ଲଣ୍ଡନ: ଇଂଲଣ୍ଡରେ ଚାଲିଥିବା ବିଶ୍ୱକପ କ୍ରିକେଟରେ ବିରାଟ କୋହଲୀଙ୍କ ଟିମ୍ ଇଣ୍ଡିଆ ଆକର୍ଷଣୀୟ ବିଜୟରୁ ଆରମ୍ଭ କରିଛି ତା’ର ଅଭିଯାନ । ଉପ-ଅଧିନାୟକ ରୋହିତ ଶର୍ମାଙ୍କ ଧୁଆଁଧାର ଶତକ ଏବଂ ଚହଲଙ୍କ ଯାଦୁକରୀ ସ୍ପିନ ବଳରେ ଭାରତ ଦକ୍ଷିଣ ଆଫ୍ରିକାକୁ ୬ ୱିକେଟରେ ପରାସ୍ତ କରିପାରିଛି ।
ସାଉଥମ୍ପଟନର ଭରପୁର ଭାରତୀୟ ଦଶର୍କଙ୍କ ସାମ୍ନାରେ ଟସ ଜିତି ଦକ୍ଷିଣ ଆଫ୍ରିକୀୟ ଅଧିନାୟକ ଡ୍ୟୁ ପ୍ଲେସିସ ପ୍ରଥମେ ବ୍ୟାଟିଂ ନେବାକୁ ସ୍ଥିର କରିଥିଲେ । ଯଶପ୍ରୀତ ବୁମରାଙ୍କ ଶାଣିତ ବୋଲିଂ ଆଗରେ ଦକ୍ଷିଣ ଆଫ୍ରିକାର ବ୍ୟାଟିଂ ଲାଇନ ଅପ୍ ଧ୍ୱସ୍ତ ବିଧ୍ୱସ୍ତ ହୋଇପଡ଼ିଥିଲା । ଓପନର୍ ହାସିମ ଆମଲା ଓ ଡ଼ି କକଙ୍କୁ ସହଳ ଆଉଟ କରି ବୁମରା ଭାରତୀୟ ଶିବିରରେ ହର୍ଷୋଲ୍ଲାସ ଆଣିଦେଇଥିଲେ । ଭାରତୀୟ ବୋଲରଙ୍କ ମାପଚୁପ ଓ ତୀକ୍ଷ୍ମ ବୋଲିଂ ଆଗରେ ଦକ୍ଷିଣ ଆଫ୍ରିକା ଦଳ ବିଶାଳ ସ୍କୋର କରିବାକୁ ଅକ୍ଷମ ହୋଇପଡ଼ିଥିଲା । ମୋରିସଙ୍କ ୪୨ ରନ ଓ କପ୍ତାନ ଡ୍ୟୁ ପ୍ଲେସିସଙ୍କ ୩୮ ରନ ବ୍ୟତୀତ ରାବଡ଼ାଙ୍କ ୩୧ ରନ ତଥା ମିଲରଙ୍କ ୩୧ ରନ ବଳରେ ଆଫ୍ରିକୀୟ ଦଳ ନିର୍ଦ୍ଧାରିତ ୫୦ ଓଭରରେ ୯ଟି ୱିକେଟ ହରାଇ ମାତ୍ର ୨୨୭ ରନ କରିପାରିଥିଲା ।
ଏହି ମ୍ୟାଚରେ ହିରୋ ପାଲଟିଥିଲେ ଭାରତୀୟ ସ୍ପିନ ଯାଦୁକର ୟୁଜବେନ୍ଦ୍ର ଚହଲ୍ । ସେ ୧୦ ଓଭର୍ ବୋଲିଂ କରି ୫୧ ରନରେ ମୂଲ୍ୟବାନ ୪ଟି ୱିକେଟ ଅକ୍ତିଆର କରିଥିଲେ । ଫାଷ୍ଟ ବୋଲର୍ ବୁମରା ଓ ଭୁବନେଶ୍ୱର କୁମାର ୨ଟି କରି ୱିକେଟ ହାସଲ କରିପାରିଛନ୍ତି । ସେହିପରି କୁଲଦୀପ ଯାଦବ ଗୋଟିଏ ୱିକେଟ ହାସଲ କରିପାରିଛନ୍ତି ।
ଏହାର ଜବାବରେ ଭାରତୀୟ ଦଳ ବ୍ୟାଟିଂ ଆରମ୍ଭ କରି ସହଳ ଧାୱନଙ୍କ ୱିକେଟ ହରାଇଥିଲା । ମାତ୍ର ରୋହିତ ଶର୍ମା ଓ ବିରାଟ କୋହଲୀ ପିଚରେ ଜମିରହି ଦଳକୁ ଅଗ୍ରସର କରିବାକୁ ଚେଷ୍ଟା କରିଥିଲେ । କୋହଲୀ ୧୮ ରନରେ ଆଉଟ ହେବାପରେ କେ ଏଲ ରାହୁଲ ରୋହିତଙ୍କୁ ସାଥ୍ ଦେଇଥିଲେ । ରାହୁଲ ୨୬ ଓ ଧୋନୀ ଉପଯୋଗୀ ୩୪ ରନ ସ୍କୋର କରିଥିଲେ । ଅଲରାଉଣ୍ଡର୍ ହାର୍ଦ୍ଧିକ ପାଣ୍ଡ୍ୟା ପ୍ରଶଂସନୀୟ ୧୫ ରନ ସ୍କୋର କରି ଦଳ ବିଜୟର ଅନ୍ୟତମ କର୍ଣ୍ଣଧାର ସାଜିଥିଲେ । ଭାରତୀୟ ଦଳ ୪୭.୩ ଓଭରରେ ମାତ୍ର ୪ଟି ୱିକେଟ ହରାଇ ୨୩୦ ରନ ସ୍କୋର କରି ବିଜୟ ହାସଲ କରିଥିଲା ।
ଟିମ୍ ଇଣ୍ଡିଆ ଉପ-ଅଧିନାୟକ ରୋହିତ ଶର୍ମା ୧୪୪ଟି ବଲରେ ୧୨୨ ଉପଯୋଗୀ କରିଥିଲେ । ସେଥିରେ ରହିଥିଲା ୨ଟି ବିଶାଳ ଛକା ଏବଂ ୧୩ଟି ଆକର୍ଷଣୀୟ ଚୌକା । ତାଙ୍କର ପ୍ରଶଂସନୀୟ ବ୍ୟାଟିଂ ପ୍ରଦର୍ଶନ ଲାଗି ‘ପ୍ଲେୟାର୍ ଅଫ ଦି ମ୍ୟାଚ୍’ ଘୋଷିତ କରାଯାଇଥିଲା ।
ଆସନ୍ତା ଜୁନ ୯ ତାରିଖରେ ଭାରତ ତା’ର ଆଗାମୀ ମ୍ୟାଚରେ ଶକ୍ତିଶାଳୀ ଅଷ୍ଟ୍ରେଲିଆ ଦଳକୁ ଭେଟିବ ।
Comments are closed.