୟବହାରକାରୀଙ୍କୁ ଦୃଷ୍ଟିରେ ରଖନ୍ତୁ
ଆଜିର ସମୟରେ ୟୁଟ୍ୟୁବର ୭୦%ରୁ ଅଧିକ ଦର୍ଶକ ମୋବାଇଲ ଫୋନ ମାଧ୍ୟମରେ ଭିଡିଓ ଦେଖିଥାନ୍ତି। ତେଣୁ, ଭିଡିଓ ଅପଲୋଡ କରିବା ସମୟରେ ମୋବାଇଲ ଆକ୍ସେସିବିଲିଟି ଓ ଲୋକଙ୍କ ଫ୍ରି ସମୟକୁ ଧ୍ୟାନ ଦେବା ଜରୁରୀ। ଅଫିସ ଲଞ୍ଚ ଟାଇମ (ମଧ୍ୟାହ୍ନ ୧ଟାରୁ ୨ଟା) ଓ ଯାତ୍ରା ସମୟ (ସନ୍ଧ୍ୟା ୫ଟାରୁ ୭ଟା) ମଧ୍ୟ ଭିଡିଓ ଅପଲୋଡ ପାଇଁ ଉପଯୁକ୍ତ ସମୟ ବୋଲି କୁହାଯାଏ।
ଆପଣଙ୍କ ପାଇଁ କେଉଁ ସମୟ ଉପଯୁକ୍ତ?
ପ୍ରତ୍ୟେକ ୟୁଟ୍ୟୁବ ଚ୍ୟାନେଲର ଦର୍ଶକ ଭିନ୍ନ ହୋଇଥାନ୍ତି। ତେଣୁ, ୟୁଟ୍ୟୁବ ଆନାଲିଟିକ୍ସ ଯାଞ୍ଚ କରିବା ଅତ୍ୟନ୍ତ ଜରୁରୀ। ଏହା ଆପଣଙ୍କୁ ଜଣାଇବ ଯେ ଆପଣଙ୍କ ଦର୍ଶକମାନେ କେଉଁ ଦିନ ଓ କେଉଁ ସମୟରେ ସବୁଠାରୁ ଅଧିକ ସକ୍ରିୟ ରହୁଛନ୍ତି। ଏହା ଅନୁସାରେ ଆପଣ ଆପଣଙ୍କ ଭିଡିଓ ଅପଲୋଡ ସମୟ ନିର୍ଧାରଣ କରିପାରିବେ।
କିଛି ପ୍ରୋ ଟିପ୍ସ
୧. ଭିଡିଓ ଶିଡ୍ୟୁଲ କରନ୍ତୁ: ନିର୍ଦ୍ଦିଷ୍ଟ ସମୟରେ ଭିଡିଓ ଅପଲୋଡ ହେବା ପାଇଁ ୟୁଟ୍ୟୁବର ଶିଡ୍ୟୁଲ ଫିଚର ବ୍ୟବହାର କରନ୍ତୁ।
୨. ଆକର୍ଷଣୀୟ ଥମ୍ବନେଲ ଓ ଟାଇଟେଲ: ଭିଡିଓର ଥମ୍ବନେଲ ଓ ଶୀର୍ଷକ ଏତେ ଆକର୍ଷଣୀୟ ହେବା ଉଚିତ ଯେ ଦର୍ଶକମାନେ କ୍ଲିକ କରିବାକୁ ଆକୃଷ୍ଟ ହୁଅନ୍ତି।
୩. ପ୍ରଥମ ଘଣ୍ଟାରେ ଏନଗେଜମେଣ୍ଟ: ଭିଡିଓ ଅପଲୋଡ ପରେ ପ୍ରଥମ ଘଣ୍ଟାରେ ନିଜେ ମନ୍ତବ୍ୟ ଦେବା, ଶେୟାର କରିବା ଓ ଦର୍ଶକଙ୍କ ମନ୍ତବ୍ୟର ଉତ୍ତର ଦେବା ଦ୍ୱାରା ଏନଗେଜମେଣ୍ଟ ବଢ଼ାନ୍ତୁ।
୪. ସୋସିଆଲ ମିଡିଆ ପ୍ରୋମୋସନ: ଭିଡିଓକୁ ଫେସବୁକ, ଇନଷ୍ଟାଗ୍ରାମ ଓ ଟ୍ୱିଟର ଭଳି ପ୍ଲାଟଫର୍ମରେ ଶେୟାର କରି ଅଧିକ ଦର୍ଶକଙ୍କ ପାଖରେ ପହଞ୍ଚାନ୍ତୁ।
Comments are closed.