ନୂଆଦିଲ୍ଲୀ: ସଂସଦରେ ହଙ୍ଗାମା । ସରକାରୀ ଏବଂ ବିରୋଧୀ ନେତା ମୁହାଁମୁହିଁ । ପ୍ରତିଦିନ ସମାନ ସ୍ଥିତି । ଏମିତି ହଙ୍ଗାମା ଭିତରେ ଶେଷ ହେବାକୁ ଯାଉଛି ସଂସଦର ମୌସୁମୀ ଅଧିବେଶନ । ରାଜ୍ୟସଭାରେ ମଧ୍ୟ ସମାନ ସ୍ଥିତି । ଅଧିବେଶନର ୧୨ ଦିନ ବିତିଗଲାଣି । ହେଲେ ସ୍ଥିତି ସୁଧୁରିନି । ବିରୋଧୀ ନିଜ ଜିଦରେ ଅଟଳ । ପ୍ରଧାନମନ୍ତ୍ରୀ ମଣିପୁର ପ୍ରସଙ୍ଗରେ ପାର୍ଲାମେଣ୍ଟରେ ନିଜ ବୟାନ ରଖନ୍ତୁ ଏମିତି ଜିଦରେ ଅଡି ବସିଛନ୍ତି ବିରୋଧୀ । ଲୋକସଭା ସ୍ଥଗିତ ହେବା ଫଳରେ ବିଲ ସବୁ ପାସ ହୋଇ ନ ପାରି ପଡି ରହୁଛି ।
ସାଂସଦଙ୍କର ଏପରି ବ୍ୟବହାରରେ ବାଚସ୍ପତି ଓମ ବିର୍ଲା ମଧ୍ୟ ଖୁସି ନାହାନ୍ତି । ଅତ୍ୟନ୍ତ କ୍ଷୁବ୍ଧ ହୋଇ ବାଚସ୍ପତି ଗତକାଲି ଗୃହ କାର୍ଯ୍ୟରେ ଯୋଗ ଦେଇ ନ ଥିଲେ । ଏପରିକି ଗୃହର ମର୍ଯ୍ୟାଦା ଅନୁସାରେ ସାଂସଦମାନେ ଆଚରଣ ପ୍ରଦର୍ଶନ ନ କରିବା ଯାଏ ସେ କାର୍ଯ୍ୟରେ ସାମିଲ ହେବେ ନାହିଁ ବୋଲି ସିଧା ସିଧା କହିଥିଲେ ।
ବିର୍ଲାଙ୍କ ଅନୁପସ୍ଥିତିରେ ପାନେଲରେ ୱାଇଏସଆରସିପି ସଦସ୍ୟ ପିବି ମିଥୁନ ରେଡ୍ଡି ଏବଂ ବିଜେପି ସଦସ୍ୟ କିରୀଟ ସୋଲଙ୍କୀ ଲୋକସଭାରେ ଅଧ୍ୟକ୍ଷତା କରିଥିଲେ । ତେବେ କାହିଁକି ବିରକ୍ତ ହୋଇଥିଲେ ଓମ ବିର୍ଲା ?
-ପ୍ରତିଦିନ କାର୍ଯ୍ୟକାଳ ଆରମ୍ଭ ହେବା ପରେ ସଂସଦରେ ହଙ୍ଗାମା ସ୍ଥିତି ସୃଷ୍ଟି ହୋଇଥାଏ । ଏ ନେଇ ବାଚସ୍ପତି ସାଂସଦଙ୍କୁ ବାରମ୍ବାର ଚେତାବନୀ ଦେବା ସହ ମର୍ଯ୍ୟଦା ରଖିବା ପାଇଁ ଅପିଲ କରିଥିଲେ । ହେଲେ ସଦସ୍ୟମାନେ ତାହା ଶୁଣୁ ନ ଥିବାରୁ କ୍ଷୁବ୍ଧ ହୋଇଥିଲେ ବାଚସ୍ପତି ।
-ସେହିପରି କାର୍ଯ୍ୟକାଳ ସମୟରେ କୌଣସି ସଦସ୍ୟ କହୁଥିବାବେଳେ ତାଙ୍କ ସାମ୍ନାରେ ପ୍ଲାକାର୍ଡ ହଲାଉଥିବା ଘଟଣାକୁ ନେଇ ମଧ୍ୟ ବାଚସ୍ପତି ବିରକ୍ତ ହୋଇଥିଲେ । ବିରୋଧୀ ସଦସ୍ୟମାନେ ନାରା ଦେବା ସହ କେବଳ ବାଚସ୍ପତିଙ୍କ ଆସନ ପାଖକୁ ଆସି ନ ଥିଲେ, ବରଂ ମଙ୍ଗଳବାର ସେମାନେ ବାଚସ୍ପତିଙ୍କ ଆସନକୁ ଲକ୍ଷ୍ୟ କରି ପାମ୍ପଲେଟ ଫିଙ୍ଗିଥିଲେ ଯାହାକୁ ନେଇ ଅସନ୍ତୋଷ ପ୍ରକାଶ କରିଥିଲେ ବାଚସ୍ପତି ।
ଏ ନେଇ ବାଚସ୍ପତି ନିଜର କ୍ଷୋଭ ଉଭୟ ସରକାରୀ ସଦସ୍ୟ ଏବଂ ବିରୋଧୀଙ୍କୁ ଅବଗତ କରାଇବା ସହ ସଦସ୍ୟମାନେ ନିଜ ମର୍ଯ୍ୟଦା ରକ୍ଷା ନ କରିବା ପର୍ଯ୍ୟନ୍ତ ସେ ଗୃହକୁ ଆସିବେ ନାହିଁ ବୋଲି ସ୍ପଷ୍ଟ କରି ଦେଇଥିଲେ ।
ସୂଚନାଥାଉ କି, ୨୦ ଜୁଲାଇରୁ ଆରମ୍ଭ ହୋଇଥିବା ମୌସୁମୀ ଅଧିବେଶନ ଅଗଷ୍ଟ ୧୭ ତାରିଖ ଯାଏ ଚାଲିବ ।
Comments are closed.