କାହିଁକି ଟ୍ରକ ଡ୍ରାଇଭର ଆନ୍ଦୋଳନରେ ବସିଛନ୍ତି, କ’ଣ ରହିଛି ଦାବି?

ନୂଆଦିଲ୍ଲୀ: କିଛି ଦିନ ହେବ ଟ୍ରକ ଡ୍ରାଇଭର ଆନ୍ଦୋଳନରେ ବସିଛନ୍ତି। ଅନେକ ଟ୍ରକ ଯାଆସନ କରୁନଥିବାରୁ ପେଟ୍ରୋଲ ପମ୍ପ ଗୁଡିକରେ ତେଲ ମଧ୍ୟ ଶେଷ ହୋଇଯିବାରୁ ଅନେକ ସମସ୍ୟା ଉପୁଜିଛି। ତେବେ ସମସ୍ୟା କ’ଣ ରହିଛି? ତେବେ ପ୍ରସଙ୍ଗ ହେଉଛି କେନ୍ଦ୍ର ସରକାର ନିକଟରେ ପାରିତ କରିଥିବା ଏକ ବିଲ୍ । ଭାରତ ନ୍ଯାୟ ସଂହିତାର ନୂଆ ନିୟମ ଅନୁଯାୟୀ ହିଟ୍ ଆଣ୍ଡ ରନ୍ ମାମଲାରେ ଯଦି ଟ୍ରକ ଡ୍ରାଇଭର କିମ୍ବା ବଡ ଗାଡିର ଡ୍ରାଇଭର ଦୁର୍ଘଟଣା ବାବଦରେ ପୋଲିସକୁ ନିଜ ଆଡୁ ସୂଚନା ନଦେବ ତାହେଲେ ଅଧିକ ଜୋରିମାନା ସହିତ ଜେଲଦଣ୍ଡାଦେଶ ରହିଛି। ଯାହାକୁ ବିରୋଧ କରିଛନ୍ତି ଟ୍ରକ ଡ୍ରାଇଭର ସଂଘ। ସେମାନଙ୍କ କହିବା କଥା ହେଲା ଅନେକାଂଶରେ ସେମାନଙ୍କର ଭୁଲ ନଥାଏ। ସେହିପରି ଯଦି ସେମାନେ ଦୁର୍ଘଟଣାସ୍ଥଳରୁ ନପଳାଇବେ ତାହେଲେ ସେମାନେ ଭିଡ ହିଂସାର ଶିକାର ହେବାର ସମ୍ଭାବନା ରହିଛି।

ରାଜସ୍ଥାନ, ମଧ୍ୟପ୍ରଦେଶ, ମହାରାଷ୍ଟ୍ର ଓ ପଞ୍ଜାବ ଏବଂ ହାଇଦ୍ରାବାଦର କିଛି ପେଟ୍ରୋଲ ପମ୍ପରେ ଆନ୍ଦୋଳନ ମଙ୍ଗଳବାର ଦ୍ବିତୀୟ ଦିନରେ ପହଞ୍ଚିଛି। ଏବେ ଏହିସବୁ ସ୍ଥାନ ଗୁଡିକରେ ପ୍ରାୟ ୨୦୦୦ ପେଟ୍ରୋଲ ପମ୍ପରେ ଇନ୍ଧନ ମହଜୁଦ ନାହିଁ।

କ’ଣ ରହିଛି ଟ୍ରକ ଚାଳକଙ୍କ ଧର୍ମଘଟ ?
ହିଟ୍ ଆଣ୍ଡ୍ ରନ୍ ମାମଲାରେ ନୂଆ ଅପରାଧିକ ଆଇନ ଭାରତୀୟ ନ୍ୟାୟ ସଂହିତା (ବିଏନ୍ଏସ୍) ଅନୁଯାୟୀ କଠୋର ଜେଲ୍ ଓ ଜରିମାନା ନିୟମ ବିରୋଧରେ ସୋମବାର କିଛି ଟ୍ରକ୍, ବସ୍ ଓ ଟ୍ୟାଙ୍କର୍ ଅପରେଟର ମାନେ ତିନି ଦିନିଆ ଧର୍ମଘଟ ଆରମ୍ଭ କରିଛନ୍ତି।

