ପର୍ଥ: ଭାରତୀୟ କ୍ରିକେଟ ଦଳର ନିୟମିତ ଅଧିନାୟକ ରୋହିତ ଶର୍ମା ନଭେମ୍ବର ୨୪ରେ ଦଳ ସହିତ ଯୋଗ ଦେବେ ବୋଲି ଜଣାପଡିଛି । ୫ ମ୍ୟାଚ ବିଶିଷ୍ଟ ବର୍ଡର-ଗାଭାସ୍କର ଟ୍ରଫିର ପ୍ରଥମ ମ୍ୟାଚରେ ରୋହିତ ଖେଳିବେନି । ତାଙ୍କ ସ୍ଥାନରେ ଯଶପ୍ରୀତ ବୁମରାହ ଦଳର ନେତୃତ୍ୱ ନେବେ । ରୋହିତ ନିକଟରେ ଦ୍ୱିତୀୟ ସନ୍ତାନର ବାପା ହୋଇଥିବାରୁ ବ୍ରେକ ନେଇଛନ୍ତି । ରୋହିତ ଦ୍ୱିତୀୟ ଟେଷ୍ଟରେ ପୂର୍ବଭଳି ଦଳର ନେତୃତ୍ୱ ନେବେ କ୍ରିକବଜରେ ରିପୋର୍ଟ ପ୍ରକାଶ ପାଇଛି । ରୋହିତଙ୍କ ପରେ ଶୁଭମନ ଗିଲ ମଧ୍ୟ ଆଘାତ ସମସ୍ୟା ଯୋଗୁ ପ୍ରଥମ ଟେଷ୍ଟରେ ଖେଳିବେନି ।
ନୀତିଶ ରେଡ୍ଡୀ, ଦେବଦତ ପାଡିକଲ ପ୍ରଥମ ଟେଷ୍ଟରେ ପଦାର୍ପଣ କରିବେ ବୋଲି ଉକ୍ତ ରିପୋର୍ଟରେ ଉଲ୍ଲେଖ ରହିଛି । ୧୩ ବର୍ଷ ପରେ ରବିଚନ୍ଦ୍ରନ ଅଶ୍ୱୀନ ପର୍ଥରେ ଅଷ୍ଟ୍ରେଲିଆ ବିପକ୍ଷରେ ପ୍ରଥମ ଥର ପାଇଁ ଚୂଡାନ୍ତ ଏକାଦଶରେ ସ୍ଥାନ ପାଇ ପାରନ୍ତି । ନ୍ୟୁଜିଲାଣ୍ଡ ବିପକ୍ଷ ଘରୋଇ ସିରିଜରେ ଭାରତ ୩-୦ରେ ପରାଜିତ ହେବା ପରେ ଏବେ ୱାର୍ଲ୍ଡ ଟେଷ୍ଟ ସିରିଜ ଫାଇନାଲ ପ୍ରବେଶ ରାସ୍ତା କଠିନ ହୋଇ ପଡିଛି । ଅଷ୍ଟ୍ରେଲିଆ ବିପକ୍ଷ ୫ ମ୍ୟାଚ ବିଶିଷ୍ଟ ସିରିଜରେ ଭାରତକୁ ୩ଟି କିମ୍ବା ୪ଟି ମ୍ୟାଚରେ ବିଜୟ ହାସଲ କରିବାକୁ ପଡିବ ।