ଟମାଟୋ ଅପେକ୍ଷା ପିଆଜ ଦର ବୃଦ୍ଧି ମୋଦୀ ସରକାରକୁ କନ୍ଦାଇବ?

ନୂଆଦିଲ୍ଲୀ: ଟମାଟୋ ପରେ ପିଆଜ ଦର ବୃଦ୍ଧି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସରକାର ପାଇଁ ଅଧିକ ବିପଦ ସୃଷ୍ଟି କରିପାରେ। ଟମାଟୋ ଦର ୭୦୦% ବୃଦ୍ଧି ଘଟିଥିଲା। ଯାହା ଫଳରେ ସରକାର ନିର୍ବାଚନ ପୂର୍ବରୁ ଖାଦ୍ୟ ମୁଦ୍ରାସ୍ଫୀତିକୁ ନିୟନ୍ତ୍ରଣ କରିବା ପାଇଁ ନୂଆ ପଦକ୍ଷେପ ନେବାକୁ ବାଧ୍ୟ ହୋଇଛନ୍ତି।

ଭାରତ ପିଆଜ ଉପରେ ୪୦% ରପ୍ତାନି ଟିକସ ଲାଗୁ କରିବା ସହ ପିଆଜକୁ ସ୍ଥାନୀୟ ଭାବେ ରିହାତି ଦରରେ ବିକ୍ରି କରିବାକୁ ଯୋଜନା କରିଛି। ଭାରତୀୟଙ୍କ ଖାଇବାରେ ପିଆଜ, ଟମାଟୋ ଓ ଆଳୁ ଗୁରୁତ୍ୱ ରଖେ। ପୂର୍ବରୁ ଏହି ସବୁ ଖାଦ୍ଯ ଏବଂ ପରିବା ଦର ବୃଦ୍ଧି କେତେକ ଶାସକ ଦଳକୁ କ୍ଷମତାକୁ ଫେରିବାରେ ବାଧା ଦେଇଛି। ଗ୍ରାହକମାନେ ଟମାଟୋ ଏବଂ ଆଳୁ ଅପେକ୍ଷା ପିଆଜ ପ୍ରତି ଅଧିକ ସମ୍ବେଦନଶୀଳ ରୁହନ୍ତି।

ପ୍ରବଳ ବର୍ଷା ପରେ ଟମାଟୋ ଦର ଆଠ ଗୁଣ ବୃଦ୍ଧି ପାଇବା ପରେ ସରକାର ତୀବ୍ର ସମାଲୋଚନାର ସମ୍ମୁଖୀନ ହୋଇଥିଲେ। ଏବେ ଟମାଟୋ ଦାମ୍ କମିବାରେ ଲାଗିଛି, କିନ୍ତୁ ପିଆଜ ଲଗାତାର ବଢ଼ିବା କର୍ତ୍ତୃପକ୍ଷଙ୍କୁ ସତର୍କ କରିଦେଇଛି। ଖରାପ ପାଗ ଯୋଗୁଁ ଗହମ ଏବଂ ଚାଉଳ ଭଳି ଅନେକ କୃଷି ସାମଗ୍ରୀ ପାଇଁ ଖର୍ଚ୍ଚ ବୃଦ୍ଧି ପାଇବାରୁ ଏହି ପଦକ୍ଷେପ ନିଆଯାଉଛି। ଆସନ୍ତା ବର୍ଷ ନିର୍ବାଚନ ରହିଛି। ତୃତୀୟ ଥର ପାଇଁ ପ୍ରଧାନମନ୍ତ୍ରୀ ହେବାକୁ ଚାହୁଁଥିବା ନରେନ୍ଦ୍ର ମୋଦୀଙ୍କ ପାଇଁ ଏବେ ଖାଦ୍ୟ ଦର ନିୟନ୍ତ୍ରଣ କରିବା ଗୁରୁତ୍ୱପୂର୍ଣ୍ଣ।

