Puri Temple Land in Pak: ପାକିସ୍ତାନରେ ବି ରହିଛି ମହାପ୍ରଭୁଙ୍କ ଜମି! ୩୬ ହଜାର ଏକର ସମ୍ପତ୍ତିର ହେବ ବଡ଼ ଯାଞ୍ଚ…

ଭୁବନେଶ୍ୱର: ମହାପ୍ରଭୁ ଶ୍ରୀଜଗନ୍ନାଥଙ୍କ ସମ୍ପତ୍ତିକୁ ନେଇ ଆସିଛି ଏକ ବଡ଼ ଖବର। କେବଳ ଓଡ଼ିଶା କିମ୍ବା ଭାରତର ବିଭିନ୍ନ ଅଞ୍ଚଳରେ ନୁହେଁ, ମହାପ୍ରଭୁଙ୍କ କିଛି ଜମି ଆଜିର ପାକିସ୍ତାନର ସିନ୍ଧ ଅଞ୍ଚଳରେ ମଧ୍ୟ ଥିବା ସୂଚନା ମିଳିଛି। ଏହି ସୂଚନା ଦେଇଛନ୍ତି ଓଡ଼ିଶାର ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ।

ଶ୍ରୀଜଗନ୍ନାଥ ମନ୍ଦିର ପ୍ରଶାସନର ଜମି ଓ ସମ୍ପତ୍ତିର ସମ୍ପୂର୍ଣ୍ଣ ରେକର୍ଡ ପ୍ରସ୍ତୁତ କରିବାକୁ ଏବେ ବଡ଼ ପଦକ୍ଷେପ ନେବାକୁ ଯାଉଛନ୍ତି ରାଜ୍ୟ ସରକାର। ଓଡ଼ିଶା ସମେତ ଦେଶର ଅନ୍ୟ ଅଞ୍ଚଳ ଏବଂ ଦେଶ ବାହାରେ ଥିବା ଶ୍ରୀଜଗନ୍ନାଥଙ୍କ ଜମିକୁ ଚିହ୍ନଟ, ଯାଞ୍ଚ ଏବଂ ଏହାର ରେକର୍ଡ ପ୍ରସ୍ତୁତ କରାଯିବ। ଶ୍ରୀଜଗନ୍ନାଥଙ୍କ ଜମି ଓ ସମ୍ପତ୍ତିକୁ ନେଇ ଆଇନ ମନ୍ତ୍ରୀଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ହୋଇଥିଲା। ଏଥିରେ ମନ୍ଦିର ଜମି, ଜମି ରେକର୍ଡ, ଜବରଦଖଲ ଏବଂ ଜମି ସେଟଲମେଣ୍ଟ ସମ୍ପର୍କିତ ନିୟମ ଉପରେ ଆଲୋଚନା ହୋଇଛି।

ମନ୍ତ୍ରୀଙ୍କ ସୂଚନା ଅନୁସାରେ, ଏପର୍ଯ୍ୟନ୍ତ ମହାପ୍ରଭୁ ଶ୍ରୀଜଗନ୍ନାଥଙ୍କ ସହ ଜଡ଼ିତ ପ୍ରାୟ ୩୬ ହଜାର ଏକର ଜମି ଚିହ୍ନଟ କରାଯାଇଛି। ଚିହ୍ନଟ ହୋଇଥିବା ଏହି ବିଶାଳ ଜମିର ପ୍ରାୟ ୨୫ରୁ ୨୬ ପ୍ରତିଶତ ଜମି ଜବରଦଖଲରେ ଥିବା କୁହାଯାଉଛି। ଏବେ ଏହି ଜମିଗୁଡ଼ିକର ରେକର୍ଡ ଯାଞ୍ଚ କରାଯିବ। କେଉଁ ଜମି କେଉଁଠି ରହିଛି, କାହା ଦଖଲରେ ରହିଛି ଏବଂ କେଉଁ ମାମଲାରେ ଆଇନଗତ କାର୍ଯ୍ୟାନୁଷ୍ଠାନ କିମ୍ବା ଜମି ଫେରାଇ ଆଣିବାର ଆବଶ୍ୟକତା ରହିଛି, ସେସବୁର ଯାଞ୍ଚ କରାଯିବ।

ଏହି ପୂରା ଘଟଣାରେ ସବୁଠାରୁ ଅଧିକ ଚର୍ଚ୍ଚା ହେଉଛି ପାକିସ୍ତାନର ସିନ୍ଧ ଅଞ୍ଚଳରେ ମହାପ୍ରଭୁଙ୍କ ଜମି ଥିବା ସୂଚନାକୁ ନେଇ। ଆଇନ ମନ୍ତ୍ରୀ କହିଛନ୍ତି ଯେ, ଶ୍ରୀଜଗନ୍ନାଥଙ୍କ ଜମି ଭାରତର ବିଭିନ୍ନ ଅଞ୍ଚଳରେ ରହିଛି। ଏହାସହ ଆଜିର ପାକିସ୍ତାନର ସିନ୍ଧ ଅଞ୍ଚଳରେ ମଧ୍ୟ କିଛି ଜମି ଥିବାର ସୂଚନା ମିଳିଛି। ଏଭଳି ଜମିକୁ ଧୀରେ ଧୀରେ ଚିହ୍ନଟ କରିବା ସହ ଏହାର ରେକର୍ଡ ଯାଞ୍ଚ କରାଯିବ। ତେବେ ସରକାରଙ୍କ ଲକ୍ଷ୍ୟ କେବଳ ମନ୍ଦିର ଜମିରୁ ଜବରଦଖଲ ହଟାଇବା ନୁହେଁ। ଶ୍ରୀଜଗନ୍ନାଥ ମନ୍ଦିରର ଐତିହାସିକ ସମ୍ପତ୍ତିକୁ ସୁରକ୍ଷିତ କରିବା ସହ ଏହାର ଉପଯୁକ୍ତ ପରିଚାଳନା ଉପରେ ମଧ୍ୟ ଗୁରୁତ୍ୱ ଦିଆଯିବ। ଜମି ସୁରକ୍ଷିତ ହେଲେ ଭବିଷ୍ୟତରେ ମନ୍ଦିର ପ୍ରଶାସନର ଆୟ ବଢ଼ିପାରେ। ଏହା ମାଧ୍ୟମରେ ଏକ ଶକ୍ତିଶାଳୀ କର୍ପସ୍ ଫଣ୍ଡ ଗଠନ କରି ମନ୍ଦିରର ଭବିଷ୍ୟତ ବିକାଶ ଓ ପରିଚାଳନାରେ ଏହାକୁ ବ୍ୟବହାର କରାଯାଇପାରେ।