ଉପନିବେଶକାଳୀନ ଭାରତୀୟ ଦଣ୍ଡବିଧି ସଂହିତାର ସ୍ଥାନ ନେଇଥିବା ଏହି ନୂଆ ଆଇନରେ ବେପରୁଆ ଗାଡି ଚାଳନା ଯୋଗୁଁ ଗୁରୁତର ସଡ଼କ ଦୁର୍ଘଟଣା ପାଇଁ ୧୦ ବର୍ଷ ପର୍ଯ୍ୟନ୍ତ ଜେଲ ଦଣ୍ଡ କିମ୍ବା ୭ ଲକ୍ଷ ଟଙ୍କା ଜରିମାନା ର ବ୍ୟବସ୍ଥା ରହିଛି ଏବଂ ଯେଉଁଠି ଚାଳକମାନେ ପୋଲିସକୁ ନ ଜଣାଇ ପଳାଇଯାଆନ୍ତି ।

ଅଧିକାଂଶ ଟ୍ରକ୍ ଚାଳକ ସାମାନ୍ୟ ଦୁର୍ଘଟଣାରେ ମଧ୍ୟ ପଳାଇଯିବାକୁ ପସନ୍ଦ କରନ୍ତି କାରଣ ନଚେତ୍ ସେମାନଙ୍କ ଜୀବନ ପ୍ରତି ବିପଦର ସମ୍ମୁଖୀନ ହେବାକୁ ପଡ଼ିବ ବୋଲି ଟ୍ରକ୍ ଚାଳକମାନେ କହିଛନ୍ତି।

ଆଉ କ’ଣ ପ୍ରଭାବିତ ହୋଇପାରେ?
ତିନି ଦିନିଆ ଧର୍ମଘଟକୁ ବଢ଼ାଇଲେ କିମ୍ବା ସର୍ବଭାରତୀୟ ସ୍ତରରେ ଆନ୍ଦୋଳନ ଆରମ୍ଭ କରାଗଲେ ପନିପରିବା, ଫଳ ଓ କ୍ଷୀରର ଅତ୍ୟାବଶ୍ୟକ ସାମଗ୍ରୀ ମଧ୍ୟ ପ୍ରଭାବିତ ହୋଇପାରେ। ଏଲପିଜି ଟ୍ରକ ଚଳାଚଳ ମଧ୍ୟ ପ୍ରଭାବିତ ହୋଇଛି । ତେବେ ଏଲପିଜି ଅଭାବ ନେଇ ଏପର୍ଯ୍ୟନ୍ତ କୌଣସି ଅଭିଯୋଗ ଆସିନାହିଁ।

ଆଗକୁ କ’ଣ ହେବ?
ଟ୍ରକ୍ ଅପରେଟରମାନଙ୍କର ମିଳିତ ସଂଗଠନ ଅଲ୍ ଇଣ୍ଡିଆ ମୋଟର ଟ୍ରାନ୍ସପୋର୍ଟ ଆସୋସିଏସନ୍ ଏପର୍ଯ୍ୟନ୍ତ ଦେଶବ୍ୟାପୀ ଧର୍ମଘଟ ଡାକରା ଦେଇନାହିଁ ଏବଂ ଏହାର ପ୍ରତିନିଧିମାନେ ଗୃହ ମନ୍ତ୍ରଣାଳୟର ଅଧିକାରୀମାନଙ୍କୁ ଭେଟି ଭାରତୀୟ ନ୍ୟାୟ ସଂହିତାକୁ ନେଇ ଚିନ୍ତା ପ୍ରକଟ କରିବେ।