ଏବେ ଖୁଚୁରା ମୁଦ୍ରାସ୍ଫୀତି ୧୫ ମାସର ସର୍ବୋଚ୍ଚ ସ୍ତରରେ ଚାଲୁଛି। ସରକାର ଗହମ, ଚାଉଳ ଏବଂ ଚିନିର ରପ୍ତାନି ଉପରେ ନିୟନ୍ତ୍ରଣ ଆଣିଛନ୍ତି ଏବଂ ଗହମ ଆମଦାନୀ ଉପରେ ୪୦% ଶୁଳ୍କକୁ ରଦ୍ଦ କରିପାରନ୍ତି। ଅର୍ଥନୀତିଜ୍ଞ ରାହୁଲ ବାଜୋରିଆ କହିଛନ୍ତି, ପିଆଜ ଉପରେ ସରକାରଙ୍କ ପଦକ୍ଷେପ ପୂର୍ବାନୁମାନାତ୍ମକ, କାରଣ ବର୍ତ୍ତମାନ ପାଇଁ ଦର ବୃଦ୍ଧି ଋତୁଗତ ଧାରା ଅନୁସାରେ ଦେଖାଯାଉଛି। କିନ୍ତୁ ମୌସୁମୀ ଋତୁର ଅନିୟମିତତା ଶେଷ ହେବାର ଆଶାରେ, ସେ କହିଛନ୍ତି ଯେ ଆଗାମୀ ମାସରେ ଖାଦ୍ୟ ମୂଲ୍ୟ ବୃଦ୍ଧି ହେବାର ଆଶଙ୍କା ଉପରେ ସରକାର ଧ୍ୟାନ ଦେଉଛନ୍ତି।

ଏଲ ନିନୋ ପ୍ରଭାବରେ ଖରାପ ପାଣିପାଗ ମହାରାଷ୍ଟ୍ରରେ ପିଆଜ ଫସଲକୁ କ୍ଷତି ପହଞ୍ଚାଇପାରେ। ଭାରତରେ ମୋଟ ଉପରେ ମୌସୁମୀ ବର୍ଷା ସ୍ୱାଭାବିକଠାରୁ ପ୍ରାୟ ୭% କମ୍ ହୋଇଛି, ଯାହା ଖାଦ୍ୟ ମୂଲ୍ୟ ବୃଦ୍ଧି କରିବାରେ ସାହାଯ୍ୟ କରିଛି। ବର୍ଷକ ପୂର୍ବରୁ ଦିଲ୍ଲୀରେ ଗହମ ୧୨% ବୃଦ୍ଧି ପାଇଛି। ଚାଉଳର ମୂଲ୍ୟ ୨୨% ଅଧିକ ଥିବା ବେଳେ ଟମାଟୋ ୮୦% ବୃଦ୍ଧି ପାଇଥିବା ବେଳେ ପିଆଜ ୩୨% ବୃଦ୍ଧି ପାଇଛି।

ମହାରାଷ୍ଟ୍ରରେ ବର୍ଷା ଅଭାବ ପାଇଁ ଅନେକ ଚାଷୀ ପିଆଜ ଚାଷ ପ୍ରତି ଆଗ୍ରହ ଦେଖାଉ ନାହାନ୍ତି। ଚଳିତ ବର୍ଷ କିଛି ରାଜ୍ୟରେ ନିର୍ବାଚନ ଏବଂ ୨୦୨୪ ଏପ୍ରିଲ କିମ୍ବା ମେ’ ମାସରେ ସାଧାରଣ ନିର୍ବାଚନ ପୂର୍ବରୁ ଅଧିକ କଟକଣା ଲଗାଯିବା ଆଶଙ୍କା ରହିଛି। ଜଣେ ଚାଷୀ କହିଛନ୍ତି, ପ୍ରତିବର୍ଷ ମୋର ଖର୍ଚ୍ଚ ବଢ଼ୁଛି କିନ୍ତୁ ଆମେ ଉପଯୁକ୍ତ ମୂଲ୍ୟ ପାଇପାରୁ ନାହୁଁ। ପିଆଜ ଉପରେ ସରକାରଙ୍କ ହସ୍ତକ୍ଷେପ ବହୁତ ଅଧିକ ଏବଂ ନିକଟରେ ରପ୍ତାନି ଶୁଳ୍କ ଲାଗୁ କରିବା ଦ୍ୱାରା ଦର ଉପରେ ଚାପ ପଡ଼ିବ। ଦେଶରେ ପିଆଜ ଉତ୍ପାଦନରେ ମହାରାଷ୍ଟ୍ରର ଅବଦାନ ୪୦%ରୁ ଅଧିକ। ବର୍ଷକୁ ତିନି ଥର, ଦୁଇଥର ବର୍ଷା ଋତୁରେ ଏବଂ ଥରେ ଶୀତ ଋତୁରେ ଏଗୁଡ଼ିକ ଚାଷ କରାଯାଏ। ରାଜ୍ୟର କେତେକ ସ୍ଥାନରେ ସ୍ୱାଭାବିକଠାରୁ ୧୮% କମ୍ ବର୍ଷା ହୋଇଥିବାରୁ ଫସଲ ପ୍ରଭାବିତ ହୋଇଛି।