ତେବେ ପ୍ରତ୍ୟେକ ମାମଲାରେ ସିଧାସଳଖ ଜବରଦଖଲ ହଟାଇବା ପଦକ୍ଷେପ ନିଆଯିବ ନାହିଁ। ଯଦି କୌଣସି ବ୍ୟକ୍ତି ଦୀର୍ଘଦିନ ଧରି ମନ୍ଦିର ଜମିରେ ରହୁଛନ୍ତି ଏବଂ ଆଇନ ଅନୁସାରେ ଜମିର ସେଟଲମେଣ୍ଟ କିମ୍ବା ନିୟମିତକରଣ ପାଇଁ ଯୋଗ୍ୟ ଅଛନ୍ତି, ତେବେ ତାଙ୍କୁ ନିଜ ସ୍ଥିତି ନିୟମିତ କରିବାର ସୁଯୋଗ ଦିଆଯାଇପାରେ। ଅନ୍ୟପଟେ ଯେଉଁମାନେ ଆଇନଗତ ଭାବେ ଯୋଗ୍ୟ ନୁହନ୍ତି କିମ୍ବା ଅବୈଧ ଭାବେ ଜମି ଦଖଲ କରିଥିବା ଜଣାପଡ଼ିବ, ସେମାନଙ୍କ କ୍ଷେତ୍ରରେ ଜମିକୁ ପୁଣି ମନ୍ଦିର ପ୍ରଶାସନ ଅଧୀନକୁ ଆଣିବା ପାଇଁ ଆଇନ ଅନୁଯାୟୀ ପଦକ୍ଷେପ ନିଆଯିବ।

ଜମି ସେଟଲମେଣ୍ଟ ପାଇଁ ୨୦୦୩ରୁ ଲାଗୁ ହୋଇଥିବା ସମାନ ନୀତିରେ ମଧ୍ୟ ପରିବର୍ତ୍ତନର ଆବଶ୍ୟକତା ଥିବା ଆଇନ ମନ୍ତ୍ରୀ କହିଛନ୍ତି। ସରକାରଙ୍କ ମତରେ, ବର୍ତ୍ତମାନର ପ୍ରକ୍ରିୟାରେ ଆବଶ୍ୟକ ସଂଶୋଧନ କରାଗଲେ ଜମି ସମ୍ପର୍କିତ ମାମଲାଗୁଡ଼ିକର ଶୀଘ୍ର ସମାଧାନ ହୋଇପାରିବ। ଏନେଇ ଏକାଧିକ ସମୀକ୍ଷା ବୈଠକ ମଧ୍ୟ ହୋଇସାରିଛି। ପ୍ରସ୍ତାବିତ ବ୍ୟବସ୍ଥାରେ ଯେଉଁମାନେ ଆଇନ ଅନୁଯାୟୀ ଯୋଗ୍ୟ ହେବେ, ସେମାନଙ୍କୁ ନିର୍ଦ୍ଧାରିତ ନିୟମ ଅନୁସାରେ ଜମି ନିୟମିତ କରିବାର ସୁଯୋଗ ମିଳିପାରେ।

ଏହି ପଦକ୍ଷେପ ମାଧ୍ୟମରେ ଶ୍ରୀଜଗନ୍ନାଥ ମନ୍ଦିର ପ୍ରଶାସନର ଜମି ଓ ଅନ୍ୟ ସମ୍ପତ୍ତିର ଏକ ସ୍ପଷ୍ଟ ରେକର୍ଡ ପ୍ରସ୍ତୁତ କରିବା ସରକାରଙ୍କ ଲକ୍ଷ୍ୟ। ଜବରଦଖଲ ହୋଇଥିବା ଜମିର ସଠିକ୍ ତଥ୍ୟ ମିଳିବା ସହ ଯୋଗ୍ୟ ମାମଲାଗୁଡ଼ିକର ଆଇନଗତ ସମାଧାନ ହେଲେ ମନ୍ଦିର ପ୍ରଶାସନ ନିଜ ସମ୍ପତ୍ତି ସମ୍ପର୍କରେ ଅଧିକ ସ୍ପଷ୍ଟ ରେକର୍ଡ ପାଇପାରିବ। ଏହାସହ ମନ୍ଦିର ଜମିରୁ ହେବାକୁ ଥିବା ସମ୍ଭାବ୍ୟ ଆୟକୁ ମଧ୍ୟ ଭଲ ଭାବେ ପରିଚାଳନା କରାଯାଇପାରିବ।