ନୂଆଦିଲ୍ଲୀ: ପ୍ରତିବର୍ଷ ନଭେମ୍ବର ୨୧ ତାରିଖରେ ବିଶ୍ୱ ଟେଲିଭିଜନ ଦିବସ ପାଳନ କରାଯାଏ। ଏହି ଦିବସ ଟେଲିଭିଜନକୁ ସୂଚନା ଦେବା, ଶିକ୍ଷା ଦେବା ଏବଂ ଜନମତକୁ ପ୍ରଭାବିତ କରିବା ଏବଂ ଯୋଗାଯୋଗ ତଥା ବିଶ୍ୱ ବୁଝାମଣାକୁ ପ୍ରୋତ୍ସାହିତ କରିବାରେ ଏକ ଗୁରୁତ୍ୱପୂର୍ଣ୍ଣ ମାଧ୍ୟମ ଭାବରେ ସ୍ୱୀକୃତି ଦିଏ।
ଭାରତରେ ଯେଉଁଠାରେ ୨୩୦ ନିୟୁତରୁ ଅଧିକ ଟେଲିଭିଜନ ପରିବାର ପ୍ରାୟ ୯୦୦ ନିୟୁତ ଦର୍ଶକଙ୍କ ପାଖରେ ପହଞ୍ଚନ୍ତି, ସୂଚନା ଏବଂ ପ୍ରସାରଣ ମନ୍ତ୍ରଣାଳୟ (ଏମଆଇବି) ଏବଂ ଏହାର ସାର୍ବଜନୀନ ପ୍ରସାରଣ ନେଟୱାର୍କ, ପ୍ରସାର ଭାରତୀ ତତ୍ତ୍ୱାବଧାନରେ ଏହି ଦିବସ ପାଳନ କରାଯାଏ। ଦୂରଦର୍ଶନ ଏବଂ ଅଲ୍ ଇଣ୍ଡିଆ ରେଡିଓ ଦ୍ୱାରା କାର୍ଯ୍ୟକଳାପ ଏବଂ ପ୍ରସାରଣ କାର୍ଯ୍ୟକ୍ରମଗୁଡ଼ିକ ସାର୍ବଜନୀନ ସେବା ଯୋଗାଯୋଗ, ବିକାଶ ବାର୍ତ୍ତାର ପ୍ରସାର ଏବଂ ଜାତୀୟ ସଂହତିକୁ ପ୍ରୋତ୍ସାହିତ କରିବାରେ ଟେଲିଭିଜନର ସ୍ଥାୟୀ ଭୂମିକାକୁ ଉଜ୍ଜ୍ୱଳ କରିଥାଏ।
ଭାରତରେ ସୂଚନା ଏବଂ ମନୋରଞ୍ଜନ ପ୍ରସାରଣ ପାଇଁ ଟେଲିଭିଜନ ସବୁଠାରୁ ଶକ୍ତିଶାଳୀ ପ୍ଲାଟଫର୍ମ ମଧ୍ୟରୁ ଗୋଟିଏ ଭାବରେ କାର୍ଯ୍ୟ କରିଆସୁଛି। ଲକ୍ଷ ଲକ୍ଷ ପରିବାରକୁ ସଂଯୋଗ କରୁଛି ଏବଂ ଜନସଚେତନତା ତଥା ଅଂଶଗ୍ରହଣକାରୀ ଶାସନର ଉଦ୍ଦେଶ୍ୟ ପାଇଁ ଗୁରୁତ୍ୱପୂର୍ଣ୍ଣ ଯୋଗଦାନ ଦେଉଛି।
ଭାରତର ଗଣମାଧ୍ୟମ ଏବଂ ମନୋରଞ୍ଜନ (ଏମ୍ ଆଣ୍ଡ ଇ) କ୍ଷେତ୍ର ୨୦୨୪ ରେ ଅର୍ଥନୀତିରେ ଟ.୨.୫ ଟ୍ରିଲିୟନ ଅବଦାନ ଦେଇଥିଲା ଏବଂ ୨୦୨୭ ସୁଦ୍ଧା ଏହା ଟ.୩ ଟ୍ରିଲିୟନ ଅତିକ୍ରମ କରିବ ବୋଲି ଆକଳନ କରାଯାଇଛି। କେବଳ ଟେଲିଭିଜନ ଏବଂ ପ୍ରସାରଣ କ୍ଷେତ୍ର ୨୦୨୪ ରେ ପ୍ରାୟ ଟ.୬୮୦ ବିଲିୟନ ଆୟ କରିଥିଲା। ଏହି କ୍ଷେତ୍ରର ଅଭିବୃଦ୍ଧି ଡିଜିଟାଲ ସମ୍ପ୍ରସାରଣ, ୪କେ ପ୍ରସାରଣ, ସ୍ମାର୍ଟ ଟିଭି, ୫ଜି ଏବଂ ଓଟିଟି ପ୍ଲାଟଫର୍ମ ଦ୍ୱାରା ଚାଳିତ ହୋଇଛି ଯାହା ୬୦୦ ନିୟୁତରୁ ଅଧିକ ଉପଭୋକ୍ତାଙ୍କୁ ସେବା ପ୍ରଦାନ କରୁଛି।
ଭାରତରେ ଟେଲିଭିଜନର ଅଭିବୃଦ୍ଧି
ଭାରତରେ ଟେଲିଭିଜନ ଏକ ସୀମିତ ପରୀକ୍ଷାମୂଳକ ସେବାରୁ ବିଶ୍ୱର ସର୍ବବୃହତ ପ୍ରସାରଣ ନେଟୱାର୍କ ମଧ୍ୟରୁ ଗୋଟିଏକୁ ବିକଶିତ ହୋଇଛି। ଯାହା ଯୋଗାଯୋଗ ପ୍ରଯୁକ୍ତିବିଦ୍ୟା, ସାର୍ବଜନୀନ ପ୍ରସାରଣ ଏବଂ ଡିଜିଟାଲ ନବସୃଜନରେ ଦେଶର ପ୍ରଗତିକୁ ପ୍ରତିଫଳିତ କରେ। ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ଦ୍ୱାରା ନିର୍ଦ୍ଦେଶିତ ଭାରତର ଟେଲିଭିଜନ ଯାତ୍ରା ଦେଶର ସାମାଜିକ-ଆର୍ଥିକ ବିକାଶକୁ ପ୍ରତିଫଳିତ କରେ। ୧୯୫୦ ଦଶକର ସାମୁଦାୟିକ ଶିକ୍ଷା ପ୍ରସାରଣରୁ ଆଜି ଏକ ସମ୍ପୂର୍ଣ୍ଣ ଡିଜିଟାଇଜଡ୍, ବହୁ-ଚ୍ୟାନେଲ ପରିବେଶ ପର୍ଯ୍ୟନ୍ତ।
Comments are closed.