ନୂଆଦିଲ୍ଲୀ:ନ୍ୟୁଜିଲାଣ୍ଡ ନିକଟରୁ ଶୋଚନୀୟ ଭାବେ ସିରିଜ ପରାଜୟବରଣ କରିବା ପରେ ଏବେ ବିଭିନ୍ନ ମହଲରେ ଟିମ ଇଣ୍ଡିଆ ସମାଲୋଚିତ ହେଉଛି । ଏପରିକି ସୋସିଆଲ ମିଡିଆରେ ମଧ୍ୟ ଏହି ଟିମକୁ ଟ୍ରୋଲ କରାଯାଉଛି । ବ୍ରିଙ୍ଗ ବ୍ୟାକ ପୂଜାରା ଓ ବ୍ରିଙ୍ଗ ବ୍ୟାକ ରାହାନେ ଏବେ ସୋସିଆଲ ମିଡିଆରେ ଟ୍ରେଣ୍ଡ କରୁଛି । ପ୍ରଫେଶନାଲ ଟେଷ୍ଟ ଖେଳାଳି ଅଜିଙ୍କ୍ୟ ରାହାନେ ଓ ଚେତେଶ୍ୱର ପୂଜାରାଙ୍କ ପରି ଖେଳାଳିଙ୍କୁ ନ ଖେଳାଇ ବିସିସିଆଇ ହାର୍ଡ ହିଟିଂ ବ୍ୟାଟ୍ସମ୍ୟାନଙ୍କୁ ଗୁରୁତ୍ୱ ଦେବା ବୁଝା ପଡୁନି ବୋଲି ଜଣେ ୟୁଜର୍ସ କହିଛନ୍ତି ।
ପୂର୍ବରୁ ଭାରତର ପୂର୍ବତନ ମହାନ ଖେଳାଳି ସଚିନ ତେନ୍ଦୁଲକର, ଯୁବରାଜ ସିଂ, ବୀରେନ୍ଦ୍ର ସେହ୍ୱାଗ ଓ ସୁନୀଲ ଗାଭାସ୍କରଙ୍କ ସମେତ ଅନ୍ୟମାନେ ଟିମର ପ୍ରଦର୍ଶନ ନେଇ ଅସନ୍ତୋଷ ବ୍ୟକ୍ତ କରିଛନ୍ତି । ଦଳରେ ସବୁ କିଛି ଠିକ ନ ଥିବା ପ୍ରଶ୍ନ ମଧ୍ୟ ଉଠୁଛି । ଶୁଭମନ ଗିଲ, ସର୍ଫରାଜ ଖାଁ ଓ କେଏଲ ରାହୁଲଙ୍କ ପ୍ରଦର୍ଶନରେ ସ୍ଥିରତା ରହୁ ନାହିଁ । ଯାହାକି ଟିମ ପାଇଁ ସମସ୍ୟା ସୃଷ୍ଟି କରୁଛି । ରୋହିତ ଶର୍ମାଙ୍କ ନେତୃତ୍ୱ ଓ କୋଚ ଗୌତମ ଗମ୍ଭୀରଙ୍କ ପରୀକ୍ଷଣକୁ ମଧ୍ୟ ସମାଲୋଚନା କରାଯାଉଛି ।